الأحد 6/12/2020

#أخبار_عالريق 354
✅يكتبها/سعيد الطويل
■الأخبار اليوم ناشفة شوية فش فيها أكشن ولا قصص جديدة ومعظمها كئيبة ،بس هذا الموجود تحملونا .
■مبارح كان أول يوم لتنفيذ القرارات الجديدة بغزة، وهيك هيك الكل ضبضب أغراضه وسكر محلاته لأنه لا في حركة ولا بيع وشرا، وأصلا الجو كمان مش مساعد.
■المستفيد الوحيد من هالوضع، أولاد المدارس الصغار اللي مش فارقة معهم الا انهم مفودسين من السنة اللي فاتت.
■التوقعات انه تصل أعداد الكورونا كل يوم من ألفين لخمس تلاف حالة بالضفة وغزة ،اذا ضل الوضع زي هيك فش فيه التزام ،هذا تصريح حكاه كمال الشخرة مبارح.
■في عنا سبعمية وستة وعشرين حالة جديدة بغزة اليوم حيعلنوا عنهم ،والنسبة صارت فوق عنا ال35 %.
■الأهلى طبعا زي مهوا متوقع ،فاز مبارح بكأس مصر والأمور فل الفل.
■برشلونة مزبطتش معاه وانغلب من قادش بقونين مرتبات.
■أتلتيكو مدريد هلحين صار متصدر الدوري الإسباني بشكل مؤقت بعد ما فاز على بلد الوليد بقونين بدون رد.
■بيقلك كل الأسرة يعني "التخوت" اللي بمستشفى الأوروبي مليانة فش فيها وسع ولسة في 35 حالة وضعها خطير جدا.
■تسعين جريمة قتل بأراضينا المح.تلة من أول السنة.
■سعر الجاج مش حيتغير ،حيضلوا ثابت بتسعة ونص ونقابة بياعين الجاج بتحذر من أي حد يلعب بالسعر.
■في اتفاقية جديدة عشان يوفروا نت ببلاش للطلاب والمعلمين بالبيوت ،والوزارة احتمال كبير توزع أجهزة تابلت للأولاد اللي فش عندهم وظروفهم بتسمحش.
■مبارح طلع من السجن الأ.سير محمود محمد نصار ، بعد ما خلص فترة حكمه ال10سنين .
■الدولار لسة قاعد بينزل ووصل هيو ل3.26 شيكل .
■لا تغسلي ولا تنشري يختي الجو حيضلوا ريح ومطرة كم يوم لسة .
■صار اليوم اللي بنقضيه بالدار بعد تسكير البلد قد الوقت اللي بنطلع فيه مرتين.
■المفروض الأكل يصير فطور للناس اللي بتحب تفطر وبعدها 3وجبات عشا على طول لانه بيضلش وقت للغدا أصلا.
■بلشت فترة التقييم عند النسوان لفترة الأعراس اللي فاتت كلها ، بالكورونا بالتفصيل ،والتحضير عندهم الفترة الجاية حيكون لموسم الخطوبة الجديد لقبل رمضان لمين يعيش.

#صباح_الخير لكل أم صحيت عملت شعيرية بسكر وعليها رشة جوز الهند لأولادها عشان يفطروا ويدفوا وبعدها افتتحت معهم المدرسة.

#صباح_الخير لأبو العبد اللي قام صلى و لف الحطة ع راسه وولع كانون النار وحط براد الشاي عليه وحمصله كم خبزة صغيرة وخلى مرت ابنه تجيبله صحن جبنة عشان يفطر فيه .

#صباح_الخير للناس اللي قاصدين باب الكريم من الصبح وطلعوا بعز المطر عشان لقمة عيشهم ،الشب اللي نفسه يبيع فرش العوقا قبل ما أذان الظهر عشان ميزيدش معاه وجاره اللي راح عموقف الخضرة يسترزق من الفجرية.

#يسعد_صباحكم 🌸
وادعوا لبعض من قلبكم ،وخلوا النوايا صافية ..كلها رايحة..
الأحد 6/12/2020

تعبنا من الاخبار
متابعه

يسسلمووا الاممير
ممتابعهه

نغاشة سعد الطويل بتخفف حدة الاخبار شوي

عوافي الامير

يسسسلموو
+ وردهه

يسلمو على المتابعةة

عوافيي

	السلام عليكم ورحمة الله وبركاته يسلمووووا ع النشرة الاخبارية المنوعة يعطيك الف عافية بانتظار جديدك دائما تحيتي

آحلا شي الخبر الشتوي
طآب يومك