بترجاكي ما تكوني أنت هي الأم..

جتها بنوتة
طار عقلها عليها وحبتها من كل قلبها
تناغيها وتلعبها وتركد وراها والدنيا مو سايعتها

كبرت هالبنوتة كم سنة
صارت تراقب أمها وبدها تقلدها بكل شي
فتحت درجها حطت حمرة وماسكارا ولبست سلسال و أساور
طلعت بالمراي ..
-ياااي صرت حلوة متل ماما
شافتها أمها وفار دمها عالمكياج اللي حطت عليه هديك الحسبة
صرخت فيها :
مين سمحلك تمدي إيدك وتلوصي ؟!
إذا قربت مرة تانية على مكياج ماما بدي اكسرك
فهمت إلا لا !!
اطلعي لبرا اشوف
والله لادبحك اذا عدتيها مرة تانية
........
كبرت هالبنوتة أكتر ووعيت
صارت ..
ترجع من مدرستها بدها تحكي كل شي صار لامها
اللي كانت .. ملتهية ومشغولة بشغل أهم من وجهة نظرها !
وهالطفلة تضل عمتلاحقها مشان تخلص حكاويها ومغامراتها وهي بوادي وامها بوادي
-ماماااا ...عمتسمعيني ... ؟

مرة على مرة
بطلت تحكيلها ..
مشاكلها الصغيرة صارت بقلبها تخبيها ..
وما تعرف لمين تحكيها ..

كبرت كم سنة كمان

صارت تنتقدها عكل صغيرة وكبيرة
اعملي هيك وليش عملت هيك واحيانا بتبهدلها بقسوة وممكن حتى ..تضربها !
لانه هيك بنظرها عبتربيها !

لما كان يجي لعند امها نسوان
وتقعد جنب أمها مع الضيوف وتسمع حكيهم ...

-عيب فوتي العبي جوا .. ما بيصير تسمعي حكي الكبار !!
....

لما يخطر ببالها شي سؤال طفولي بتجيها الردود الصادمة..
-أنت شو دخلك ... مالك علاقة بهيك قصص
-شو هالسؤال الغبي حدا بيسال هيك سؤال !
صارت كل مالها تخاف من امها وتبعد عنها اكتر

وكل ما دار شي بخاطرها تخاف تخبر أمها لانها ما بتعرف شو ممكن تكون ردة فعلها
ّ.............
كبرت وصارت صبية بنت 14 سنة
وصارلها رفقات بدها تطلع وتفوت وتزورهم ويزوروها
ينكتو ويمزحو ..
يغنو ويرقصو ..
يضحكو ويدردشو..
ولا بيجيها الرد الصاعقة من أهلها
-شو رفقات وما رفقات
انضبي اقعدي التهي بدراستك بلا صياعة
لسا ناقصنا طلعة وفوتة وفلت..

بتنكسر من جوا وما بتلاقي حدا يواسيها بوحدتها بأحلى مراحل حياتها
....
صارت بسن الخطبة وصارت تطلع حفلات وأعراس وسهرات نسوان
شافت الصبايا اللي بعمرها عمبيرقصو ويدبكو
قامت لترقص وتجن معهم وكانت مبسوطة وهي عمترقص بعفوية
أمها بتنكشها ..
- هيك الناس بترقص لك جدبة ؟!
ليش هيك عمتحركي إيديك
اقعدي اقعدي لا بقى ترقصي فضحتينا
..........

كانت
كل ما صار خلاف صغير بينها وبين أهلها .. يحبطوها بكلام موجع ..
-مين اللي رح يتطلع فيك وياخدك
-والله امه داعية عليه اللي رح يعلق معك
- اي والله والله بعد شهرين لترجعيلي مطلقة
-لك مين اللي خرج يتحملك انت ويتحمل غبائك

وهي بتنجرح وبتنكسر ..
تحس انه عبيحاصروها حتى بأحلامها الصغيرة
ومستكترين عليها انه تحلم تصير عروس متل كل البنات اللي بعمرها

لكن بالآخر بتقتنع بكلامهم
وبيصير حلمها انه يجي أي حدا ..أي حدا
بس يقبل فيها
وهي مستعدة توافق عليه

.......
بلشو يجوها الخطاب
فاتت بصينية القهوة
غمزتها أمها ..
-شو هالمكياج المبهدل هاد .. كتير باهت
هيك الناس بتتمكيج؟!
انجرحت كتير ... وبقلبها عمتقول (بعمرك ما علمتيني 🙍 وهلق جاية عبتعاتبيني )

أجا العريس المنتظر ..
وافقو أهلها عليه لأنه لاقوه هو الشخص المناسب!
وطبعا اتخذو القرار بدون حتى ما يسألوها ...

هي ما بتعرف تاخد قرار أصلا
وما بتعرف بعد هيك حبته ولا لا
بس انبسطت ..
أخيرا انخطبت
رح أعيش حب متل المسلسلات التركية
أكيد رح يشبعني غزل وأحضان
ويغرقني كلام حلو ودلال..
رح يلبيلي كل طلباتي ويلف الدنيا فيني
وطبعا رح يعوضني كل شي انحرمت منه ...

تزوجت ..
لكن..

انصدمت
انصدمت كتير
كان يكسرها ويظلمها ويهينها
شافها مهزوزة من جوا
ومالها رأي
داسها أكتر....
خافت تخبر أهلها
لأنه رح يحطو الحق عليها
-أكيد انت مقصرة لحتى عميعمل فيك هيك
-مستاهلة شو ما ساوى فيك
تسكت وتلوم حالها وتضل تحط الحق على حالها
(أنا لازم اعرف ارضيه )..( أكيد أنا اللي ما عمأفهم عليه)
شو ما عمل فيني أحسن من كلمة مطلقة
........

قصة حزينة كتير
ومكررة كتير
لكن
بترجاك ما تكوني أنت هي الأم..

علمي بنتك من صغرها تكون واثقة من حالها…
صاحبيها حاوريها فضفضيلها .. لحتى تفضفضلك
واسمعيها ... اسمعيها كتير
وعطيها من يومك وقت مخصص لإلها هي بس
اطلعي تمشي انت وياها لحالكم واستشيريها وخليها تحكي وتسترسل بكل رياحة
علميها تكون أنثى بلبسها واكسسوارتها .. دلعها وصوتها ..
علميها بنفس الوقت تكون قوية وتعرف تاخد حقها
علميها تقول رأيها بكل صراحة ووضوح بدون ما تخاف..
ساعديها لتكون صداقات وعلاقات وتحتك بالناس وتتعامل معهم ..
مشان بكرة تعرف تتعامل مع زوجها وبيت حماها ..
خليها تعيش عمرها ولا تقيديها بقيود عفا عليها الزمن ...
قربي منها واعطيها الثقة وادعيلها ..

لا تضلي تعملي متل اللي بيضل بيعقم بيته 24 ساعة وبيسكر كل المنافذ حتى ما يمرضو ولاده
وأول ما ينفتح الباب وتجيهم نسمة هوا بيطبو وبيمرضو لأنه ما عندهم مناعة

افهمي بنتك
افهمي عنادها
افهمي تصرفاتها
ولا تنفريها منك ... لحتى تهرب منك وتدور على بديل عنك

عطيها حب بدون شروط
ودلليها بالكلمة الحلوة وشبعيها عاطفة
وشاركيها طموحاتها بدون تحبيط ولا سخرية
وساعديها. لتحققها

وقتها
ووقتها بس
بتقتنع انه من السخافة أن يكون أقصى طموحاتها... عريس وفستان أبيض

للاسف هادا حال كتير بنات بوصلوا لمرحلة الزواج بكونوا مهزوزات وما عندهم الثقه بحالهم بسبب التربيه يلي عاشوها
المفروض الام تكون الصديقه والرفيقه وتزرع الثقه ببنتها وتكون قريبة منها بكل مراحل حياتها وما تحاول تحبطها او تقلل من قدراتها
موضوع جدا رائع
يسلمو قصي ع ادراجه

موضوع اجى عالوجع
وكتير اتاثرت فيه
ماما على قد ما هي طيبة وحنونة
بس مسيطرة ...عمرها ما خلت بايدنا قراراتنا
الزواج ....حقك باختبيار الفرع اللي نفسك فيه
امور مصيرية من حق البنت وبس يكون الها القرار فيه
وللاسف ما كان الي حق الاختيار...حتى بهيك مواضيع
من خوفها وحرصها الزايد حرمتنا من الخروج
لهيك انا لليوم انسانة بدون صديقات حواليي
لانو ممنوع اطلع واخرج متل العالم والناس وادعيهم ع بيتي
بفكروا التربية تامن الاكل واللقمة لاولادك
عمرها ما كانت قريبة منا وتسمع شو عم يوجعنا
بحياتها ما كانت صديقة النا

وبالاخر بلوموك وبحكوا عني نفسية ومعقدة


انا كتير بحبها وما بدي حد يفهم كلامي غلط
انا مش طمعانة غير انو امي تكون رفيقتي
احكيلها كل اللي بوجعني بهالدنيا.حتى خواتي الكبار بعامولوني معاملة ماما
وللاسف لسه ايدها بتنمد عليي وانا صرت بدي اوصل الاربعين
بعرف كتير ناس ح يعاتبوني على هالفضفضة ولاخر لحظة نفسي ارد

عوافي قصي عالموضوع المميز ما ننحرم
بس بجد الوجع اكبر بكتير.
تلاقي الام والبنت طول عمرهم ببنفس البيت
وفاقدين لغة تجمع بينهم

طرح رائع قصي
للاسف كتير فى امهات هيك
واذا اجيت بدك تنصحها بتحكيلك اولادى وحرة بتربيتهم
او هدول مابينعطو وجه
هما ضيوف هدول علشان ماينعطو وجه
بس بالنهاية الابناء مسؤولية وامانة عند الاباء
وراح يتخاسبو ع تربياتهم وكلششي
يسلمو قصي

إن شاء الله ما نكون أمهات
متل الأم اللي كتبت عنها
ميرسي قصي للنصيحة الغالية
عوافي