ليش بدك إياني أروح ع السلك يوم الجمعة الجاية؟

ليش بدك إياني أروح ع السلك يوم الجمعة الجاية؟!
بجد إيش بدي أنا في لخمة الراس هاي؟!"

#لازم_تروح_الجمعة_عشان كلنا طالعين، آه والله كلنا: حماس، وفتح، وجهاد، وجبهة شعبية وديموقراطية، ومين بدك كمان؟ بقلك والله كلنا!

#لازم_تروح_الجمعة_عشان لأول مرة من مليون سنة ضوئية نشوف حالنا موحدين جد، مش رافعين إلا العلم الفلسطيني، والعلم الفلسطيني بس!

#لازم_تروح_الجمعة_عشان إحنا في غزة ما إلنا إلا هالحل الوحيد، بعد هالحصار الللي دبحنا من الشريان للشريان، فش خيارات، إلا بين السيء والأسوأ، ما هو مش منطق، إنه إسرائيل مانعة عني المي والهوا، وما بدها إياني أروح عندها، وأقولها: "بكفي!"

#لازم_تروح_الجمعة_عشان البديل هو "صفقة القرن"، عارف شو هي صفقة القرن؟ أنا أقلك: يا إما نزحف على فلسطين، يا إما حيزحفونا هم غصبن عنا على وين -أنا مش عارف- بس أكيد مش فلسطين.

#لازم_تروح_الجمعة_عشان فاكر لما قعدنا نحكي لأجدادنا، شو اللي طلعكوا من البلاد؟ هادا الوقت اللي نصلح فيه هالغلطة، أرضنا هناك!

#لازم_تروح_الجمعة_عشان الرقم 194، حتقولي شو هو الرقم 194؟ هادا رقم القرار تبع الأمم المتحدة اللي بقول:"تقرر وجوب السماح بالعودة، في أقرب وقت ممكن للاجئين الراغبين في العودة إلى ديارهم...وفقاً لمبادئ القانون الدولي والعدالة".

#لازم_تروح_الجمعة_عشان القرار رقم 194، اللي حكيتلك عنه فوق، تخيل إنه إسرائيل نفسها لما وافقت الجمعية العامة للأمم المتحدة على طلبها إنها تنضم للأمم المتحدة، كان الشرط إنه إسرائيل ملعونة الوالدين تتعهد بتنفيذ القرار رقم 194، ولليوم ما نفذته، آه والله، مش مصدقني، هي الجوجل والويكيبيديا عندك، من يووووومها وهي بتماطل! هادا حقك، خده بإيدك.

#لازم_تروح_الجمعة_عشان، إسرائيل في صحافتها بتقول: لو نجح هالنموذج في غزة، راح ينجح في الضفة، تخيل؟

#لازم_تروح_الجمعة_عشان إثنين صهاينة إسمهم: جابي سيبوني وكويف ميخال، من مركز أبحاث الأمن القومي الإسرائيلي، نشروا دراسة يوم الثلاثاء 20/3/2018، قالوا فيها: "إن أخطر التداعيات المترتبة على نجاح المسيرة متمثل في إحداثها تحوّلاً في الوعي العالمي بالصراع الفلسطيني الإسرائيلي، من خلال إعادة الاعتبار لقضية اللاجئين الفلسطينيين"

#لازم_تروح_الجمعة_عشان إلنا كل سنة من 1948، وإحنا بنقول "راجعين".."راجعين".."راجعين" طيب لمتى؟ بدنا نرجع هلقيت! هلقيت بدنا نرجع!

#لازم_تروح_الجمعة_عشان صارلنا 70 سنة، 70 سنة جربنا فيها الحروب والمعارك، وجربنا فيها المفاوضات، وجربنا فيها كل إشي تقريبا، إجا الوقت اللي نجرب فيه النضال المدني المجتمعي، بعيدًا عن أي تأطير، خلينا نعطيه هالمرة فرصة!

#لازم_تروح_الجمعة_عشان اللي قالته الصحفية الاسرائيلية رونيت مرزيل في "هآرتس" إنه "توجه الفلسطينيين إلى مسيرات العودة يعبّر عن توجههم إلى خطاب جديد هو الخطاب المدني، بعد أن جربوا الكفاح المسلح والنضال السياسي. وهم يتوجهون الآن إلى نمط جديد يستند إلى المجتمع المدني النشيط بدل السلبي، والذي يعتمد على الشرعية الدولية في حق الفرد بالعودة إلى أرضه" شو رأيك في هالكلام؟

#لازم_تروح_الجمعة_عشان دموع سيدي وسيدك، وهم بحكولنا عن برير وبربرة وهربيا وحمامة والكوفخة وكوكبا، وأسدود والمجدل، وما قدرناش نمسحها، إجا الوقت اللي إحنا ولاد ولادهم نرجع!


#مسيرة_العودة_الكبرى #أنا_راجع

الله يجيب كل خير

وانشاء الله العودة قريبا

احترامي الك

ممكن اكثر شيء تنجح فيه هالمسيرات انه تحرك الوعي العالمي
حول قضية اللاجئين من جديد ، بعد ما اخمدتها المفاوضات الفاضية اللي بتصير الها سنين
يعطيك العافية ..

ان شالله العودة بالقريب العاجل
مشششكور ع المتابعة

ان شاء الله خير يا رب
وان شاء الله الفرج قريب
ربنا كريم
كل الشكر مؤمن ع النقل الجميل

ان ششششاء الله منرجع لبلدنا
ان شاء الله تزبط هالمسيرات
وناخد حقنا اللي انحرمنا منه
يسسسسلمووو مؤمن

إن ماتياس شجع ع المشاركة


ان شاء الله خير


عوافي

المشاركة حق واجب على كل فلسطيني حر بدو يرجع لارضه
اخوى بدو ياخدنا كلنا ههه بجملة لمعلم
يسسلمو مؤمن للمتابعةة

آن شآء الله خير
يعطيگ العآفية
آرق التحآيآ