أخبار_عالريق 365 يوم (سنة كاملة)

#أخبار_عالريق 365 يوم (سنة كاملة)
✅يكتبها/سعيد الطويل
سنة راحت بخيرها وبشرها،كتبت فيها اللي ربنا قدرني عليه كنا بنحاول نجيب الأمور بأسهل طريقة ممكن تصلكم فيها الأخبار..
■كتبنا عن الكور.ونا من أول السنة وعن اللي أكل الخفافيش بسوق وهان بالصين "الله لا يكسبه"
■مر علينا خبر وفاة قابوس سلطان عمان وبعده بفترة مات حسني مبارك.
■كتبنا عن حالة الطوارئ اللي أعلن عنا أبو مازن عشان الكور.ونا من شهر تلاتة ولليوم ما خلصتش.
■بهذه السنة سكرت الجوامع والجامعات والمدارس والروضات والأسواق والصالات والنوادي والكافيهات والمطاعم والكوافيرات والصالونات .
■بهذه السنة لأول مرة الأفراح بتكون عالضيق، بدون معازيم والبرز والعزا جوا المقبرة وع قد كم كرسي عالباب.
■بال2020 زادت نسبة البطالة ونص الشباب أكلوا هوا وقعدوا عن شغلهم بعد قصة الكوو.رنا.
■بهذه السنة صارت عنا فاجعة النصيرات وعدد شهد.اء لقمة العيش والمخاسر اللي مشفنهوش قبل هيك .
■هذه السنة مقبضوش تبعون الشؤون الا مرة وحدة ومحدش مدور على هالغلابا.
■بهذه السنة الحمد لله انقطع راتبي من السلطة عشان واحد حاقد كتب تقرير كيدي فينا.
■كتبنا هذه السنة خبر اغتيال سليما.ني وانه اير.ان مش حترد عليه وبآخر السنة اغتالوا العالم محسن زاده.
■كلنا حزنا عن حريق مرفأ لبنان وكل الفيس قلب لبنانية ومن قلبي سلام لبيروت.
■نكشنا راس عالكو.ورنا أول ما دخلت عنا وعملنا مشاكل عشان مش عاجبنا حجر المدارس .
■مرينا بمراحل حجر من 21 يوم بعدين اسبوعين بعدين خمس تيام بعدين انت وأمانتك.
■فاكرين لما مطلعناش من دورنا لما أعلنوا بنص الليل انه في حالتين جوا الحجر ،أكيد ذاكرين الشيخين ،البلد يومها قلبت منع تجول رسمي.
■هذه السنة شفنا فيها شو عمل ترامب بالناس اللي عملوا مظاهرات عشان العنصرية،كسرهم تكسير ومفرقتش عنده حاجة.
■بهذه السنة انغلبت برشلونة وانقلت قيمتها من البايرن ميونخ غلبت تمنية صفر والأهلى كسح الدوري والكاس .
■كتبنا عن اللي انتحر واللي انقتل واللي طلق مرته عشان الشوكو وعن اللي قتل بنته والي طخ أخوه.
■كنا كل كم يوم نكتب عن خبر ولد صغير اندعس من سيارة وقلوبنا تتوجع عليه وتتحسر.
■ناسيين قبل فترة لما قعدت البلد فايعة طوش ومشاكل وطخ وسلاح وصرنا نقول بدنا نبخرها من كثرة مشاكلها وتفشش الناس ببعض.
■بهذه السنة خلصت مسيرا.ت العودة وبطلنا نسمع يلا امشوا معانا.
■البلاليين صارت شد وارخي مش زي زمان على كيفنا القصة.
■بشهر تمنية انقلبت عنا الدنيا لما اكتشفوا أول حالة كوورنا بالمغازي والمفروض نقدم الها ضمة ورد عشان وعتنا عالبدري.
■مات هذه السنة حسن حسني وشويكار ومحمود ياسين وعشرة كمان من الفنانين المشهورين بمصر .
■هذه السنة صار التطبيع علنا مع الامارات والبحرين والمغرب والسودان والأمور عندهم زي اللوز .
■مات بهذه السنة مجموعة كبيرة من السياسين بالسلطة والتنظيمات منهم زهدي النشاشيبي والطيب عبد الرحيم واحمد الكرد وعبد الرزاق اليحيى وعبد الله ابو سمهدانة وجبر القيق وصائب عريقات وحكم بلعاوي .
■أربع أسر.ى انحرموا من شوفة أهاليهم واستش.هدوا هذه السنة بسجون اليهود نور البرغوثي وسعدي الغرابلي وداوود الخطيب وآخرهم كمال ابو وعر.
■مشفناش هذه السنة تصعيد زي اللي الناس نفسها فيه ولا صفارات الانذار زمرت بقلب ورب .
■هذه السنة اكتشفنا فيها التيك توك ع أصوله وركزنا فيها عالطبطبة والهدف مرصود .
■سنة كانت مليانة روابط فحص عال100 دولار ومساعدات المتضرررين والناس اللي وضعها صعب.
■سنة كانت شحاح متغدناش فيه بعرس الا مرتين من أولها .
■كتبنا هذه السنة أخبار الشباب اللي زي الورد الي انتحروا بغزة بأيام العيد.
■توجعنا عالشباب اللي طلعوا يسرحوا على رزقتهم بالبحر ورجعوا محملين بتوابيت .
■كتبنا عن سعر بكسة البندورة اللي ولعت نار وعن سعر الجاج اللي محدش صار قادر يشتريه.
■مرينا هذه السنة بأزمة غاز وأزمة كهرب وأزمة مواتير وأزمة أخلاق وأزمة اشاعات وأزمة ناس فاضية مش لاقيالها شغلة ولا عملة.
سنة ودعناها بخيرها وبشرها ويارب السنة الجاية تكون قدمها خير وسعادة وراحة بال ورزق لكل واحد بيتمنى الخير لغيره

#يسعد_صباحكم وهيك صارلنا سنة بكتب هذه التفاصيل يوم بيوم يارب نكون ما تقلنا عليكم واذا النا نصيب بنكمل.

#صلوا_على_رسول_الله 🌺💙
الجمعة 18/12/2020

الله يفرجها
شگراً لآلگ

يعطيك الف عافية

	السلام عليكم ورحمة الله وبركاته يسلمووووا ع النشرة الاخبارية المنوعة يعطيك الف عافية بانتظار جديدك دائما تحيتي

يعطيك العافية الامير