أخبار اليوم

#أخبار_عالريق 70
✅يكتبها/سعيد الطويل
■للأسف يوم شبه عادي عدى بسلام بالوطن والشتات و مر مرور الكرام بعد تحدي ترمب وقرار تنفيذ الصفقة.
■طلع مبارح صاروخين من عنا واحد وصل جوا والثاني ضلوا برة وما وصل اليهود واشتغلت الصفارات.
■ بعدها اليهود كالعادة شغلوا طياراتهم ونزلوا قصف بخانيونس ودير البلح بكم موقع وأرض فاضية ونزلوا بيانهم وخلص .
■بيحكوا انه احتمال كبير الريس أبو مازن يجي ع غزة بنص شهر 2،والمفروض يسبقه ويزبط الأمور وفد بيرأسه أبو نداء الأحمد، يا مسهل يارب.
■دخل مبارح كميات مش قليلة من الكوشوك لغزة ،بعد ما قرروا اليهود يفرجوا عنهم ؛ لأنه إلهم قريب السنتين ممنوعات عنا.
■في منخفض جوي جديد بس شكله مش من النوع القوي ؛وصل مبارح للبلاد في شوية رشرشة مطر والسقعة أقل من الي راحوا.
■مسكت بلدية رفح والصحة 50كيلو سمك أرنب من الي بيسمم ع طول وطبعا أعدموه.
■مبارح أول مرة شباب من القدس يولعوا بلالين وكنادم ويطيروهم عالمستوطنات.
■الجاج سعره تقريبا ثابت من الأسبوع الي فات من 8.5ل 9شيكل للكيلو.
■بكسة برتقان البلنسيا تاع العصير ب8شيكل ؛وكيلو الليمون ب2شيكل من نصيب المفلوزين.
■هذا بأخبار الكورة يخوي ليفربول مش شايف حد قدامه وزي خدمات رفح بده يحصد الدوري.
■وريال مدريد وفالنسيا طلعوا لربع نهائي كأس ملك أسبانيا و مانشستر سيتي ولعت معه ووصل لنهائي كأس رابطة الإنجليز.
■وفريق باريس سان جيرمان ربنا سهلها معه ووصل كمان لربع نهائي كأس فرنسا والانتر ميلان كمان دحلت معه ووصل لنص كأس ايطاليا.
■ كيلو القرشلة بينباع بخمسة شيكل وزاكية وبتخرش خرش ؛وفي بياعين بيبيعوها ب12شيكل ليش بفهمش؟.
■اكتشفوا مبارح أول حالة بالكورونا بالإمارات ،وارتفع عدد الي ماتوا بمقاطعة هوبي بالصين ل170.
■تصريحات صفقة القرن وصلت لرقم قياسي وفش ولا تصريح عليه العين،الله وكيلك.
■القسماط والقضامة المالحة أكثر شغلتين صرت أشوفهم بصحون الضيافة عند الناس😊.
■اليوم حترجع زيارات الخوات لبيوت أهاليهن ثاني خميس وبيات ليوم الجمعة ،بعد غياب غضب عنهم ،عشان المنخفصات والجو سقعة وهيكا.

#صباح_الخير للناس الطيبة الي بتحب الخير لغيرها ..للناس الفهمانة والي بتسيب الناس بحالها.
-صباح الخير لكل واحد ماشي جنب الحيط وبيقول يارب الستر
-صباح الخير لكل شب بيتشغل بالشتا كم يوم عشان يحوش شوية من رسوم الجامعة.
-لكل شرطي مرور واقف بعز السقعة عشان ينظم السير وبيحبش المخالفات.
-صباح الخير لكل عيلة نامت تحت الزينكو وعالعتمة بدون كهرب.
-صباح الخير للمرضى والزهقانين والعاطلين عن العمل.

ولكل واحد بيحبنا ..احنا كمان بنحبه وبنتمناله كل الخير
ويا #صباح_الخير 🌹

يسعد صباحك
اخبار ع الكيف واسلوب حلوو بريحنا من كآبة غالبية الاخبار
يعطيك العافية لادراجك ..

شكراً علي الاخبار هذا
بجد كانت ليله زي الزفت بسبب القصف
الله يهونها ويفرجها
شكرا كثير الك

صباح الخير يا بلاد
ربنا يحسن الأحوال
مشكورة لنقل الموضوع
تحياتي لك

صباح الخير ملوكه
وشكرا ع نقل الاخبار
جد.بحب طريقة نقلها
م بتحسي انه في كوارث بالبلد
يسعدك♡

ولكل واحد بيحبنا ..احنا كمان بنحبه وبنتمناله كل الخير
ويا #صباح_الخير ��

و ي مسا القلوب الجميلة
الله يلطف بحالكن يارب
وان شاء الله تضلها دايما حياتكن وردات
طريقتك بالسرد حلوة ملوكة
الله يبعتلكن ايام حلوة
و
سنين احلى

مافى تعليق مناسب لكل هالاخبار
الله يصلح الحال احسن شي
يسلمو ملاك