كونوا أنقياء بلا شوائب بلا خبث

بتعجبني الناس اللي بتجي من الباب للطاقة بصدق و بتقلك :
حلو كتير لبسك من وين جايبتيه... أو برافو تصرفتي صح بهالموقف... لمّا يشوفوكي بقولولك اشتقنالك...لما يقعدو معك بقلولك قعدتك حلوة ما بينمل منها... لما ياكلوا من عندك ويكون أكلك فعلًا طيب ويقولوا لك من جوا قلبهم تسلم إيديكي الأكل بشهي ونَفَسِك عالأكل طيب... لمّا يكون فيكي شغلات كتير حلوة رغم كل عيوبك وبس تغلطي بذكروكي بمحاسنك لتضلي حلوة بعين نفسك...
الناس هدول عندهم سلام داخلي ومتصالحين مع حالهم وخاليين من العقد وبينشروا طاقة إيجابية وين ماكانوا... ماعندهم مشكلة يقولوا أي كلام حلو لأنهم حلوين ...وماعندهم بخل بالكلمة الطيبة لأنهم طيبين... وعلى فكرة هدول ما بكون بدهم شي منك مقابل كلامهم الحلو غير إنهم بدهم يرضوا الله بأي طريقة ( عكس السائد لدى البعض)

وهدول الناس بمجرد ماتوقفي معهم دقيقتين أو حتى تقعدي معهم شوي رح تلاقي يومك صار حلو... هدول الناس من جوا نضاف كتير وشبعانين كتير ومربايين منيح وواثقين من حالهم كمان ...

ركزوا منيح:
قال صلى الله عليه وسلم: " المؤمن غِرٌّ كريم، والفاجر خبٌّ لئيم "
الغِرّ: سليم الصدر وحَسَن الظنّ لا يفطن للشرّ ولا للغل وليس بذي مكر.
الخبّ اللئيم: خبيث يسعى في الأرض بالفساد.

سئل صلى الله عليه وسلم: "أي النَّاس أفضل؟ قال: كلُّ مَخْموم القلب، صدوق اللِّسان. قالوا: صدوق اللِّسان نعرفه، فما مَخْموم القلب؟ قال: هو النَّقيُّ التَّقيُّ، لا إثم عليه، ولا بَغْي ولا غلٌّ ولا حسد "

كونوا أنقياء بلا شوائب بلا خبث بلا مكر بلا كبر فوالله أنت الخاسر الوحيد للجنة وحب ربك واللي حواليك!!!
ما تبخلوا بالحب والكلمة الطيبة مشانكم ومشان اللي حواليكم!
الحياة تحلو بكل كلمة أو عمل يرضي رب العالمين حتى لو كان بنظرك بسيطًا فقد يكون سببًا لسعادة أحدهم
وسببًا لدخولك الجنة 🌸
اوقاتكم عامرة بذكر الله والصلاة على رسول الله صلى الله عليه وسلم