فراق الخل ي ناصر عظيم ولاقدرت اقواه

فراق الخل ي ناصر عظيم ولاقدرت اقواه
وصوتك هيّض همومن ورى الاضلاع مخفيها

اون من الشقا وانعى وليفٍ غرّب بمسراه
فقدته والفقد ماهو مثل ازمه واعديها

رحل عن دنيتي غالي وعزيزاً هزني فرقاه
يمر ذكره مع الفرقا وانا ما طيق طاريها

جروح البعد ماترحم تحد القلب لين اقصاه
وتحد الروح لو تسلى وترجعها لماضيها


يقطّع بي وريداً ماقدر يصبر على ذكراه
فقيد القلب وينه عن عيوني لا يخليها

فراقه اه يا فراقه ياويل القلب من طرياه
عسى الله يقطع الذكرى الحزينه مع لياليها

ياكبر الضيق لامنّي تذكرت الغلا وياه
تجي في صدري الضيقه من اولها لتاليها

عضيد الروح راح ولا ترك غير الشعر ينعاه
تظلّم بعده الدنيا وكل الهم كاسيها

سند كل المشاعر ما خلق عندي بشر يسواه
رحل من كان ف الدنيا مجملها ومحليها

يقولون العرب دايم يغني ذا على ليلاه
وانا غنت بي جروحٍ عطيبه من يدوايها

ياقل الناس من بعده وياكثر الشقا والاه
صحيح الدنيا ما تسوى ليا من غاب غاليها

اشوف ان المكان اللي جمعنا ذابل بلياه
ولا عادت حياته له ولا شفت الفرح فيها