أخبار_عالريق 264 ✅يكتبها/سعيد الطويل

#أخبار_عالريق 264
✅يكتبها/سعيد الطويل
■أخبارنا اليوم فيها شوية أحداث بس فش فيها لا قصف ولا حلول جديدة ولا تصريحات مهمة ولا حتى حاجة تبشرنا للأسف.
■مبارح من تسع تيام مصارش قصف عليا شكلهم اليهود زهقوا منا.
■أحمد البراوي من بيت لاهيا وهو بعز شبابه ، شنق حاله مبارح ،والمشكلة انه هذه الحالة الثالثة من يوم العيد.
■معبر كرم أبو سالم شغال بشكل جزئي بس بيدخلش منه لا بنزين ولا اسمنت ولا مواد البناء.
■السمك صرنا نشوفه عالتلفزيون ،وشكله موسم السلاطعين حنيضرب.
■الشؤون الاجتماعية بدها توزع اليوم مليون شيكل على 5000عيلة محتاجة بغزة.
■اردوغان استقبل هنية بقصره بتركيا.
■تركيا بتدور ع دحلان وبيقلك طلبت من الانتربول يدور عليه وين موجود.
■الحزب أعلن انه وقع طيارة لليهود مبارح العصر بلبنان.
■للأسف بعد ضربة التمنية ببرشلونة ،أجت ضربة ثانية وفاز الزمالك تلاتة واحد عالأهلي.
■خمس تلاف حالة كورونا بس بالقدس لحالها.
■المجموعة اللي غنت يا بنت يلي امك مزة ،عليك حتة دين هزة ،،طلبتهم النيابة.
■ وزارة الأوقاف غزة بتقول انه لاحظت زيادة ببعض المظاهر اللي بتخدش الحياء العام.
■خبر فتح المعبر الأسبوع الجاي مش صحيح
■موضوع الرواتب لسة محدش صرح فيه بشكل رسمي ،كله اللي بتسمعوه كلام جروبات.
■جامعة الدول العربية رفضت طلب لفلسطين انهم يعملوا اجتماع ضد التطبيع،أريح خالص.
■ممكن تنام وتصحى يومين وانت مش عارف انها اجت الكهرب عليكو.
■زي مقلنالكم العمادي حييجي ع غزة هاليومين عشان يزبط الأمور ،مع انه لو قابل هنية بقطر أسهل وأسرع.
■سبع حوادث سير من مبارح لليوم بغزة.
■أربع أسر.ى مضربين عن الطعام بشكل مفتوح بالسجن،عشانهم معتقلين بدون محاكمة.
■الخيار والبندورة الكيلو بشيكل ع بسطات السوق.
■الكوسا أغلى حاجة بالخضرة،الكيلو بخمسة شيكل.
■عدد كبير من الناس يا اما صابته فلونزا أو لفحة هوا من تغيير هالجو وطفيت المراوح وتشغيلها .

#صباح_الخير للناس اللي نامت تحت ألواح الزينقو بدون ما يفتحوا الشبابيك بالمخيم ،ونيموا أولادهم عالبلاط من شدة الشوب.

#صباح_الخير لكل واحد نشف ريقه من تصليح المرواح والبطاريات وتشبيك السلوك والكوابل ،عشان يقدر يوفر جو مناسب لأولاده عشان يناموا.

#صباح_الخير لبياعين التين والعنب الزاكي اللي ع مفترقات البحر والشيخ عجلين .

يسسلموو ل ممتتاابعةة
وردهه

اتمنى يجي اليوم يلي نسمع في اخبار تفتح النفس على الريق هههه

يسسسلمو على المتابعةة

متابعة اخباره هذا
مشكور الامير