كل عنف وأنتِ بخير حوا !

العنف مش بس إنك تضربها :
■ لما تحكيلها يا بنت وما تناديها باسمها هاد عنف .
■ لما مزاجك يُطلب قرشله وتحكيلها قومي إعمليلي شاي وحضرتك بكامل قواك البطنيه ومرخرخ عضلاتك على التخت ومستني الشاي يوصلك ديلڤري هاد عنف .
■ لما يجي معاد الغدا وما يكون جاهز وتقلب طوشه لانو السم الهاري مش جاهز هاد عنف .
■ لما ما تحكيلها كل طلعة شمس صباح الخير بابتسامه وهمسه وغمزة وبوسه ولو ع الهوا هاد عنف .
■ لما ما بدك تساعدها بالجلي وكمان ما تحضنها وهيا بتجلي هاد عنف .
■ لما قميصك في أقصى جنوب الغرفه وبنطلونك شرق الخزانه وبجامتك على الأرض هاد كمان عنف .
■ لما ريحة جرابينك تكون مفحفحه وحضرتك مش مغسل رجليك من 72 ساعه وهيا بتحاول تبعد عنك وتشرحلك الموقف وإنو في حاجه غلط وحضرتك حَبَكَت معك تحضنها هاد كمان عنف .
■ لما ما تستعمل حاجه اسمها معجون اسنان وما تتحمم وما تقص أضافر رجليك لإنو بشوكوها بالليل هاد كمان عنف .
■ لما تحملها مسؤولية الاولاد كإنها هيا اللي جابت اللي خلفهم واللي خلفهم مش فاضي لإنو وراه سهرة مع الشباب وهاتك يا شدة وشيشه وطرنيب هاد كمان اسمه عنف .
■ لما يطلع قرار هيك فجأة زي الشعر براسك وما تسألها ولا تشاورها ولا كإنها شريكة حياتك هاد كمان إسمه عنف .
■ لما تحكيلك أنا خلص بَطَّلت أتحمَّل إنت فطريق وأنا فطريق وحضرتك لسّه مُصِر ما تغيِّر تفكيرك ولا تغيِّر جرابينك ولا تطلق سراحها هاد كمان اسمه عنف .

كل عنف وإنتِ بخير حوا

معك حق
جدا راقني هالموضوع
عوافي

حبيت موضوعك وتر
وهو فعلا صحيح مش بالضروره يكون العنف كلمات او ضرب
يسلمو دياتك

طلعت حياتنا معنفة بهالشكل
ربنا يهدي النفوس
طرح مؤلم

ههههه طيب

شكرا للمعلومة

والله شكلو جوزي اكثر انسان معنف في هالدنيا هههههههههههه

بس مع ذالك بنبسط بس يحكيلي يا بنت وما يناديني باسمي بحس الي هيبه هههههه


حبيت الموضوع يسلموو يا حب

قريتو بالفيس
هههه كثير حلو
يعطيك العافيه وتر

العنف المعنوي أشد من العنف اللفظي
كون الرجل ما يساعد رفيقة حياته
ويتركها تتحمل اعباء بيتها هاد ما بيعني
ان لسانه يعجز عن المدح وتصبيرها بكلمة طيبة
وايديه ما بتعجز عن غمرة تقويها وتعنيلها الكتير
يسلمو وتر

شكرًا لحضوركم.