خطوبتي....الجزء الاول

ليلة خطبتي متنا واحنا نليف البيت وانا عروس عالخفيف شغلوني
بس ليفت الحيطان والحمامات
وكنست الحكوره

وامي حددت المعازيم وحكت لعمامي واخوالي عالديق وممنوع تجيبو البنات
حكتلي كلهم احلى منك وبعدين بغطو عليكي

وبس حطينا اللوج قمت جربته وازقف من كل قلبي

وهوووب والا الغلا جاي بالدشداشة ونط عالطاولة اللي بتهز زي نعش الرقاصه

وامي حطت ورانا صورة ابوها المرحوم قال كسبت الرهن عليه كان يراهن انه عمري ما رح اتجوز

وسكرت بوفيه القزاز بمشرط

وبلشنا نعمل بروفا
بالاول طلعنا انا والخال.وحطينا السلام الملكي

ورقصنا شوي فرحنا الدار
وبعدها امي حددتلي حركات بالرقص والمسافه
ومنعتني اوكل بزر ليلتها عشان ما اعطش وبراطمي يصبحو متشققات

وتاني يوم الصبح افطرت قلاية بندورة وشوية مقالي باذنجان وزهرة مع رغيف مشروح عشان اشبع

وامي نهنهتني فرك بشوال البصل الاحمر وعملتلي مساج دهنتني كريم ريحته بتخزي عشان ترد العين عني

وبس وصلت الصالون كان بدري قمت غفيت شوي عالكرسي ما صحيت الا ع ذبانة دمها تقيل بتهف ع وجهي

وبس بلشت فيي الكوافيرة كل شوي تنادي ع وحدة يعدلو اشي
عليم الله حسيت حالي لوحة pazzle وعملولي شامه من جنب
وتاتو ع كتفي زي الالعاب النارية

والتسريحة كانت عباره عن بطيخة وانفلقت نصين وعملتي دندونة من ورا

واجا الغلا اخدني بسرفيس اجرة وحكالي لابسه بنطلون من تحت بغار والله بحط ع وجهك كيس وبخفيكي عن الجماهير

حكاله صاحب السرفيس اي يالله عاد ركبها من جمالها
فعلن القرد بعين امه غزال

وبس وصلنا فتت اركض واصيح امي فكرتني اتهاوشت مع الغلا وتطلقت
.حكيتلها لا ممغوصة وين الحمام

وبس طلعت لقيت ستي بتعيط وتقولي خسرتك يا معدله مين بده يحممني يا نظايفيه
ااخ لو اخروكي شوي تبريني وبعد ما اموت اتجوز

ومرت خالي تحكيلي مشخصية وتكركر حكيتلها شو ذكرتك بحالك بس خطبناكي كان وجهك احمر زي البيبي اللي بسنن

وامي صارت تعيط تقول ثعلب الدار هاي شو ما اخبي بتلاقييه

وبس انصمدت عاللوج

خالتي فخرية ما عجبها مكياحي
تفت ع المحرمة وخففت الكحله وعدلت مكان الشامة شوي

وبس انصمدت امي جابت مخده حطت وحده فوفي ووحدة تحتي عشان ابيين شخصية

وعملنا حد بينا وبين اهل العريس زي حد نهر اليرموك

امي حكت عاليمين لاهل العريس عشان البركة وقرأنا ع مقاعدهم وبخينا بمي

وعالشمال لقرايبنا والصبايا طلعناهم بره

وفيش شوي الا جاي الغلا واهله

اقعدو مكان اهل العريس عشان ارتاح شوي واكمل مراسيم الحفله
#منقول


🙋‍♀️
انتظروني في الجزء التاني

هههههه
ششويي ح ارقصص
+ و بسستناا الككيكهه تاععتي ههعع
+ ححلوهه ننقاءء يلل ننزليي تككملهه
وردهه

هههه متوقعه أنه ف حرب هاتحصل
مش خطوبه دي بانتظار الحزب الثاني

اقتباس   المشاركة الأصلية كتبت بواسطة barbie هههههه ششويي ح ارقصص + و بسستناا الككيكهه تاععتي ههعع + ححلوهه ننقاءء يلل ننزليي تككملهه وردهه

لسه بي اخلص تأليف..هه
يسعدك ننوش
نورتي

اقتباس   المشاركة الأصلية كتبت بواسطة سارة المصرية هههه متوقعه أنه ف حرب هاتحصل مش خطوبه دي بانتظار الحزب الثاني

ان شاء الله خير..هه
يسعدك ساره
منوره