أخبار_عالريق

#أخبار_عالريق 210
✅يكتبها/سعيد الطويل
■حادث سير قلب الفرح عزا ..مبارح بغزة توفى ابن عمومتنا اياد وليد الطويل وهو رايح ع زفة أخته ،وتصاوب معه تلاتة منهم واحد اصابته صعبة ،الله يرحم روحه ،ويشفى اللي تصاوبوا.
■توفى بسكتة قلبية ع وجه الفجر شرطي من الخاصة وهو بدوامه بغزة اسمه عبد السلام أبو نادي.
■أبو عبيد..ة صرح مبارح انه قرار الضم هو إعلان حرب ..من الآخر.
■فتح أكدت أنه حنضل نقاتل لآخر نفس ومش حنسمح بتمرير خطة الضم ،بس لازم كلنا نتوحد.
■حماس بتقول انه مرحلة ما بعد الضم مش حتكون زي المرحلة اللي قبلها.
■مددوا تسكير الخليل ل48ساعة جديدة عشان الكورونا.
■بكرة اللي حياخذ ال100دولار ،هو كل واحد استلم أقل من 11 مرة، أو اللي استلم 11 مرة وعنده عيلة فوق الخمس تنفار كلهم ع بعض،وفش أسماء طلعت جديد.
■اصابات كورونا بالعالم عندها صارت 10مليون حالة . يا لطيف..
■الصحة بغزة بتقول انه الوضع تبع الدوا بالقطاع صعب وخطير ،ورام الله أرسلت النا بس 5% من اللي محتاجينه.
■اليهود هدوا 6بيوت بالقدس بس باليومين اللي فاتوا.
■الشعبية مبارح عملت مسيرة بغزة و7ماس اليوم بخانيونس والسبت القوى برفح،وبنكمل بقية الجدول .
■ألمانيا بدها تدعم الوكالة بـ 20 مليون يورو، ..صب مصاري ..
■المجلس التشريعي تبع بلجيكا بده ياخذ قرارت ضد "اسرائيل" اذا نفذوا خطة الضم.
■ع قولة أبو عماد بيقلي اذا آخر يوم بصرف مصاري العمادي حيكون يوم الأربعاء ،ع هيك بتكون الحرب عالخميس.🙂
■الدولار اليوم سعره 3.45والجاج بتسعة شيكل الكيلو.
■بكرة حتتنشط البلد شوية ان شاء الله ع هوا قصة ال100دولار .

#صباح_الخير للأم اللي عزمت أولادها وبناتها عندها مع انه الظروف صعبة عالكل ،بس الأم بتضلها أم وبتقطع عن تمها عشان تسعد وتلم أولادها حواليها.
#صباح_الخير للأبو اللي صحي يفكر بيوم طويل مليان طلبات لأهل البيت ولأولاده ومرته ،وما باليد حيلة ،ربنا يهونها.
#صباح_الخير للناس اللي صارت تستنى ال100دولار كل فترة عشان تحاول تتعايش مع هالوضع المر ،مع انه مبتكفيش حاجة.
#صباح_الخير للأخت الصغيرة اللي خلصت توجيهي جديد و نزلت ع خط شغل الدار والشطف والعجن والمرمطة بعد اجازة القراية ..ريحت الوسطانية.
#صباح_الخير للناس اللي بترضاش عن العوج وبتحبش تنافق ولا تجامل ولما تضحكلك بتكون بتحبك مش بيبينلك الضحكة الصفرا ،واذا سمع سيرتك يا بيكست يا بيدافع عنك ،مش معاكوا معاكوا عليكوا عليكوا .
#جمعة_مباركة وصلوا ع رسول الله 🌹