[ نوون ع كـرسي الـآععتراف ]

اهلا وسهلا نون
نورتى كرسي الاعتراف
وحابة اسئلك كام سؤال بعد اذنك

- هاى اول تجربة الك بعالم المنتديات او مشتركة بغيره ؟

- كيف بتحكمى ع الاعضاء ، من خلال مشا كاتهم والا تعاملك معهم ، او تصور مسبق عنهم ؟

- معظم ردود اذا ماكان كلهم بيغلب عليهم طابع الجدية ، انتى طبيعتك هيك ، والا هالجدية من باب انه كل شخص يعرف حدوده ومايتجاوزها بعد هيك ؟

- ذكرتى من قبل انه مابتحبى حدا يكون مسؤل عنك بشغلة المصروف وكنت هسأل نفس سؤال هل كان حبا بس سبقني ، مابتشوفى ان هالشي متعب وانه اتحملتى المسؤولية ع البدري ؟

- متى ممكن تثقى بالشخص وتفتحيله قلبك ؟

- حابة اعرف رايك ب
- m0m3n /
- الصياد /
- حنين الروح /
- نأي /



وبتمنى تكون اسئلتي خفيفة عليكي

اختيار جميل لنون
صبية واعيه ومميزه وشخصيتها ملفته
وان شاء الله بنتعرف عليها اكتر من خلال هالموضوع
يسلمو خمر ع اختيارها


منوره الكرسي نون

// بنظرك امتى الإنسان بتغير؟ وشو الأسباب يلي ممكن تخليه يتغير ؟ وانتى بنظرك بالفترة الاخيره اتغيرتي؟ ، ولو اتغيرتي اتغيرتي للاحسن ولا للاسوء؟
وشو الصفات يلي تغيرت فيكي بالفترة الماضيه ؟
// لو غمضتي عينيكي هلأ شو هو الشي يلي ممكن تفكري فيه ؟
// شو اكبر مخاوفك ؟
// شي حققتيه وبتفخري فيه شو هو ؟
// لو طُلب منك العودة في الزمن وتصحيح أمر خاطئ صدر عنك .. شو هادا الخطأ وإلى أي وقت رح ترجعي ؟
// شي مرة قمتي بتجربة معينة وحابة تكرريها مرة تانيه وشو هي ان وجدت ؟
// شو اكثر شي بميز البنت يلي بتحبي تختاريها صديقة الك ؟
// ذروة غضبك لوين ممكن تصل وشو ممكن يصدر عنك ؟
// تجري الرياح بما لا تشتهي السفن
كم هي المرات التي جرت فيها الرياح عكس آمالك وطموحاتك ؟
// أين تري نفسك في الحياة ؟ ماذا حققتي وما الذي تطمحي لتحقيقه بالمستقبل ؟
// اصعب موقف مريتي فيه وترك فيكي اثر كبير ؟
// الدنيا مرات بتعطينا اشيا ومرات بتاخد منا . شو اعطتك الدنيا وشو اخدت منك ؟
// شو يلي بميز نون عن غيرها ؟
// الامنيات كتيره وكل واحد عنده امنيات شو الامنيه يلي بتتمني تحققيها وبشدة ؟
// ممكن تحكيلنا عن احلى يوم بحياتك ؟
// امتى بتحسي بالضعف ؟وامام مين ممكن تضعفي ؟
// كنا خير امة اخرجت للناس والان لا يرأيك ماهي الاسباب؟؟
// الصفات يلي بتتمنيها بشريك حياتك ؟
// وقت خلوتك مع نفسك بشو بتقضيه ؟
// امتى بقسى قلب نون ؟
// دمعة انحبست داخل عيونك واجبرك الزمن على ايفافها قبل أن تسقط امتى وشو السبب ؟

بتمنى تكون اسئلتي خفيفه عليكي

اهلا وسهلا نون
نورتى كرسي الاعتراف
وحابة اسئلك كام سؤال بعد اذنك
ميرسي الك خمر تشرفي بأي وقت
- هاى اول تجربة الك بعالم المنتديات او مشتركة بغيره ؟
لا مش مشتركة بأي مكان تاني هون وبس

- كيف بتحكمى ع الاعضاء ، من خلال مشا كاتهم والا تعاملك معهم ، او تصور مسبق عنهم ؟
ملامح الشخص بتبين من اسلوبه وطبيعة المواضيع اللي بيحب يشارك فيها
وبتفرض عليا احترامه او العكس بس مابقدر احكم على حدا حكم نهائي بدون تعامل واقعي
وبدون ما اعرفه عن قرب وأشوف ردود أفعاله وكيف بيتصرف بالمواقف وإلا بيكون حكم ظالم .
- معظم ردودك اذا ماكان كلهم بيغلب عليهم طابع الجدية ، انتى طبيعتك هيك ، والا هالجدية من باب انه كل شخص يعرف حدوده ومايتجاوزها بعد هيك ؟
طبيعتي بتميل أكتر للجدية وبحب أفرق بين الجد والهزل واللين بالكلام وبعرف أقيم وأختار
مع مين أمزح ومع مين احكي جد وبحب أحط حدود لكل الناس اللي بعرفه واللي مابعرفه وما بسمح لحدا بتجاوزها أبداً .
- ذكرتى من قبل انه مابتحبى حدا يكون مسؤل عنك بشغلة المصروف وكنت هسأل نفس سؤال هل كان حبا بس سبقني ، مابتشوفى ان هالشي متعب وانه اتحملتى المسؤولية ع البدري ؟
مافي شيء بالحياة مجاني ولا بتقدري توصلي او تحصلي عليه دون مقابل بالبداية كان الأمر متعب ومرهق
بس اتعودت على وضعي ولأني بطبيعتي حساسة جداً وبخجل أطلب من حدا شيء فكان لازم اتحمل مسؤولية
نفسي بكل ظروفها وتفاصيلها وأتحرر من القيود المادية اللي ممكن تخلي حدا يتحكم فيا أو يسألني عن
أمور ما بتخصه وهالشيء كبرلي عقلي قبل عمري وفهمت واستوعبت أشياء كان يلزمها وقت أكبر لأفهمها.
- متى ممكن تثقى بالشخص وتفتحيله قلبك ؟
الثقة مش كلمة بنقولها الثقة صفة معنوية مابنقدرنعرف قيمتها بميزان هي بتتكون مع المواقف والظروف
وبعرف من خلالها التزامه .. صدقه .. قناعاته .. مبادئه لأن الثقة هي حجر الأساس اللي بنبني عليه علاقة دايمة .
- حابة اعرف رايك ب
- m0m3n / ما قدرت أكون رأي عنه
- الصياد / ما قدرت أكون رأي عنه
- حنين الروح / واضحة عفوية بردود أفعالها انفعالية مع المواقف حساسة ورومانسية وبتتعلم من المواقف ومثقفة وعندها القدرة على الحوار والاعتراف بالخطأ
- نأي /

شخصية راكزة وعميقة وقلمها واعي وبيعرف طريقه
بتترك أثر وانطباع حلو
شرفتي @خَمْر أيلول

اختيار جميل لنون
صبية واعيه ومميزه وشخصيتها ملفته
وان شاء الله بنتعرف عليها اكتر من خلال هالموضوع
منوره الكرسي نون
ميرسي الك لونلي انتي الأجمل
والألطف بكلامك ورأيك واسلوبك الراقي
// بنظرك امتى الإنسان بتغير؟ لما بتجبره الظروف الخارجة عن إرادته للتغيير
وشو الأسباب يلي ممكن تخليه يتغير ؟ ؟ أسباب كتير ممكن تكون المادة والأوضاع الاجتماعية أجبرته إنه يبعد عن الناس
وممكن تكون أسباب نفسية انه يكون اتعرض لمواقف صعبة بحياته أثرت عليه .
وانتى بنظرك بالفترة الاخيره اتغيرتي؟ ، ولو اتغيرتي اتغيرتي للاحسن ولا للاسوء؟ نعم اتغيرت وان شاء الله يكون للأحسن .
وشو الصفات يلي تغيرت فيكي بالفترة الماضيه ؟
انكسرت جوايا أشياء ما كنت أتصور انها تنكسرأبداً حولتني بدرجة كبيرة للنقيض
وانولدت جوايا نقاط قوة جديدة وكنت شخصية اندفاعية هلأ لأ .
// لو غمضتي عينيكي هلأ شو هو الشي يلي ممكن تفكري فيه ؟
عمضت وما فكرت بشيء شفت نفسي بمكان هادي كتيرماسمعت شيء فيه حتى أنفاسي وكأني انفصلت فجأة عن العالم .
// شو اكبر مخاوفك ؟ بخاف كتير من غضب رب العالمين
// شي حققتيه وبتفخري فيه شو هو ؟
كل ما بقرب من رب العالمين وبعمل أي شيء من النوافل والسنن غير المفروضة بحس بالفخر وبحس بحب الله أكتر ..
لما بخرج من البيت بنية اخراج صدقة بفتخر وبحس براحة نفسية كبيرة ..
حسيت بالفخر لما شاركت بكفالة يتيم ..
بفتخر بثقافتي ووعيي ونجاح مشروعي الصغير ..
بفتخر بمشاركتي بالأعمال التطوعية .. وبفتخر بقوة شخصيتي وقراراتي اللي باخدها وما بتخذلني وما بندم عليها أبداً
بفتخر بخطأ عملته اتعلمت منه الصح .
// لو طُلب منك العودة في الزمن وتصحيح أمر خاطئ صدر عنك .. شو هادا الخطأ وإلى أي وقت رح ترجعي ؟
برفض أرجع للماضي حتى لو كان الهدف تصحيح خطأ
// شي مرة قمتي بتجربة معينة وحابة تكرريها مرة تانيه وشو هي ان وجدت ؟
ركبت دراجة جبلية ونزلت على الدرج
// شو اكثر شي بميز البنت يلي بتحبي تختاريها صديقة الك ؟
تكون انسانة راكزة وواضحة على درجة من الوعي وعندها مبادىء وتكون أمينة وبتصلي وتساعدني اني أعمل الأشياء الصح وأقرب من رب العالمين أكتر .
// ذروة غضبك لوين ممكن تصل وشو ممكن يصدر عنك ؟ انا بصبر عند الغضب وبنعزل عن الناس اللي بيزعجوني حتى ما اجرحهم لكن لو هم أصروا على ازعاجي ممكن أجرحهم بالكلام
وهالشيء بطبقه على نفسي قبل غيري بتمر عليا أوقات بخاصم نفسي وبعاقبها وأجرحها بالكلام وممكن ما اطلع بمراية حتى ما أشوف نفسي .
// تجري الرياح بما لا تشتهي السفن
كم هي المرات التي جرت فيها الرياح عكس آمالك وطموحاتك ؟ مرة واحدة والحمد لله ما طولت
// أين تري نفسك في الحياة ؟ ماذا حققتي وما الذي تطمحي لتحقيقه بالمستقبل ؟ ؟
شايفة نفسي بناقش دكتوراة في العلوم المالية والمصرفية بقاعة جامعية بلندن
صحيح الموضوع هياخد وقت وجهد وعمر بس هيتحقق ان شاء الله وطموحي اللي حققته لهلأ استقراري على مجال دراسة ارتحت فيه .
// اصعب موقف مريتي فيه وترك فيكي اثر كبير ؟ موت بعض الأقارب
// الدنيا مرات بتعطينا اشيا ومرات بتاخد منا . شو اعطتك الدنيا وشو اخدت منك ؟
أعطتني أهل وعيلة أفتخر فيهم وأعطتني وضع اجتماعي مشرف وأخدت مني أقرب الناس إلي .
// شو يلي بميز نون عن غيرها ؟
ملتزمة بمواعيدي ووعودي ونظامية وبتحمل مسؤولية وراقية بالتعامل مع غيري
// الامنيات كتيره وكل واحد عنده امنيات شو الامنيه يلي بتتمني تحققيها وبشدة ؟
؟ الدكتوراه وإني أسافر لأكتر من بلد .
// ممكن تحكيلنا عن احلى يوم بحياتك ؟
كل يوم بيمرعليا بضحك فيه من قلبي وبنجز فيه هدف كنت مخططاله بيكون أحلى يوم بحياتي
// امتى بتحسي بالضعف ؟وامام مين ممكن تضعفي ؟
لما بشوف دمعة يتيم أو بسمع أنين مريض وضعفي قدام نفسي بس
// كنا خير امة اخرجت للناس والان لا يرأيك ماهي الاسباب؟؟
كنا خير أمة لما كانت متحققة فينا شروط الخيرية وهي الأمر بالمعروف والنهي عن المنكر والايمان بالله ..
شو باقي هلأ من الشروط ؟ ماضل شيء العكس تماماً هو اللي صاير مع التبعية الكاملة لليهود وأصحابهم .
// الصفات يلي بتتمنيها بشريك حياتك ؟ يكون بيصلي عن تقوى وخوف من الله مش تعود .. شخصيته قوية .. يكون عنده طموح ويكون
راكز وواعي ورومانسي وجدي بنفس الوقت ويكون مهضوم مش معقد وما يمنعني من تحقيق طموحي ويكون جامعي
// وقت خلوتك مع نفسك بشو بتقضيه ؟
بسمع ميوزيك هادية وأرتب أفكاري وأحدد أهدافي اليومية
// امتى بقسى قلب نون ؟
قلبي ما بيقسى لكن عقلي ممكن يقسى هو وكلامي
// دمعة انحبست داخل عيونك واجبرك الزمن على ايفافها قبل أن تسقط امتى وشو السبب ؟
لما سألني طفل يتيم ليش أنا ما عندي بابا انحبست وما قدرت انزلها قدامه ولا عرفت أرد على سؤاله بس غمرته .
وانحبست قدام مريضة بقسم الطوارىء اتعرضت لحادث سير وكانت حامل بصبي وكان بينها وبين الموت ساعات
وسألتني عن بناتها وقالتلي أنا هموت مش هيك ؟

بتمنى تكون اسئلتي خفيفه عليكي
تشرفي بأي وقت @lonely heart

مرححبا ككمانن ممرهه 💙
ممككنن ككمم سسؤال
رايكك في الححب عنن طريق النتت ععامهه
والمنتتديياتت خخاصهه ؟
ججربتي الححب ")
الخخيانهه ممتى مما بتسسامححي ففيها " )
ششو الفرقق بينن الححب و الاعجججاب ')
بسس ههدولل بباليي
وردهه

بعتذر عن التاخير بس ما حبيت افوت فرصة التعرف عليكي عن قرب
ونطرت الوقت اللي اكون فيه رايقة وبالي مرتاح

كتير اسمتعت بمتابعة اجوبتك
وفعلا انتي انسانة تستحقي كل تقدير واحترام
ح اسال بموضوعين ما حد اتطرق الهم وهم الروايات والحب
وبتمنى تكون اسئلتي خفيفة عليكي

كاتبتك المفضلة؟؟ وافضل رواية الها؟
اول رواية قرأتيها؟؟؟اخر رواية قرأتيها؟؟؟
رواية خلتك تبكي؟؟؟
بطلت رواية تمنيتي لو عايشة دورها وقصتها؟؟
اسماء 5 روايات عجبك عنوانها؟
رواية ندمتي انك قرأتيها؟


مرة كنت ادور عموضوع ل قسم النقاش ولفت نظري هالموضوع
مناقشة لكتاب نسيان....
هل علينا أن ننسى من أحببنا أم أن نبقيه كذكرى...؟
- ما مدى قدرتنا على نسيان من أحببنا...؟
- هل الرجال لديهم قدرة على النسيان أكثر من المرأة...؟
- ما مدى استعدادنا للهزات العاطفية قبل حدوثها...؟
- هل معظم ما نحن فيه كعرب من مشاكل وعراقيل هي لأننا عاطفيين...؟
- عندما نحب هل علينا أن نعطي كل شيء دفعة واحدة...؟
- " ويل لخلّ لم ير في خله عدواً "... ما مدى صحة قول أحلام مستغانمي...؟
- تقول السيدة أحلام " أين ذهب الرجال " فهل نحن الآن نفتقد إلى الرجال الحقيقيين في المجتمع...؟
- ما مدى استعدادكم لمساعدة أشخاص يعانون من أزمة ما والوقوف إلى جانبهم...؟
- الرجل لا ينسى امرأة أحبها إلا بحبه لامرأة أخرى... هل توافقون هذه المقولة...؟
- الألم هل هو قدر أم هو اختيار بإمكاننا إيجاده أو نبذه...؟
- الرجال هم أكثر خيانة وأكثر نكثاً لوعودهم أم المرأة...؟
- هل تحاولون الانتقام ممن غدركم في الحب...؟
- البعض يدخل في علاقة جديدة بعد الإخفاق في الحب... هل تؤيدونهم...؟
- تقول أحلام أنه على المرأة أن تحمل سلة من الأقنعة كي تتعامل مع الرجل الذي تحب لأنه هو يمتلك أقنعة أيضاً... فهل هذا صحيح...؟
- تشدد أحلام على أن أقوى سلاح يمتلكه الرجل هو الصمت وأن المرأة غير قادرة على تفسيره... فهل هكذا الرجال... وما سبب عدم فهم المرأة صمت الرجل...؟

أحبيه كما لم تحب إمرأة من قبل وأسيه كما ينسى الرجال؟؟؟؟مذا عن هذه العبارة التهمة؟؟؟

(((الحب هو النعمة التى تتوج بها الإنسانية )))
فما رايك فيمن يرى ما يحدث فى الدنيا الان؟ يشعر وكأننا فقدنا هذة النعمة ؟

عين المحب عمياء عن عيب المحبوب وأذنه
صماء عن قبيح ما يسمع فيه *
فهل الحب اعمى ؟...

(((لاتتزوج الا عن حب ولكن تاكد ان من تحب هوجدير بحبك *
فكيف يمكننا ان نتأكد من الحب؟

(((اذا اردت ان تحطم الحب ففكر فى الزواج*
فهل الزواج يقتل الحب؟

(((اذا تملك الانسان الحب تملكه الضعف*
فهل الحب ضعف؟

(((ان اكثر ما قيل عن الحب كلام فارغ*
فهل حقيقى ان الكلام فى الحب كلام فارغ؟

(((كما ان الانسان لايدوم فكذلك الحب*
فهل الزمن يقتل الحب؟

(((فى حرب الحب... الفرار انتصار*
فمتى يكون الفرار من الحب امرا لابد منه؟

(((الحب يولد من لاشىء ويموت بأى شىء*
فمتى يموت الحب؟

(((الحياة بدون حب مستحيلة وقد يخيل اليك انك تعيش بلا عواطف وانك لاتحب شيئا ولكنك تحب دون ان تدرى*
فكيف نحب دون ان ندرى؟

(((أن الذين يؤمنون بالحب يؤمنون بالحياه ويؤمنون بانفسهم*
فهل يستطيع الحب ان يدعم ثقه الانسان بنفسه وبمن حوله؟

(((ما الحب فى الدنيا الا حظوظ وقد يأتيك عفوا بعدما ظننت انه ابعد الاشياء منك*
فالى اى حد ينحكم الحظ فى الحب والزواج؟

مرححبا ككمانن ممرهه ��
أهلين ننوش مرات ومرات
ممككنن ككمم سسؤال
رايكك في الححب عنن طريق النتت ععامهه
والمنتتديياتت خخاصهه ؟
الاتنين نت مافي فرق بين موقع تواصل اجتماعي او منتدى المنتدى شكل من أشكال التواصل
وهالشعور مابحب اسميه حب ممكن اسميه مضيعة للوقت لأنه فاقد أهم أسس للحب هو الصدق والثقة
والمعايير اللي ممكن تكمل فيها قصة الحب دخولنا النت بهدف التسلية وتقضية وقت الفراغ او بهدف الثقافة والمعرفة
وملء الفراغ الداخلي اللي ممكن البعض يحس فيه او هروب من واقع الله وحده بيعلمه مقتنعة انتي ان في حدا هدفه على النت الحب ؟
ولو هيك بتقدري تثقي فيه ؟ ما بظن
لكن للإنصاف لو صار وفيه حدا حس بهيك شعور ووضحت الأمور واتعرفوا معرفة واقعية وشافوا بعض بالواقع ووضحت الأمور
واكتملت المعايير ورضيوا الأهل وظروفهم اتوافقت بيكون خير
ججربتي الححب ")
سؤال شخصي مابحب اجاوب عليه
الخخيانهه ممتى مما بتسسامححي ففيها " )
ابداً ما بسامح بالخيانة ولا بعطي فرصة تانية أبداً ومابقبل الاعتذار عنها بأي اسلوب أو شكل وإلا بكون غبية
وبكرر الخطأ وأنا مش هيك

ششو الفرقق بينن الححب و الاعجججاب ')
الحب شعور قوي بيسيطر عليكي بتحسيه تجاه شخص معين بتقبليه بكل صفاته بتتأثري جداً بس تشوفيه
بتتلبكي وتحسي بخجل لو اتحدثتي معه بتغاري عليه من أنفاسه بتحسي بدفا بس تسمعي صوته
بتشتاقي له لو غاب يمكن بتحسي بشوقك اله اثناء حديثكم وقبل لتبعدوا بيملاكي كلك ...
باختصار ما بتقدري تتجاهلي وجوده أبداً بحياتك
الاعجاب بيكون اعجاب بصفة او بصفات بالشخص متل اسلوبه وطريقته بالتفكير وصرامته باتخاذ القرارات نجاحه بحياته العملية
بتقدري تتحدثي معه وتطلعي بعيونه بدون خجل ما بتشتاقي له وتحسي بغيابه يعني عادي لو غاب
بسس ههدولل بباليي
وردهه


شرفتي ننوش
ووردة الك

عزيزتي @شهد الروح
ان شاء الله بجاوب
على اسئلتك بس مش هلأ
لأني لسه راجعة من جامعتي
واسئلتك بدها وقت
برتاح شوي وبرد اجاوبك
ومن هون لوقتها
أحلى وردة الك ولانتظارك

كتير اسمتعت بمتابعة اجوبتك
وفعلا انتي انسانة تستحقي كل تقدير واحترام
ح اسال بموضوعين ما حد اتطرق الهم وهم الروايات والحب
وبتمنى تكون اسئلتي خفيفة عليكي
ميرسي الك @شهد الروح على لطفك وكلامك
كاتبتك المفضلة؟؟ ؟؟ أحلام مستغانمي وغادة السمان وخولة حمدي ومحمد السالم
وافضل رواية الها؟ كل كتابتهم حلوة بس حبيت كتيرلأحلام ذاكرة الجسد ولغادة يا دمشق وداعاً ولخولة أين المفر ولمحمد السالم سلام الله على عينيكِ
اول رواية قرأتيها؟؟؟ مش ذاكرة أول رواية
اخر رواية قرأتيها؟؟؟ حزن الملائكة
رواية خلتك تبكي؟؟؟ أين المفر
بطلت رواية تمنيتي لو عايشة دورها وقصتها؟؟
كل رواية بعيشها بكل تفاصيلها وبعيش كل شخصية فيها بس أكتر حبيت سارة في سلام الله على عينيكِ
اسماء 5 روايات عجبك عنوانها؟ حزن الملائكة .. سلام الله على عينيكِ .. ذاكرة الجسد .. قاب عينين أو أدنى .. طوق الياسمين
رواية ندمتي انك قرأتيها؟ ماندمت على أي شيء قرأته
مرة كنت ادور عموضوع ل قسم النقاش ولفت نظري هالموضوع
مناقشة لكتاب نسيان....
ما قرأت كتاب نسيان كل اللي عرفه انه لأحلام مستغانمي لكن هجاوبك على الأسئلة من وجهة نظري
هل علينا أن ننسى من أحببنا أم أن نبقيه كذكرى...؟
ماحدا بيقدر ينسى حد مر بحياته ولا بيقدر ينسى نبض قلبه .. كلمة نسيان كلمة بنقولها علشان نخبي هزيمتنا وخذلاننا بحب عشناه أو متل الترياق
اللي بنستمد منه الشفا لنكفي حياتنا لكن هو بيكون ذكرى بكل تفاصيلة الحلوة والمؤلمة
- ما مدى قدرتنا على نسيان من أحببنا...؟
أنا مابعترف بكلمة نسيان حتى أقولك لأي مدى بنسى
لكن ممكن أقولك إني بخبي أي ذكرى جوايا للمدى اللي بقدر أعيش فيه وأواصل حياتي .
- هل الرجال لديهم قدرة على النسيان أكثر من المرأة...؟
المشاعر والأحاسيس واحدة الرجل متل المرأة بيحب ويتألم وينغدر لكن هو طبيعته ومسؤولياته بتلهيه وبتاخده لمحل تاني لكن ما بينسى ابداً
- ما مدى استعدادنا للهزات العاطفية قبل حدوثها...؟
الهزات العاطفية نوعين يا هزة بتخليني احب وهاي ما بيكون عندي استعداد الها لأن الحب ماله موعد ولا مقدمات يا هزة بتخليني أبكي والاستعداد هون بيكون من أجل الهزات العاطفية التالية يعني ممكن تقولي ان الاستعداد بيصيب اللي اتجرح من قبل واتألم
لهيك بيكون على حذر وفي حالة قلق مستمر وخوف
لكن مع المشاعر الأولى وسير الحب في مساره الصحيح بيكون مافي خوف ولا استعداد ولا انتظار للغدر علشان هيك لو اجت الهزة بتكون صعبة
- هل معظم ما نحن فيه كعرب من مشاكل وعراقيل هي لأننا عاطفيين...؟
العرب عاطفيين بس قدام المسلسلات والأفلام والأخبار الحزينة ووقتها بيتعاطفوا تعاطف لحظي وبعد هيك كل واحد بيسكر بابه على احزانه ومشاكله وبيتعاطف مع نفسه وفيكي تقولي كل يغني على ليلاه وفيكي تقولي علينا كعرب عرابين في الهبل والعبط والتابعية لكن مشاكل عروبتنا يلزمها قوة وذكاء ووحدة و غيرة على الدين والأرض والعرض لكن احنا آخرنا نغار من بعض .
- عندما نحب هل علينا أن نعطي كل شيء دفعة واحدة...؟
العطاء على قدر الموقف وقدر الحاجة مابيصير اعطي عطاء بلا حدود ومابلاقي اللي بحبه بيبادلني نفس العطاء بيصير الموضوع انانية واستغلال
- " ويل لخلّ لم ير في خله عدواً "... ما مدى صحة قول أحلام مستغانمي...؟
أكيد قالتها عن تجربة ونتيجة لعصارة مواقف هي شافتها وأنا موافقة على رأيها لأن أقرب الناس الك هو اللي بيعرف نقاط ضعفك وحزنك وبيعرف من وين يجرحك ويطعنك ويستغلك لكن مش معنى هيك اني اسيء الظن وأتعامل على هالأساس لازم الحذر بس .
- تقول السيدة أحلام " أين ذهب الرجال " فهل نحن الآن نفتقد إلى الرجال الحقيقيين في المجتمع...؟
أنا ما قرأت كتاب نسيان بس ما بعتقد إن الست أحلام تقصد فيه تعميم مقولتها أكيد هي بتقصد نوعية معينة من الرجال
لكن بحكم قراءتي لبعض روايتها بالفعل معاييرالرجولة اختلفت عن الزمن اللي كتبت عنه لكن للإنصاف ما انعدمت الرجولة بمجتمعنا وان شاء الله ما تنعدم أبداً .
- ما مدى استعدادكم لمساعدة أشخاص يعانون من أزمة ما والوقوف إلى جانبهم...؟
أكيد ما بقصر معهم طالما طبيعة علاقتي فيهم بتسمحلي بالمساعدة ولأني بعرف إن وقت الأزمات بيكون صعب كتير وكل لحظة فيه بتمر وكأنها عمر
- الرجل لا ينسى امرأة أحبها إلا بحبه لامرأة أخرى... هل توافقون هذه المقولة...؟
رجل .. مرأة مافي شيء اسمه نسيان فيه تجاهل لمرحلة مرت بالحياة وتجاهل لذكرى حب عشناه ولهو بحياة جديدة وشخص جديد وظروف جديدة
- الألم هل هو قدر أم هو اختيار بإمكاننا إيجاده أو نبذه...؟
يمكن يكون قدر ببدايته لكن بعد هيك بيكون اختيارنا وما بنكر إن الألم له شعور وسحر ما بيتقاوموا لو كانوا بسبب انسان حبيتيه حب صادق وعشتي معه ذكريات وتفاصيل صادقة وفيه نوع اختياري من أنواع الألم لما بتكوني عارفه ان الحب محكوم عليه بالفشل وانتي مصممة على انك تكفي وتعذبي مشاعرك وقلبك عالفاضي .
- الرجال هم أكثر خيانة وأكثر نكثاً لوعودهم أم المرأة...؟ للإنصاف أنا بشوف الاتنين متساويين بالخيانة
- هل تحاولون الانتقام ممن غدركم في الحب...؟
أنا أرقى من اني استخدم اسلوب الانتقام لأني بشوفه تقليل من شأني ومن مشاعري اللي كانت ملكه بيوم من الأيام .. انسحابي من حياته أفضل وأميز عندي لأني مابقدر اتجاهل حبي اله ولا بقدر أنزل لمستوى الانتقام .
- البعض يدخل في علاقة جديدة بعد الإخفاق في الحب... هل تؤيدونهم...؟
مش غلط بس المهم مايسعى للحب ويعطي نفسه فرصة انه يستعيد نفسه ويعيد ترتيب نفسه ويعرف اخطاؤه وما يكررها .
- تقول أحلام أنه على المرأة أن تحمل سلة من الأقنعة كي تتعامل مع الرجل الذي تحب لأنه هو يمتلك أقنعة أيضاً... فهل هذا صحيح...؟
طالما فيه حب وعلاقة قوية فأنا بوافقها بلبس الأقنعة للتغيير والتجديد بعلاقتهم لكن أقنعة التزييف والكذب والأنانية والشك والامتلاك اللي بيخليه يشعر إنه بسجن فأنا ضدها
- تشدد أحلام على أن أقوى سلاح يمتلكه الرجل هو الصمت وأن المرأة غير قادرة على تفسيره... فهل هكذا الرجال... وما سبب عدم فهم المرأة صمت الرجل...؟
لو حبهم لبعض كان قوي ومبني على اساس من التفاهم أكيد هتقدر تفهم صمته وانه ممكن يكون نتيجة لمعاناته من شيء أو ممكن من جرحه منها أو اشتياق الها وهو زعلان منها أوغضب أو عقاب ... غير هيك لو ما قدرت تفسر صمته بتكون ما حبته بعمق ولا فهمته صح
أحبيه كما لم تحب إمرأة من قبل وأسيه كما ينسى الرجال؟؟؟؟مذا عن هذه العبارة التهمة؟؟؟
برد احكيلك مابعترف بالنسيان بالحب وضد التحامل على الرجل ونعته بإنه بينسى وبيقدر يعيش ..
متل ما جاوبتك طبيعته كرجل وطبيعة مسؤولياته بتلهيه وبتشغله لكن ما بينسى أبداً .

شرفتي وان شاء الله برجع اكفي جواباتي
على الجزء التاني من اسئلتك