أنت مش لوحدك ولا عمرك هتكون

المرحلة اللي بتمر عليك دي انت متخيل انها أسوأ مرحلة ف حياتك وان عمرك ما هتخرج منها ، يمكن لأول مرة بتشوف نفسك ضعيف وروحك مشروخة بالشكل ده ، نفسك من كتر ما هي صعبانة عليك بقيت وكأنك مش متحمل تشوفك ، مش قادر تواجه جواك

مرحلة صعبة .. حسّاسة !!

بتتبدل فيها أدوار ناس ياما

أقرب حد ليك بيكون أكتر واحد بعيد عنك

وأكتر حد كنت بعيد عنه بتكتشف إنه أكتر حد واقف جنبك

واللي انت وقفت جنبهم ياما باعوك ، واشتراك حد لسه داخل جديد ف حياتك بس قدر أنه يلونها ..

اللي حوالينا بيرهقونا اه ، بس احنا بنُرهق نفسنا أكتر منهم ، لأننا باختصار مبنقدرش نتشطر عليهم ف بنتشطر على نفسنا وهاتك يا جلد !!

روحنا اتهلكت ، منعنا عنها كل وسائل التنفس .. قلبك لسه بيقسي عليك بحنيته على اكتر حد استهلكك فأهلكك .....

المرحلة دي هتعدي والله هتعدي ، زي ماعدت مراحل قبلها وزى ماغيرك خرجوا من مراحل أصعب منها ، الفرق بين دي ومراحلك اللي فاتت ان طريق الخروج صعب ومؤلم آه، بس والله هتخرج أقوى وهتتفاجئ من قوتك

إدي لنفسك مساحة انها تحزن .. صرّخ عشان تخرّج اللي جواك ، خليك أناني لفترة وفكر ف نفسك وبس عشان تقدر تقوم ، ولو فاكر انك ف المرحلة دي هتقدر تدي لنفسك ولغيرك يبقى بتحلم ، لأنك هتأذي نفسك أكتر وهتحملها فوق طاقتها وبسسس ، لازم ترجعها ليك الأول عشان تقدر تدي لغيرك من تاني

كفايااااا اوي اللي فات وركز ف اللي جاي

والله انت أقوى وهما أجبن منك ، هما هربوا وأنت واجهت ... وأحسن رد ترد بيه عليهم هو انك ترجّع قوتك الحقيقة بإنك تثبتلهم فشلهم ف أنهم يكسروك !!

واغسل ايديك بقا

ربنا جنبك وهيبعتلك اللي يساندك ، أنت مش لوحدك ولا عمرك هتكون .. فإني قريب صدق الله العظيم ..!"