#الله_يسعد_صباحكم 🌸 الخميس 10/12/2020

#أخبار_عالريق 358
✅يكتبها/سعيد الطويل
■اليوم حتكون البلد شبه يوم "الفجعة" دبروا حالكم واشتروا أغراضكم من بدري لأنه اليوم بعد العشا البلد حتسكر ليوم الأحد الصبح،والله يحفظكم من كل سوء .
■توفى من الكورونا شب صغير بيدرس سنة أخيرة طب بغزة اسمه محمد منير نبهان من جباليا .
■توفى كمان واحد يا دوب عمره بالتلاتينات اسمه أحمد محمود وهو مصري الجنسية بس ساكن بخانيونس.
■في كمان 3 حالات كبار بالعمر توفوا من الكوورنا مبارح . ربنا يرحمهم جميعا.
■الصحة العالمية بتقول بنتوقعش انه يدخل لقاح الكورونا لغزة قبل ست تشهر.
■اليوم حيعلنوا عن 586 اصابة والنسبة للأسف قاعدة بتزيد ويمكن وصلت فوق ال35%.
■اليوم التسكير حيبلش بغزة بالليل بس ليومين وبالضفة بالمناطق اللي حددوها لأسبوع .
■الخلايلية مش راضيين يطبقوا القرار ومولعة بينهم وبين الحكومة.
■وزيرة الصحة بتقول رام الله فش على راسها ريشة واذا خرب الوضع فيها حنسكرها.
■ملحم بيقول انه المستحقات اللي ضايلة للموظفين حنصرفها قبل ميخلص هذا الشهر.
■الوفد المصري مبارح نورنا وشرفنا كم ساعة بغزة وشاف الجماعة هان وحكوا بموضوع التهدئة والمصالحة والمعابر وطلع بيان انه الأمور تمام وتسهلوا.
■الوكالة حكت انه عياداتها حتكون شغالة يوم السبت الجاي بس بنظام الطوارئ.
■الاتحاد الأوروبي بده يدفع عشرة مليون دولار لمحطة تحلية مية جديدة وكمان تلاتة مليون لمشاريع دعم للشباب.
■بدهم يزيدوا عدد الحصص لطلاب التوجيهي عشان يلحقوا المنهج.
■قصة القيادات اللي محولين قيودهم عالمحافظات الشمالية صايرة موضة .
■الوضع الصحي بالضفة وغزة ماكل هوا.
■الجاج صار بتسعة شيكل الكيلو.
■أبو مازن قبل استقالة حنان عشراوي و7..ماس بتقول انه أبو مازن ما بيقبلش الشراكة مع أي حد.
■ 7..ماس بتقول انه استقالة عشراوي تتبين ضعف ووتراجع المنظمة عشان التفرد بالقرار.
■نتياهو بيقول جاهزين كل يوم نطعم ستين ألف واحد من الكورونا عشان نخلص عليه خالص.
■أنا بقول ننشف ريقه بكم بالون على صاروخ وناخذ منه شوية لقاحات خاوة لغزة.
■تلت جواز جرابين وطاقية ولفحة عليهم عرض بعشرة شيكل .

#صباح_الخير لكل واحد صحي من نومه مستبشر كل الخير برب الخير ، رغم همه وغمه ووجعه وكلام كثير بينحكيش.

#صباح_الخير لكل حد بيقف مع غيره ولو بكلمة وبيحاول يخفف عنه ،يا صاحبي أحيانا الكلمة بترفع المعنوية لو قادر تقدم لغيرك حاجة ...الله يعيين الناس.

#صباح_الخير للناس اللي ملهاش مصدر دخل وبتحاول ترتب أمورها عشان تأقلم حالها بهاليومين الجايات بالتسكير ..تفلقش يخوي ..ربك بينساش حد .

#الله_يسعد_صباحكم 🌸
الخميس 10/12/2020

صباح الخير ل لامير

اخبار من الاخر ربنا يجيب الخير للجميع و يرفع عنا وباء كورنا و يجعل ايامنا و صباحتنا احلى من هيك

ودائما نقول الحمد لله على كل حال

يسعد صباحك @الامير

يسسلمووا الاممير
ممتابعهه

الله يرحمهم
الله يبعد عنا الوباء
متابعه لك دومًا

اللهه ييككونن بالععونن

	السلام عليكم ورحمة الله وبركاته يسلمووووا ع النشرة الجوية المنوعة والمتابعة يعطيك الف عافية بانتظار جديدك دائما تحيتي

متابعه جميله تسلم يمناك ياورد

الله يفرجها
شكراً لآلك