وحشتيني

وحشتيني
بقولها بخوف
سنين
ما بين لهفة مفقودة
ودمع حزين
بقولها
وانا شايف ايديكِ بأيده
ومش سمعاني
سامعة بس صوته
محدش بيضله عزيز
قالوها زمان
ما تتعشمش بزيادة
تكون خسران
ما تقولش لحد واحشني
وهو ناسيك
ما تتعشمش بحد يكون
جمبك وهو بعيد
عيونه مش شايفاك
ولا حس بيوم فيك
كنت يا دوب خانه
سطر واحد في حكاية
السطر الاخير ..
كفاية حنين
بتوجع نفسك
وما بتقدرش تقوله
لو كلمتين
كفاية سهر
تكلم نفسك
قدام مرآيا
ولا باين ليك خيال فيها
ما تعاتبش
اللي مبيندمش ع الفرقة
ولا يفرق معاه كلمة
وهيقولك ايش يعني
بعد سنين غربة
عايش في نفس البيت
بس من غير روح
بتتكلم بس مش صوتك
وتتنفس بس من خوفك
ليوم تموت
وما يكونش معاك
ولو بلهفة كذابة
يقول خليك
ويخاف عليك
بس مش باين في عينيه خوفه
ولا هو اصلاً جه
من سنين غايب
تقول ما سابش
بعد منه حبايب
مستنينه
واقول بصوت عالي
وحشتيني
بس مش قادر اقول
مفيش صوت
والكلام خايف ..


26/7/2022