ذكريات من يوم عرسي😂

.. اليوم وانا قاعدة وسرحانة أجاني كرت من الجيران علشان فرح ابنهم يوم الجمعة واﻷيام رجعت فيي لقبل 25 سنة ليوم فرحي ﻷني تزوجت في مثل هذا اليوم ... المهم يوم فرحي كان يوم مميز جدا جدا انا متأكدة وﻻ بنت بالعالم كان فرحها مثل فرحي من البداية للنهاية رحت عالصالون يوم فرحي وكنت مركنة اخوي يجبلي البدلة أللي هي بدلة مرتوا اصﻻ بس وداها عالدراي كلين يكووها ويزبطوها ﻷنوا اهل العريس لما فاصلوا المهر مارضيوا يكون عليهم وﻻ اشي ﻻ بدلة وﻻ صالون المهم راح اخوي يجيب البدلة طلع مسكر صاحب المحل وكمان مسافر على سوريا والبدلة جوا المحل ولما عرفت تقريبا اغمى علي وانا بالصالون وظليت اعيط لما خرب كل اشي ﻻ شعر وﻻ مكياج ظل منيح بس حكوا معاي وطمنوني انهم جابوا اخوه لصاحب المحل وكسر القفل وطلعوا البدلة لكن ماكانت مكوية وﻻ اشي جابوها زي ماهي والله يجبر خاطرها صاحبة الصالون قعدت تسبل فيها بالسشوار يعني اهون بﻻ .... لبست البدلة وطلعت من الصالون وروحت عالبيت واستنيت العريس لحتى يجي على بغل ابيض ياخدني ونحنا بنستنا امي حكتلي انها حماتي حكت معها وحكتلها ماعندهم عادة يجي العريس معهم يطلع العروس حكيت خلص شو يعني عالقليلة باخد راحتي بالسيارة لحالي ههههه اهل العريس اتأخروا والجميع صاروا قلقانين وووووووووين لما وصلوا امه وخواتوا وسلموا علي وبوسوني وحكولي سيارة العروس خربت بالطريق وخلوها واجوا بالباص المهم ياجماعة الخير كل هادا ماخليتوا يأثر علي كان عمري 18 سنة وكنت بس بدي اخلص من هاليوم الطويل اجوا رجال العيلة ونقطوني واخوي مسكني من ايدي وحط علي عباية سيدي الله يرحمه وطلعت العباية الشتوية وكانت أثقل من اللحاف وولعت تحتيها وصار عرقي يزرب زرب .. المهم لما طلعت لقيت صديق اخوي متبرع هو يزفني بسيارتوا علشان سيارة العروس خربت وماشاء الله عليه ابصر من وين كاين مدبر وردتين وشوية خيش حاطهم عالسيارة حتى يفرحني هو واخوي الله يرضى عليهم ومشى ياحبيباتي موكب العروس والزفة وساعتين وانا بالطريق ماخلوا وﻻ شارع وﻻ قرنة فيكي ياعمان ومامشوها واخيرا وصلت دار العريس ونزلوني خواتوا وامه وخلوني ادعس على بيض وافقشه وطبعا الكندرة بيضا صارت زنخة وصفرا وبعدين اعطوني عجين وورد ولزقته عالباب ولما رفعت ايدي لقيت نص الكف ممزوع مع اﻷصابع بسبب العجينة وصاروا يرموا حلو اشي براسي واشي بوجهي واشي يخش بعبي وماصدقت ادخل من الشارع والميمعة ولما دخلت لقيت عريسي قاعد على لوج عبارة عن كنباية مزوج مرفوعة على طوبتين وعليها مصلية مرسوم عليها حصانين وشوية بﻻلين منفوخات ونصهم مفشوش وحبلين زينة موصﻻت خمسين وصلة قام عريسي واستقبلني ورفع الطرحة وباسني من جبيني وقعدني عاللوج وقعد جنبي شوي بعدين خجل وطلع وفش نص ساعة إﻻ والكهربا بتنقطع وبطل حدا يشوف التاني ومن الخوف صرخت وامي عبطتني وحكتلي يﻻ ياحبيبتي خليني اروحك على بيتك بﻻ فرح بﻻ هم المكتوب مبين من عنوانه المهم امي طلعتني على ضو الشمع على بيتي وحطتني وقعدت معي شوية وراحت وبعدها اجا العريس ومن يومها وانا الكهربا عندي مقطوعة
😂😂😂😂😂😂😂
😭😭😭😭😭😭😭ا

ههههه انا قولت عوضتها بالايام اللي بعد العرس
طلعت الكهربا قاطعة من وقتهاا

يسعدكك ..

@شهد الروح
نزلتلك اياه عشان تحششي

اقتباس   المشاركة الأصلية كتبت بواسطة الصياد ههههه انا قولت عوضتها بالايام اللي بعد العرس طلعت الكهربا قاطعة من وقتهاا يسعدكك ..

المتعوس متعوس ي محمود..هه
نورت موضوعي
يسعدك

ههههههه ذكريات لا تنسي الصراحه ميرسي. نقاء

هههههههه يا ويلي شو صاير فيها
بس جد روحها حلوة
يسلمو نقاء

ههههههههههههههههه
عانيتي كثيررر والله
بس بالاخير صار شي منيح هههههههه
يسعدكـ يـــا رب

تحشيش هههه
مسكينه شو حظها معتر ههه
الله يسعدك نقاء

مالي نفس اضحك والله
بقراها بس اروق .بحب اعطي ضحكتي حقها
واضحكها من القلب

انا بدي قصة بياض التلج والله بستناها

هههههه
الله يبعتلك ايام حلوة
و
سنين احلى