أخبار_عالريق

#أخبار_عالريق 1069 يوم
✅يكتبها / #سعيد_الطويل

▪︎صحيح انه خشينا عالصيف دوغري بس الصراحة الجو سقع شوية بعد نص الليل ،وهيك جو بدوش تخفيف بالأواعي عشان متمرضوض

▪︎بيقلك رمضان هذه السنة جاي الأبرد بالحرارة من عشرين سنة

▪︎ استــ ـشهد طفل من قلقيلية اسمه محمد نضال سليم

▪︎3 أطفال إخوة من عيلة الرجبي بالقدس ماتوا بعد ما دهستهم بنت وهيا سايقة السيارة مبارح الصبح

▪︎بعد العروسة صابرين أبو جزر توفى شب اسمه محمود بكر أبو طير بعد ما غرقت سفينتهم ببحر اليونان وهما مهاجرين

▪︎الشبيبة فازت بانتخابات جامعة الخليل على الكتلة ب 25 مقعد مقابل 16

▪︎ع قولة #أبو_فؤاد خُد الناس على قد عقلها حتنبسط و تِبسطهم

▪︎برشلونة فازت على الريال مدريد في نص دارهم بكاس ملك إسبانيا.

▪︎فش موعد مؤكد لصرف شيكات الشؤون الاجتماعية لهلحين
#للأسف لا قبل رمضان ولا قبل العيد

▪︎زي مقلنالكم الرواتب من يوم الأحد بتهل عالبلد ان شاء الله

▪︎عروض رمضان والفوانيس شغالة السنة من بدري وبصراحة حاجات بتفتح النفس

#صباح_الخير للناس إللي بتصحى قلوبها صافية ونفسيتها رايقة ونيتها صافية وما بدها غير الستر والعافية والخير لغيرها زي مهيا حاباه إلها

#صباح_الخير لكل عيلة لامة أولادها حواليها بيوم الجمعة بصغارها وكبارها

#صباح_الخير لكل مريض ومكلوم ومديون وموجوع ومقهور ..الله يجبر خاطركم

#جمعة_مباركة
صلي عالحبيب قلبك يطيب
اللهم صل وبارك على سيدنا محمد 🌹