#أخبار_عالريق 251 ✅يكتبها/سعيد الطويل

#أخبار_عالريق 251
✅يكتبها/سعيد الطويل
■طول النهار والليل ،الشباب بيجننوا باليهود وبيولعوا بلاللين وبيطيروهم عالغلاف وغانتس بيهدد انه مش حيسكت.
■الناس بغزة سهرت زي عادتها تستنى الرد والبيان ، طلع فش أهمل من هيك رد وبيان ونمنا بدري من الشوب .
■توفى شب مغترب من غزة اسمه فراس المصري بعد ما غرق ببحيرة ببلجيكا.
■حالتين وفاة جداد ببيت لحم والخليل من الكوورنا وبهيك ارتفع عدد الوفيات لفوق ال100حالة.
■3حالات كورونا جديدة بغزة بس كلهم جوا الحجر.
■احتمال اليوم يعلنوا بشكل رسمي عن مواعيد فتح المعبر والترتيبات الجديدة.
■حولوا سجن أصداء الكبير لمركز حجر صحي.
■جهزوا كونتينرات حديد وحطوا فيها مكيفات عشان المحجورين الجداد.
■بيقلك تكلفة فحوصات الكورونا باليوم الواحد بالضفة قريب النص مليون شيكل.
■محمد عساف خطب وقرا فاتحته مبارح ،حسب ما كتبت سمر مليون منشور عن الموضوع.
■خدمات البريج صار بطل كرة السلة لهذه السنة.
■نازل عنب بيروتي بالبلد الكيلو ب8شيكل مش عارف الزلمة بينكش عليا ولا صح الكلام ،بس حبته قد السنطروزة.
■اليهود أعلنوا بشكل رسمي انهم اعتقلوا عبد الله الدغمة من رفح وناشط في فتح عشانه شارك بقتل جنديين في سنة 2010،الك الشرف والله.
■قبل شوية خبطوا كم صاروخ تجريبي من عنا عالبحر .
■الشوب والرطوبة يا معلم بيزيدوا ما بينقصوش والأرصاد شكلها صايرة أخبارها مضروبة.
■عشر حوادث سير من مبارح لليوم بقطاع غزة ،وسبع اصابات نقلوهم عالمستشفى .
■خالتي أم حسن بتقول انه الأمور زي كل مرة مش حيصير لا تصعيد ولا حاجة ،كلها كم يوم بتروق وبيرجعوا يحكوا بمهرجان العيد .

#صباح_الخير للقرفانين والزهقانين والشوبانين والمفلسين والمزنوقين والمخنوقين والمتجوزين والممرمطين والمقهورين والمبهدلين والناصحين والعيانين والمحبوسين والمحجورين والطفرانين واللي عليهم ديون واللي مقطوعة عليهم الكهرب واللي بيستنوا بدور المية واللي النت عندهم بطاقة أم الشيكل.

#يسعد_صباحكم_يا_جماعة_الخير 🌹

يعطيك العافيه على النقل والمتابعه