المشكلة بالمصايب احزرو مين

المشكلة بالمصايب احزرو مين


الاشخاص اللي بتحكيلهم مصيبتك ، و ردة فعلهم !!
يعني مثلا :
بتحكي لحدا : والله يا كبير انا انصدمت بشخص و طلع عاطل ،،
بقولك طول بالك ( لسا ) رح تنصدم بكتير ناس ، هو انتا لسا شفت اشي!
بتقول لحدا : امبارح انتصب عليي ب الف شيكل !
بقولك هاهاها ولك ( لسا ) رح ينتصب عليك كثير بحياتك!
بتقول لحدا والله انا مريض و سخنان اليوم !
بقولك ييييي لسا الايام جاي و رح تسخن وتمرض ويصيبك حصبة و جدري و بنكرياس!
بتيجي لواحد تاني وبتقولو والله طفران !
بقولك بعين الله يا غالي لسا ما شفت اشي بكرا رح تطفر وتشحد و تأكل من فتات الارض و تشتهي اللقمه اصبر!
بتقول لحدا والله ضربت السياره اليوم !
بيقولك هو انتا لسا شفت اشي؟ لسا الايام جاي ورح تضربها وتقلبها و تلعن ابو شرفها للسياره وتندعس!
بتقول لحدا خالي مات !
بيقولك الله يرحمه طول بالك كلنا رح نموت وخالك الثاني رح يموت وولادو وانتا رح تموت و الجيران والعالم كلها!
طب يا عمي اكذب عليي ، داريني ، احتويني ، اخدعني ، اقنعني انها اخر مصيبه ، اقنعني انو الحياة جميلة و غدًا اجمل ، عيش جو المسلسلات معي ، اسرح فيي ، اعبطني وقلي خلص إن شاء الله اللي جاي احلى 😂
- امثلة الخاطبين :
مالك يا فدوى؟!
اليوم فسخت خطبتي!
طولي بالك لسا رح تخطبي مره ومرتين وتسعة وتفسخي وتطلقي و تنطخي بعرسك و تندعسي!
مالك يا ابراهيم؟!
يا زلمه ابو خطيبتي اكل راسي طلبات!
ييييي هو انتا شفت اشي؟ لسا الايام جاي ورح يطلب منك بلاوي زرقا ، لسا قدامك العرس والفندق والضيافه والبطيخ ، يمكن بكرا يطلب منك تعمل تمرين المِعدة عاللوج!
- مثال الحزينة الحامل :
مالك يا اعتدال ؟
تعبانه شوبانه دوخانه مش قادره مضغوطه قرفانه مش قادره اتحرك!
ولك طولي بالك بعدك بالشهر الاول ، بكرا رح تتعبي وتدوخي ويغمى عليكي و تغيبي ومتعرفيش توكلي ، يييي لسا لما تولدي يمكن تولدي سنجاب بري لونو اخضر بقرط بحرف الواو!
يا عمي داروهم ، صبروهم ، عيشوهم الحياه الحلوه 😂
اخر مثال والله والله 😂
واحد بعرفو ابنو عمرو سنتين وقع وانطبش براسو ضربه خفيفه ،
جارهم بيقولو : لسا ما شفت اشي ، بكرا رح يكبر وينطبش ويندعس ووينفتح راسو و يطلع هامل و يشرب ويتعاطى و ينحبس 😂 الايام جاي !
خلص بس

هههه
فعلا هيك الناس
مش عارفه هم صح والا غلط
يمكن لو حكوا عكس هيك عشان يواسوك
بكونو بصحكو عليك لانها الحياه هيك فعلا
قاسيه وصعبه وبنشوف فيها بلاوي
ويمكن هم بحكو هيك عشان يهونو عليك..انه اللي انت فيه قليل وبسيط
مع انه انا من الناس اللي دايما بحكي للواحد..لعله خير
وان شاء الله الخير جاي لقدام..يعني تفائلو بالخير تجدوه

هدول ناس حقيقيين مئة بالمئة، بدهمش يقنعوك بشي هما متأكدين أنه غالبًا مبيحصلش
المشلكة في الي بكزبوا وبحكوا بكرا أحلى بييجي بكرا أسود وتضل كمان تسب وتلعن فيهم
كل حد بحكي حسب تجاربه بالحياة، الي عاش أيام سودا رح يحاول يقنعك ان الي عشته قليل
والي عاش أيام بيضا فبيحاول يقنعك أنو بكرا أحلى دائمًا .. مشكورة قصي

طب مش هاى هيه الحقيقة !
ممكن نشوفها بوقتنا الحالى انها بتزيد المصايب والهم فوق راس الواحد
بس الحكى هاد واقعى واحنا بنتقبله بس ينحكى النا
والمثل بيقول لما تشوف مصيبة غيرك بتهون عليك مصيبتك
انا شايفته كلام مش غلط لما ينحكى بس مانبالغ فيه لهالدرجةة
يعنى اشي ومنه
عوافى قصي

لسه هدول امتشائمين وأصحاب النظرة السوداوية
أرحم بمليون مرة من الناس اللي لما تحكي قدامها شي
بتحس حالك في سباق والشاطر اللي بفوز
راسي بوجعني ياقصي والله راسي بوجعني اكتر منك
حاسس حالي مخنوق والله يازلمة اني مخنوق اكتر منك بس بضحك ايش الواحد بده يسوي
هههههه بدهم مبيد حشري هدول

ماننحرم روائعك قصي
وردي

ههههههع
انا شايف ان كل المجتمع اصبح هيك
ما في اي تفاؤل ونظرة تشاؤمية لكل الامور
الله يفرجها ويغير الاحوال
تحياتي لك

للأسف سادت النظرة التشاؤمية
وتفشت بين الجميع
واقعٌ معيق ..
شكراً قصي

كلنا عارفين انه ممكن بكرا يكون اسوء لكن بنفس الوقت ممكن يجي احلى ،
مش بالضرورة هالنظرة التشاؤمية تفرضها ع الكل ، شخص جاي يفضفضلك ويحكيلك
ي بتقول خير ي بتضلك ساكت ,
يعطيك العافية ع الحكي الواقعي مية بالمية ..

رغم المعرفة المسبقة ب سوء المجتمع أو انحداره

إنما من أخلاق المسلم التفاؤل بوجه الله الكريم

فاليأس او التشاؤم لا يليق بالمسلم


كل الشكر إلكك