كبرت صغيرةة أبوهآ 😭

بكتني 😢😢

كِبرت بِنتي ؛

لما تجوّزت أمها ، قلّي حَماي : " حُط بنتي بعيونك ، هاي مدلِّلة اصبر عليها ، هاي حسّاسة لاطفها ، هاي روحي من جوّا دير بالك عليها " .

حبّيتها لإم ولادي ، مرقت علينا ايام حلوة وأيام عاطلة ، زعلتها قهرتها نزلتلها دموعها ، كل ما ازعلها تزعّقلي " بدي اروح ع دار ابوي " ، وأتعصبَن ! أُقعدي ساكتة يَ مرا إنتي ملكش الا دارك !

بعد سنين زواج وبلّشنا شوي شوي " نزهق " الروتين الي عشناه ، مشاكلنا زادت ، تفشّشنا ببعض كثير ، بس كلمة ابو مرتي بترن بذاني رن ، وأسكت واصبر ، واحتويها من جديد.

اجت بنتي ، اجت يلّي قلبت الدار فوقاني تحتاني ، اجت يلّي زيّنت الدار بضحكتها وعياطها ، اجت يلي ردّتلنا الروح بهالبيت ، أجت دلّوعة أبوها .

دلّعتها لبنتي ، شو بدك يابا انا حاضر ، شو بتطلبي روحي بعطيكي ياها ، الغيّورة أمها كانت تقلّي " دلّلني زيها " واضحك من شقاوتها وغيرتها من بنتها ، شفت حالي بعيونهن البطل القوي الحنون .

كِبرت صغيرة أبوها ، وكل ما ارجع من الشغل تعبان اشوفها بتستناني بسؤال " وشو جبتلي اليوم ؟ " ، احضنها وأنسى ابو التعب والهم .
كبرت صغيرة أبوها ، وبطّلت تركض عندي بكتاب العبراني اشرحلها الكلمات ، بطّلت تناديني ع غرفتها اقرالها القصّة قبل النوم ، بطّلت تتمدّد بحضني وتغفى واحنا نحضر فيلم !
كبرت صغيرة أبوها ، صارت بدها مصروف من حالها تشتري شوكلاطاتها ، وبطلت تعجبها البوظة الي كنت اجيبلها ياها بصغرها !
كبرت صغيرة أبوها ، صارت بس تزهق تطلع مع صاحباتها وبطّلت تعجبها طلعاتي المتواضعة معها بالسيارة !

بتذكر مرة ، أخدتها عَ مدينة الملاهي ، ومن خوفي عليها منعتها تركب القطار الي بتشقلب بالسما الا اذا طلعت انا معها ، ومع اني معي ضغط وممنوع اركب ، ركبت حدها وابسطتها !
اليوم صار بدها سيارة تروح وتيجي فيها لحالها ! بطلت بنتي تفهم اني بخاف عليها ، بطلت بنتي تطلبني اوديها واجيبها ! صارت بنتي تبرر كل طلباتها " يابا انا كبرت وصرت مسؤولة عن حالي "

كِبرت بنتي ، وأجوها عرسان !
بس انا ما شبعت منها ، بعد اول عريس تقدملها ، ومجرد التفكير بالفكرة خلاني اضعف ، زرتها بغرفتها بالليل ، مسحت ع شعراتها وعيّطت ، بنتي الغالية كبرت ، وانا بعدني بشوفها صغيرة .
" البنت صارت كبيرة يا ابو محمد ، ولازم تشوف حياتها " خواتي وأمها حاولوا يضغطوا علي بعد ما حاولت اخليها عندي اكثر وقت واتحجج بتعليمها ، قرّرت انو افتحلها المجال .
وافقت بنتي ، وكبرت بنتي ، وصارت تشكي وجعها لشاب ثاني ، صار هو ان زعّلها تسوّد الدنيا بوجهها واشوفها عبوسة وتكشّر الدنيا بوجهي .
بطّلت اضحّك بنتي بكلمتين ، صارت تستشيره اله بغراض الدار ، صارت تسهر معه بالليالي ومعادتش تحضر الأفلام معي .

كبرت بنتي وبدها تتجوّز !
وقلبي عَ بنتي بوجعني ..
اول ليلة الها مع جوزها ، نمتها ع تختها .
اتخيلها مع إنسان ثاني وعيلة جديدة وحياة جديدة ، ويوجعني قلبي خايف عليها .
اشتقت لصوتها من بعيد تقول " يابااا " اشتقت لضحكتها الي مالية الدار ! اشتقت لما كانت تركض ع حضني تشتكيلي من اخوها يلي ضربها

كبرت بنتي
واشتقتلها لبنتي .
تذكرت كلمات ابو مرتي لما أخدت بنته ، وفهمت دموعه ، وفهمت انه بنته ، ام ولادي انا ، هدية غالية من رب السما الي ، وأمانة عظيمة برقبتي ! وأنها عاشت صغيرة بحضن أبوها وبحضني عاشت امرأة مسؤولة ، عظيمة مرتي ، تركت بيت أبوها واجت لعندي ، يحرم علي الله الهنا ان ما وفّيتها حقها !

ولانها بنت مرتي ، قطعة من روحي.
😢😢😢

وبكتني كمان

من اروع القصص والكلام كله صح

الواحد مابيشعر بغلاوة زوجته الا لما ربنا يرزقه ببنت ويحس بنفس احساس اب مرته

يسسعدك ع الطرح الرائع

مع اني مو متزوجة وبابا الحمد لله موجود ...بس بكيت ما بعرف ليه ...عنجد الي كتبها كتير خرافي

يحرم علي الله الهنا ان ما وفّيتها حقها

هذا هو الزوج
عجبتني القصه
شكراً لالك

قديش كلامه مؤثر

يسعدك حياة

بكاني حكيه والله
كلام مؤثر جدا

مشكورة حياة علي الطرح الجميل
عوافي

ممففي بععد الآب لو كانن ججنهه زوجههآ !!
ححكي ففآضضي و ههبل ')
نششالهه ضضل ععند بآبـآ و مآ اتججوز ففي ععمري كككلوـو ')
قصصهه ممؤثثرهه $_$ !
يسسلمو ععسولهه ')
وردهه