من متى انت عنا هون؟
24/6/2016
♥ كم نسبة رضاك عن المنتدى بشكل عام؟
مفش اشي مثالي بالحياة، مهما كان الاشي،
وعلى هالأساس رح احط 50 بالميه،
ورح اعتبر الخمسين الثانيه هي طريق للمثالية يللي هو اشي مستحيل يوصلو الإنسان.
يعني المنتدى مستحيل يوصل ميه بالميه، إلا ما يكون سلبيات بس ع الاقل نتذكر الايجابيات، يللي هني بالخمسين الاولى.
♥ بتتمنى يكون فى تغيير لستايل المنتدى وتنحط لاله اى اضافات مش موجودة ، واذا فى اضافات عندك شو هيه ؟
الزهري حلو، بس بفضل يكون الوان ثاني، الوان هاديه اكثر.
اخضر زيتي ع سبيل المثال.
وصار وقت تغيروه، اعملولنا اشي جديد خلي نفسنا تفتح للمنتدى اكثر،
والتغيير مش عاطب كل فترة، بالعكس كتير ايجابي.
وبتمنى يصير في موسيقى ع الاقل فالمدونات مثل ما كان من قبل.
♥ تقسيمة المنتدى بأفرعها محتاجة تعديل او إعادة تسمية برايك؟
*الشعر والشعراء وهمس الخواطر ينحطوا بقسم واحد،
لإنه مش شايفه فرق كبير بيناتون،
وع كل حال إذا كان قسم الشعر والشعراء هو بالفعل قسم خاص بالشعراء العرب، معناتو اقل ما فيها إنه كل عضو لمن بينزل شعر معين او قصيدة بهالقسم، المفروض يكتب اسم الشاعر، هذا اقل اشي لازم يعمله تا ما يروّحش هيبة القسم ويصير مثلو مثل قسم همس الخواطر.
مع إني بالمره بفوتش ع هالقسمين بس مش غلط ابدي رأيي،
*قسم عدسة الاعضاء يكون موجود بقسم الصور، بما إنه هون صور وهون صور، يبقى تنيناتون ينحطوا بقسم واحد.
*عالم التقنية، يكون موجود مع اقسام البلفون والكمبيوتر والبرامج، بما إنه أربعتون عن التكنولوجيا والتطور.
*الاعضاء يللي عم بنعملون حظر، لازم ينمحوا نهائيا لإنون بيبشعوا المنتدى !!
بس اشوف عضو محظور بعرفش كيف بحس،
ممنوع يبينوا بالمره، لا بقسم الاعضاء المتواجدين فهاليوم ولا بقسم اللي تواجدوا خلال 24 سيعه ولا بقائمة الاعضاء الجدد،
خلي الواحد وهو فايت تفتح نفسه للمنتدى،
وإذا ما فيكوا تمحوهن نهائيا، اقل ما فيها تقيموا اسمون قدام العلن.
♥ صار من قبل واجهت مشكلة مع مشرف أو الإدارة ، وشو السبب ؟
ولا مره، الحمد لله.
♥ قرارات الإدارة بتشوفها...(تعسفية غير قابلة للنقاش _ مرنة )؟
في كتير قرارات غير قابلة للنقاش لإنه يللي براسون براسون،
يعني ببتوا كلمتون بت. الاشي منيح، بس قديش كمان مش منيح؟ بعرفش.
بشكل عام معنديش فكرة عن هاي القرارات كثير، غير يللي بحطوهن فالتنبيهات فوق يعني مواضيع ضروري نقراها.
يللي بكونوا جزء من الادارة، هني أدرى، يعني الطاقم بعرف اكثر مني اللي ملونين ازرق او اي الوان ثانيه مش تبعون اداره.
♥ شي بتتمنى وجوده بالمنتدى.
قسم للموسيقى.
♥ كيف برأيك الإدارة تقدر الأعضاء وجهودهم؟
اه بتقدّر، لمن كل اسبوع او كل اسبوعين بعرفش قديش المده بالزبط، عم يكون في نجم الاسبوع، يمكن هو نفسه نجم المنتدى باللون الاصفر.
وسبق وقريت رد لحنين الروح قالت فيو عن مؤمن إنه كثير بيعلي من تقييمات الاعضاء كتبتو بموضوع نسيت اسمه بقسم التهاني والترحيب، بعرفش ع مين كانت عم ترد، طريقة مؤمن هذا كمان نوع من التقدير،
وهذا غير التكريمات، افضل رد للنقاش، والحضور الملكي وجوائز المسابقات،
شو احسن من هذا كله؟ برافو والله يعطيون العافي.
♥ أفضل قسم عندك؟
النقاش.
♥ بس تفوت المنتدى شو بلفت نظرك أكتر(العنوان /كاتب الموضوع)؟
المضمون وبس.
بحياتي مهتميتش لصاحب الموضوع،
اما العناوين فا مش كل عنوان ممكن يعكس المضمون مرات العناوين بكون فيها اشي غلط ومش ملايمه،
لهيك ولا مره بحكم ع الموضوع من العنوان،
وتا اقدر اترك تعليق بأي موضوع لازم ع الاقل افوت واقرا المضمون تبعو.
♥ أبيض x أسود:
- نقطتين بتميز فيها المنتدى وعاجبينك: اللايكات والمسابقات المنوعه.
- نقطتين ..مش عاجبينك ومزعوج منهم : مزعوجه كلمة شوي ثقيله، اما مش عاجبيني بتضلها مختلفة عن مزعوجه، لإنها اخف،
ممكن لمن كان مسموح بالاول موسيقى وبعدين بطل، الاشي معجبنيش كيف التغى، بس مش لدرجه مزعج.
والاشي الثاني، الاعضاء يللي عم تنحضر مش لازم يبينوا بالمره.
♥ معك 3 قرارات
الأولى / عضو يستحق ترقيةة
هذا السؤال موجه اكثر للي بفوتوا كل يوم، بس رح اجاوب ع حسب رأيي، ممكن قصي او نقاء، لإنه رحت اتفرجت ع كل الاعضاء قبل ما اجاوب ع هالسؤال ولقيت اغلب اللي بتواجدوا الوان مش زرقه يعني معطينون ترقيه، تا انتبهت لنقاء وقصي، هذول دايما بشاركوا بس لونون ازرق، فا برأيي بستحقوا بناءا ع نشاطون يللي كنت الاحظه، بعرفش اذا هالايام خف نشاطون او لاء.
الثانية / عضو ( من الطاقم الاشرافى سواء اشراف ، رقابة اقسام / رقابة عامة )
يستحق ترقية، رحت افحص مين هني بالزبط، وبعد ما فكرت شوي، لقيت كل واحد فيون موجود بمطرحه المناسب، ما تغيروهن كل واحد بمحلو المناسب، لإنه إذا غيرتوهن يمكن احتمال يكون الاشي مبالغة، ما بعرف، مجرد وجهة نظر.
يستحق اعفاء، هاي بدها متابعه يوميا اقل اشي، وانا مش كل يوم بفوت.
الثالثة /عضو ( الطاقم الاداري )
يستحق كلمة شكر، مؤمن وهل كان حبا، شكرا إلون من القلب والله يعطيون العافي، مظنش في اشي احلى من هالكلمتين.
يستحق اعفاء، اكيد محدا منون.
♥ هل سبق مرة فتت تفاجأت بموضوع معين وترك أثر عندك سواء جيد او سيء ؟
نعم، بس مش عارفي احدد كيف ووين شفته فأي موضوع بالزبط.
♥ تغير شي من شخصيتك من وقت سجلت بالمنتدى.
تغير بس مش من هون،
من المنتدى الاول يللي قبل هذا،
المهم في كلمة منتدى بالموضوع،
لولا المنتدى الاول كنت انا مش هون حاليا.
صار عندي خبرة بأشياء كتير،
وصرت اتقن فن الردود، والفضل مش بس لعالم المنتديات،
الفضل برجع برضو لقراية روايات، لإني كتير بقرا فالبيت، والفضل كمان لتجاربي الشخصية بالحياة،
كل هذا طلّع مني شخصية ذكية.
♥ اعطي لنفسك كعضو تقييم من % .
مش انا اللي بقييم نفسي.
♥ بتشوف انو الادارة بتاخد اقتراحتنا على محمل الجد؟
معنديش فكرة عن اقتراحات الاعضاء يللي بعرضوها ع الاداره.
♥ حسيت مرة انو بدك تترك المنتدى ، وليش؟
ولا مره ولا رح يجي هاليوم ! يعني ليه ومنشان شو مثلا؟
مش محرزة ولو؟
بدي اصير افوت وانا متزوجه كمان فالمستقبل.
♥ رأيكك بطاقم المنتدى من حيث الحضور والمشاركة والاهتمام بالمنتدى بشكل عام :
لازم اكون متابعيتون منيح، بس ع كل حال رح اجاوب حسب ما بعرف.
مؤمن : بحبه لمن يسأل عن الغايب، من ناحية مشاركات معنديش فكرة، بس مثل ما انا بعرف هو بحب الاخبار، أسلوبه فالردود دايما بسيط فالحكي والاشي نابع من التواضع، مؤمن كتير متواضع.
هل كان حبا : بحبه لمن يشارك واكثر اشي بقسم الالعاب، بعطيك شعور حلو وقت تكون عم تلعب معه، اسلوبه جدي فالمشاركات، بحب فيه انه بيوخد وبيعطي بغض النظر عن شو الموضوع.
barbie : روح المنتدى، المنتدى بلا روح بذبل، هي الاكشن وهي اللي عاملي جو وهي اللي بتفرفح قلوب الكل بمواضيعها وبأفكارها وبأسلوبها اللي محدا بشبهو، دايما نشيطة وبتشارك فكل الاقسام، وبتحب التغيير عشان هيك كل فتره بتخلق فكرة جديدة.
حنين الروح : بحب اقرالها ردود فالنقاشات، نشيطة لمن بدا تفوت بتشارك فأغلب المواضيع، وهي من النوع اللي باخد وبعطي واكثر.
هدوءء : نبض، بحب قوة شخصيتها، هي الوحيدة اللي قد ما قل نشاطها، مستحيل اجي واقول عنها كسوله، لأجل نشاطها كيف كان، لإنه بهالحاله منكون مثل كأنو مش عم نقدرها. بس ترجع تشارك بتصير نشيطه وبتشارك فأغلب المواضيع مثلها مثل حنين الروح.
الصياد : اكثر عضو بحب شخصيته من الشباب، يمكن هو مش نشيط دايم، بس بالنسبه إلي بيكفي اقرأ ردوده، لإنه مستحيل يطلع برات مضمون الموضوع، وبعطي الموضوع حقه بالرد المناسب وكثير عضو فهمان وكثير هادي وذوق وبحسه روحاني وصبور اكثر ما منتصور.
خمر أيلول: هي كمان من الاعضاء النشيطين، بحب اقرالها اسئله واجوبة بنفس الوقت بقسم النقاش لإني بحسها جديه وصارمة بنفس الوقت وشخصية كثير واعية بأمور الحياة، يعني سيعة الجد بلاقيها واقعيه.
ندى الورد: نشيطة دايما وبحسها بتحب المنتدى كتير، عضوة مرحه كثير مع اني بعرفش عنها اشي تقريبا، بس بلاحظ روحها الحلوه ونشاطها مرافقينا بكل مشاركاتها فالمنتدى والاشي كتير حلو.
أنثى الياسمين : رومنسية كثير وهذا اكثر اشي بحبه فيها يمكن هي مش كل يوم بتتواجد بس لمن بتشارك بتكون نشيطة تقريبا فأغلب الاقسام بالمنتدى وانا شخصيا كتير بحب شخصيتا، بحسها كلها رقة وانوثة والاشي ببين من ردودها، وهي الصبية الوحيده يللي هيك.
نور الروح : الصراحه بعرفهاش، بس بلاحظ نشاطها، يمكن مش كل يوم بس بشملها مع الاعضاء النشيطين بشكل عام، وبحب فيها لمن اتتابع مدونتي، كتير ببسطني الاشي، بالنسبة لأسلوبها ولا مره انتبهتلو الصراحة.
خالد: جدي خالد، كثير آدمي، هو مش كل يوم بتواجد فالمنتدى، بس بحس بحب يعطي من وقته للمنتدى، بحب يترك مشاركات ع مواضيع معينه، وانا شخصيا بحترمه كتير لأجل الأدمنه.
حاولت اكتب الصراحه عن الاعضاء، بدون مبالغة او مجامله،
ومقدرتش اكثر من هيك لانه انا مش كل يوم موجوده فالمنتدى.
اللي بتواجدوا كل يوم هني بعرفوكوا اكثر مني ومتابعينكوا اكثر مني،
الله يسعد الكل، وان شاء الله تضلوا تعطوا ومحدا بيخيب امل حدا ان شاء الله.
وشكرا مره ثاني لخمر ايلول لإنه للمره الثاني بتعملي منشن وإنها حابه تشوف رأيي مثل الموضوع يللي كان قبل هذا بقسم متنفس الاعضاء،
كتير بسطتيني وقتها واليوم كمان،
وجاوبت ع كل الاسئله بكل صراحه ع قد ما بقدر،
الله يعطيكي العافي.