بعض الأعداد في اللهجة الفلسطينية لها استخدامات مختلفة جداً

بعض الأعداد في اللهجة الفلسطينية لها استخدامات مختلفة جداً.. وهي
60 ، 100 ، 10 ، 1000 ، 7 ، 2
على سبيل المثال : -
-الرقم (60)
-يستخدم فقط وحصرياً في الشتائم والتوبيخ دوناً عن باقي الأرقام
-مثلاً : (ابن ال60 كندرة) .. (ابن 60 كلب) .. ما بيقولوا مثلاً ابن 50 كلب.. ولا ابن 70 كلب..حصراً 60 كلب فقط لا غير.
-ويستخدم الرقم (60) أيضا لوصف اسوأ مكان أو وجهة.
-مثلاً : (مع 60 قلعه).. أو (تروح في 60 داهية).. 40 أو 70 ما بيمشي الحال .
--أما الرقم (100) فيستخدم للتسليمات.
مثلاً: (يا 100 أهلا وسهلا).. مابنفع يا 50 أهلا وسهلا
(100 مرحبا ) (100 وردة بهالطلة) ..
وأحياناً يستخدم رقم (100) للمبالغة :
(100 مرة قلنالك لا تعمل هيك).. هو بكون قايلك مرة ونص أو مرتين بالكثير..
(100 مرة ناديتلك).. هي بتكون 3 مرات أيضاً..
-وأما الرقم (10) فيستخدم لوصف جودة الأشياء أو الأفعال.
-(الشغل 10 على 10)..
-أو (فتح عيونك 10 على 10) يعني انتبه
- أو ( ماشي على سنجة 10)
سنجة 11 مش حلوة

--الرقم (1000) يستخدم تحديداً في التهنئة.
(1000 مبروك) او (1000) الحمدلله عالسلامة
999 مبروك ما بيمشي الحال.. حصراً لازم 1000

أما الرقم (7) فهو ظاهرة غريبة جداً في الوصف ويفيد الحيرة الشديدة أو البحث المتواصل والمتعب عن شيء أو شخص ما. مثلاً :
(دخت ال7 دوخات لحد ما لقيت فلان أو هالغرض الخ...).
كما يستخدم الرقم (7) للتعبير عن النوم العميق ..
(ما رح يرد عليك.. شكله ب "سابع" نومة)..
انتبه.. لو ب "سادس" نومة كان قام عادي ورد ..
بس هاي السابع نومة ..
معاك " لسابع "موجة في البحر ثامن موجة ممكن يغرق

أخيراً الرقم (٢) ....
وهو يعبر عن أطول مدة زمنية في الكون.. وهي (الساعتين).
(صار له ساعتين بنفس القصة) هي بتكون ٥ دقايق.. بس الله بيطرح فيهم البركة..
(صار لي ساعتين بستناك) (صار لي ساعتين وأنا بفهِّم فيك) (هلكتني صار لي ساعتين واقف ع رجليي )

مميزين الفلسطينين الله يحميهم
شكرا لك

ههههههه
كل شي عنا غير
ما أحلانا
يسلموو مؤمن

مشكور على الافاده
ماننحرم جهودك

هههه
اللهجة العامية و هذه الاستخدامات واللغة هي اللي بتحليها
يسعدك لادراجك ..

نعم صحيح مصطلحات كلنا بنستعملها بدون ما ننتبه



بس هون ضحكت وانا اقرأ وكل ما امر عن شي اقول فعلا بنحكيها



يعطيك الف عافية لا شعوريا استعملت كلمة 1000 هههههه



تحيتي

ههههه بنستخدم هالأرقام تلقائي ي مؤمن
يعطيك ربي ١٠٠٠ عافية
هههههه

كل الشكر و التقدير