زواج البروفيلات !

زواج البروفايلات

كونه يكتب عن مواضيع دينية هذا لا يعني بالضرورة لو تزوجتيه انه وقت ما تكوني واقفة تجلي حيجلي معك اقتداء بالنبي صلى الله عليه وسلم..

كونه عامل بروفايله نقطة تجمع المعارضين وأهالي الشهداء ومسمي حاله المنتصر بالله الثائر المقدام بن أبي كعبونة هذا لا يعني انه لما تتزوجيه حيجاهد حق الجهاد ويغض بصره عمن سواك كأدنى نوع من الجهاد النفسي

كونه عامل بروفايله مدجج ب5000 صديق مسكرين وفوقهم كمشات آلاف من "فولورز" هذا لا يعني انه لو تزوجتيه حيكونلك صديق..بالمعنى الحقيقي لصديق
وحيغنيك بقلبه..

كونه بحكي مع كل أصدقائه بكامل اللباقة والاحترام هذا لا يعني لو تزوجتيه رح يضل حنون معك لما تحكيله كل يوم خد الزبالة معك - الله يجلكم-وانت طالع
وانت التانية اتقي الله وبلاش كل يوم كيس .
.......
انه دايما شابك اونلاين لمساعدة المحتاجين عقولتك..
هذا لا يعني انه لو تزوجتوا رح يصحى يحمل عنك البيبي لما ما يرضى ينام ويضل اونلاين (حرفيا) طول الليل معك وانت من التعب حتكوني اقلها مخك دي اكتيفيت ..!
احتمال كبير يعملك بلوك وينام بالصالة عادي..
...
انه هو كبروفايل بعرف يميز بين الرأسمالية والليبرالية وجيفارا حبيبه اللزم والاتجاه المعاكس والجزيرة زي كاندي كراش عنده
هذا لا يعني انه ممكن يحترم رأيك ويستشيرك ويشوفك مصدر تشريع بحياته
...
يا بنتي..وأختاه وعمتاه..وكل اساليب النداء..
حبيبة قلبي الله يوفقك..
سيبيك من جملة..يا الهي انا نفسي ارتبط بإنسان بروفايله زي بروفايل فلان..
ناوية تخلفي أكاونت صغير يا بعد عيني ؟
..
تقبشيني..برضاي عليك..
سيبك من هالقشور..
ردي علي
البروفايلات شو ماكانت بتبقى قشور..عن خبرة بحكيلك..وخبرة مريرة
بقصص مخيفة عن مدى الفرق بين الظاهر والباطن..
الفيسبوك فسحة لاخراج افضل ما فينا..
فهاد البروفايل الأمور المسمسم..
افضل ما فيه وارقى وانقى..بس مش
كل
مش...((((((كل ))))) جوانبه

"هذا بالابتعاد عن نظريةانه كله كذب ورياء وانه لازم الظن الحسن بشعب هالأمة لانه هاد قصة لحاله الوضع "
..
الزواج مش بوست..ولا لايك..ولا تفنن بالحكي..
الزواج خيتا..هو انسان قادر يجيب بامبرز معاه كل يوم بدون ما يزهق..
ويستحمل طبيخك المحروق والمملح والمش موجود أصلا 😏
هو شيء..أكبر من مجرد..
يعملك بوست مرتب حارق خارق من كلامه المؤثر
قدام كل مخاليق الله..
فتكتبيله <3 <3

هو انه يشوفك..كل مرة..ويشعر بالدهشة لوجودك =")
بغض النظر عن أسباب الدهشة 😂
هو انه يكون زوج حقيقي مش الكتروني..
فسيبك من وهم جمال بروفايلات الآخرين الله يرضى عليك
اللهم بلغت ..

ههههههههه

معقول في هيك

مشكوره كثير

ليش تصدمينا طيب
ههههه
كلام واقعي وسليم وتر الحلوة
يعطيك العافية

كلام واقعي جدا
رغم انه انكتب بطريقة فكاهية وساخرو
الا انه بحاكي جزء كبير من واقعنا للأسف
والكلام شيء والتطبيق العملي شيء ثاني خالص

يسلم حسك وتر
ودامت روحك المرحة
وردي لك

هههههه
معك حق
مشكورة للنهفة

صحيح هالحكي بنسبة كبيرة وانه مش كل شيء بننشره ممكن يكون بشبنها
او بعبر عنا بالكامل ، هو جزء من شخصيتنا المنيحة وكل السيئات اللي فينا ما بتظهر
اللى بالعشرة والحياة والمشاركة
يعطيك العافية لادراجك ..

شكرًا لحضوركم.