فولكلور ~ و مواويل // فلسطينية مسآحةة

يا محلى المجوز ويا محلا الدبكة ع ترابك يا فلسطينا..
يا محلى اليرغول والأوف والعتابا ع أرضك يا جنين..
يا محلى الحداية وهم بتحاربوا ع أرضنا..
يا محلى شباب البلد كلهم وهم متجمعين على أنغام يا حلالي يا مالي..

حنا يا حنا يا ورق النبات-- يا محلى الحنا على أيدين البنات


حنا يا حنا يا ورق السريس-- يا محلى الحنا في ايدين العريس


حنا يا حنا يا ورق الليمون -- يا محلى الحنا في ايدين المزيون

وسعوا دار أبو ( فلان ) ==== لفّت عليها العزومـــة
وأنا وسعت دارنــــــــا ==== هاذولا اكبار الحمولة

على الجزيرة على الجزيرة
شدوا الرحال اليوم على الجزيرة
حلوة وأميرة عروستك يا ( اسم العريس ) حلوة وأميرة


ع العود اليابس ع العود اليابس
شدوا الرحال اليوم ع العود اليابس
أحلى الملابس أحلى الملابس
لبسها يا ( اسم العريس ) أحلى الملابس

إمو يا إمو يخليلو إمو
سبع كناين تعبر ع إمو

جابتلي بطيخ
ما باكل بطيخ
حتى ع المريخ
لحقتني إمو

جابتلي شمام
ما باكل شمّام
حتى ع الحمام
لحقتني إمو

قولوا لإمو تفرح و تتهنى .. ترش الوسايد ( بالعطر و الحنا )

يا دارٍ هنّا و ابنيها يا بنا .. و الفرح إلنا ( و العرسان تتهنى )

و الدارِ دارِ و البيوت بيوتي .. و احنا خطبنا ( يا عدوة موتي )

يا بيي مِريم لا تِكون عبوسي .. و اسمح بوجك ( و أعطبها العروسِ )

يا بيي مِريم لا تِكون طمّاعِ .. و المال يفنى ( و النسب نفّاعِ )

هلا يا نايم على نومك ما حسيت
عمر بيتك خرب بيتك ما حسيت
انا اللي نمت بحضينك ما حسيت
علينا كوكبت شمس الضحا

يا بين زحله و مرج عيون يومين
ع دربك يا حلوه يلعب الخيال يومين
و انا حبي عاشرتك سنه و يومين
يا عشره يوم تنحسبلي بسنه

يا ميجنا ويا ميجنا ويا ميجنا
زهر البنفسج يا ربيع بلادنا
أوف.. أووف
يا با باي
الشعب قال أنا بفخر بعيدي
ومهما تكون أوطاني بعيدِه
ومين اللِّي لأوطاني بعيدي
غير التّضحية ودمِّ الشباب

أوف
وثورة شعبنا ركبت حُصُنْها
وبسواعِدِ الفدا تقوَّى حصنْها
وبقلبي وفِكري بحفظْها وبصُونها
وبفديها بدمّات لِعصابْ