السبت 28-8-2021

#أخبار_عالريق 546 يوم
✅يكتبها /سعيد الطويل

الله يصبحكم بالخير والسعادة ويجعل هالأسبوع أحلا من كل الأيام إللي فاتوا ..

■أعلنوا مبارح بالليل عن استشهاد طفل عمره يادوب "14سنة" اسمه عمر حسن أبو النيل متأثر بإصابته اللي تصاوبها الأسبوع إللي فات عالحدود.
■اليوم حيرجع يشتغل الار باك الليلي من أول وجديد شرق غزة وربك يستر.
■الشعبية و7 ما س مع بعض فازوا بالرئاسة وفتح فازت ب11 مقعد من أصل 15 بالانتخابات تبعت المهندسين بالضفة.
■هنية ومشعل استقبلوهم مبارح بالأردن بأحلا استقبال بجنازة المرحوم غوشة .
■أبو مازن اتصل بمشعل عشان يعزيه بصاحبه ابراهيم غوشة.
■مناشدات طالعة نازلة من الأم أنهار الديك الأ سيرة عند اليهو د بالسجن ،عشان يسمحوا إلها تولد برة السجن بس لسة مش راضيين .
■مبارح قلطنا الألف حالة كور ونا جديدة بغزة.
■وقدهم إلا شوية كمان بالضفة وفي كمان 8 الله يرحمهم.
■فوق ال30 ألف نفر اتطعم بالتلت تيام إللي فاتوا بغزة.
■العشر الأوائل بالتطعيم كسبوها وقدحوا كل واحد 200 دولار ،ومبروك لأم أحمد البركة،وجه كنتكم الجديدة عليكم حلو يا حجة .
■ست من غزة وهي شغالة بالمطبخ فقعت فيها طنجرة الضغط ووضعها الحمد لله أحسن وهيها بالمستشفى .. سلامتها..
■توفى مبارح 3 بنات من طولكرم بحادث سير صعب عالآخر بالأردن.
■اسرائيل بدها تعطي قرض للسلطة ب800 مليون دولار ،تسلك فيها أمورهم.
■تقريبا 100 اصابة إلا شوية صغيرة برصاص ومطاط الاحتلا ل بعدة مناطق بالضفة.
■الأمور بأفغانستان مش تمام وداعش مصعدة عالآخر وبايدن بيهدد.
■بلدية رفح من الأسبوع الجاي مش حتخلي ولا واحد يبسط بسوق السبت إلا لما يتطعم.
■رونالدو تعاقد يا كبير مع مانشستر يونايتد وساب يوفنتوس ،، أرزقله .
■الدولار نازل والبندورة لسة غالية والمانجا تبعت العصير الرطل بخمسة شيكل .

#صباح_الخير ‏لكُل حاجة حلوة بتفتح النفس، صباح الخير لكل حدا بيكون سبب بضحكة غيره
#صباح_الخير لكل حد بيحب بصدق وبيخاف عالناس إللي بيحبها
#صباح_الخير لكل حد ماسك ومقرقط في ايدين اللي محتاجيته ومش مستعد يفلتها، #صباح_الخير للناس الثقة إللي مستعدة تبيع البدري والوخري عشان تسعد الناس إللي بحبوها ...ياشيخ الله يكثر منهم هدول..
# 🌹🙏
السبت 28-8-2021

يعطيك العافيه ع نقل الأخبار
والمتابعة الجيدة
ربي يسعدك أخي

مشكور للمتابعة
كل التحية لك
وكن بخير

يعطيك العافية لادراجك

الله يعطيك العافية
على هلاخبار
وننتظر جديدك

كل الشكر والتقدير

يسسلموو أممير
وردهة

متابعه جميله
شكرا الك

السلام عليكم ورحمة الله وبركاته



يسلمووووا ع النشرة الاخبارية المنوعة والمتابعة



يعطيك الف عافية



بانتظار جديدك دائما







تحيتي