العلاقة الناجحة

الحب ببلش لما تغيب فكرة التملك من عقولنا، ويحل مكانها مصطلحات ثانية، مثل الإحتواء، المشاركة، تبادل المنفعة.

مثلاً الأرض والشمس علاقتهم بعيدة كلياً عن التملك، كل وحدة فيها بتتصرف على طبيعتها، الشمس طبيعتها انها تشرق، بس بحاجة لمكان تشرق عليه، فالأرض بتعطيها المساحة لحتى تنشر عليها نورها وبهيك الشمس بتعبر عن طبيعتها والأرض بتتزين بأشعة الشمس.

علاقة بين اثنين(الشمس والأرض) كثير مختلفين واهتماماتهم وطبيعتهم مختلفة كلياً، بس هلإختلاف ما منعهم يكونو علاقة كثير ناجحة وتنعكس بشكل إيجابي على الإثنين.

وكذلك العلاقة ما بين الرجل والمرأة، المرأة مثل الشمس هي اللي بتنور العلاقة وبتعطيها هالدفى والحنان ، بس لحتى تقدر تكون بهالصورة بحاجة للرجل لحتى يعطيها المساحة الكافية لتمارس طبيعتها من غير شرط التملك أو تقييد نشاطها وحريتها.

الكون من خلال علاقة الشمس والأرض علمنا درس كثير مهم، انو حتى في أكثر العلاقات اختلافاً، لسة في مجال للتفاهم وتكوين علاقة ناجحة.

لكن الرجل والمرأة صحيح مختلفين بس مش مختلفين كما هو بين الأرض والشمس بس مع هيك الشمس والأرض كونو علاقة ناجحة واحنا البشر لسة ما عم نوصل لحبل تفاهم.

لهيك، العلاقات اللي حولينا عم تزداد ظلمة وشحوب، لجهلنا بطبيعتنا، لو كل حدا فينا اتصرف على طبيعتو بس من غير جهد وتعب واتقبل هالطبيعة من غير المحاولات الفاشلة لتغير طبيعة الطرف الآخر لكانت علاقاتنا مع من نحب دائماً مشرقة وتبعث نور لمحيطها من العلاقات الأخرى.