#أخبار_عالريق 657 يوم ✅يكتبها/ #سعيد_الطويل

#أخبار_عالريق 657 يوم
✅يكتبها/ #سعيد_الطويل

■كبست مطرة حلوة طول الليلة إللي فاتت عوضتنا عن كل المنخفضات الأونطة إللي قبل هيك .

■ الشرطة البحرية سكرت الصيد بالبحر حتى اشعار آخر عشان الجو .

■المهم الوكالة أخرت دوام الصبحية بالمدارس شوية صغيرة ،وصار بيبدا عالساعة سبعة .

■وزيرة الصحة أجت تكحلها عمتها ،قالت انه نقل هيثم الهدري ملوش علاقة بوفاة الطفل سليم النواتي

■أصلا شكله الدكتور هيثم راح بين الرجلين ضحية الكبار ،بس عشان يسكتوا الناس

■بعد قصة مناهل دير البلح ،اكتشفوا سرقة مناهل جديدة بالشيخ رضوان

■مسكوا حرامي سارق 70 بكسة سمك من مينا الصيادين بغزة.

■في موقوف سكان الزوايدة شرد مبارح من سجن رفح مبارح بعد العصر

■مباحث التموين مسكت فوق ال 38 طن قهوة خربانة بغزة..لمين ؟ ماندري!

■الأمور بالنقب فايعة و اليــ ـهود طابين اعتقالات وضرب بأهلها وبدهم يشردوهم خاوة.

■عقوبات فرضها اتحاد الكورة لنقل المباريات بغزة لملاعب تانية عقوبة للجماهير.

■ناصر أبو حميد داخل غيبوبة ووضعه صعب عالآخر وفي تدخلات قوية انهم يطلعوه ويسافر ع مصر أو الأردن.

■هشام أبو هواش بعد ما فك اضرابه وأموره تمام ،اكتشفوا معه كور ونا .

■ضربة الخميس برفح انمسك 6 فروش حشيش و400 حبة روتانا جديدة لنج.

■الجاج بتسعة شيكل ونص الكيلو ،واللحم حد الله ما بعرف سعره .

■الخضرة رخيصة وماشي حالها بس لسة الخيار غالي شوية.

■الفاكهة والحمضيات مملية السوق عندك الابوكاتو والكلمنتينا والانجاص والموز والفرسمون والبرتقان معظمه الأربعة بمية .

#صباح_الخير والله يجبر خاطركم

واكسبوا الصلاة عالنبي محمد صلى الله عليه وسلم 🍀