#أخبار_عالريق 204 ✅يكتبها /سعيد الطويل

#أخبار_عالريق 204
✅يكتبها /سعيد الطويل
■من أول مبارح ولحتى الآن لقيوا 80حالة كورونا جديدة بالضفة ،معظمهم بالخليل ،الله يلطف فيهم.
■فش حالات كوورنا جديدة بقطاع غزة والمعبر مسكر طبعا.
■اجتماع مهم اليوم للجنة المركزية لفتح برام الله.
■مسكوا مبارح عشر فروش حشيش برفح ،شكلها من ماركة الكوورنا.
■وكمان مسكوا كمية مرتبة من الحبوب الجنسية ع معبر كرم أبو سالم وصادروهم.
■ المناضلة أم جبر وشاح اللي الكل بيعرفها ،تعرضت لاعتداء مبارح والكل استنكر والفيس انقلب قلابة والشرطة نفت ببيان انه منهم حد اعتدى عليها.
■كيلو فخاد الحبش بسبعة شيكل وكيلو الصدر ب13 بس ومحدش يحكيلي أغلى من هيك ،أنا شريته مبارح.
■كيلو الجاج بتمنية شيكل ونص من أول السوق لآخره.
■وزيرة الصحة بتهدد انه حتكون موجة كورونا ثانية في فلسطين.
■وزير الأوقاف بيقلك أي جامع خاصة بالضفة بيعملش اجراءات السلامة حنسكروا.
■سكروا مستشفى نابلس بعد ما اكتشفوا حالة كورنا مع واحد من الموظفين اللي هناك.
■ماما سناء اليوتيوبر الشهيرة عالنت اللي كانت ضحكتها من قلبها بتطلع ،توفت مبارح ،الله يرحمها.
■خبير بمنظمة الصحة العالمية راح عاليمن عشان يقدم الهم نصايح عشان الكورونا ،توفى بالكورونا.
■الدولار اليوم صار ب3.44وبدكم الصحيح فش حد ملتزم بالسعر .
■صور البحر والزحمة اليوم حتعبي الفيس بوك ،ولسة نص الأسواق الشعبية مفتحتش.
■طلعوا قرار انهم يرجعوا يدخلوا عالبلد أجهزة كهربائية "مخراز " .
■بيقلك شركة فيسبوك انها حذفت 88 إعلان لترامب عشان انتهمت سياسة "الكراهية المنظمة" ،شكله الموضوع تمويه.
■خلينا بأمريكا شوية ،هذا يا ملهم ترمب بيقلك انه :حتحصل أمريكا على أعلى ناتج محلي إجمالي في تاريخ البشرية في الربع الثالث من عام 2020،واحنا خلينا بالمناقيش ووصفات القرصة.
■في خوات متجوازت اليوم جايات ع أهاليهم بحجة أنه اختهم الصغيرة خلصت توجيهي ،ويارب دايما سفرتكم عامرة.🙂

#صباح_الخير بدنا نخليه خص نص للمناضلة أم جبر وشاح ،ولروح أم نضال فرحات أم الأربع شهد.اء ولروح ام رضوان الشيخ خليل أم الشهد.اء الخمسة ،ولأم ناصر حميد أم الشهد.اء والأسر.ى.
#صباح_الخير لروح دلال المغربي ووفاء ادريس وأيات الأخرس وريم الرياشي وعندليب طقاقطة وأم حسين النجار ووصال الشيخ خليل ورزان النجار .
#صباح_الخير لأمي وأمك وستي وستك وكل أم أسي.ر وأم شهي.د ضحوا وقدموا أكثر مني ومنك ،وربنا يهدي البال ويضلوا تاج روسنا.

#جمعة_مباركة وصلوا على الحبيب محمد🌹

مشكور ع المتابعة '

يسلمو لنقل والمتابعه الامير

يسلمو الامير ع المتابعة
وعوافي ع جهودك

مشكور للمتابعة
تحياتي لك

	السلام عليكم ورحمة الله وبركاته يسلمووووا ع الخبريات المنوعة والمتابعة يعطيك الف عافية بانتظار جديدك دائما تحيتي