قررت أعقل و أستقر و أرتبط خلص

بعد ما صار عمري باخر العشرينات وعنّست عند أهلي و اخواني الأصغر مني متجوزين قبلي ، قررت أعقل و أستقر و أرتبط خلص ..
وكّلت امي وخالاتي يشوفولي عروس وشروطي كانت انها تكون متعلمه ومتدينه وصيدلانيه وشبه نسرين طافش أو فيها من ملامح كندا حنا..
اسبوع زمان وبترن خالتي بتحكيلي شفنالك وحده صيدلانيه زي ما بدك و الخميس جهز حالك بدنا تقعدوا مع بعض .. والله وزبطت حالي و بدله وعطر ونظارات وساعه ولحيه مُهمله يعني عارف البنات دايماً بتغزلوا باللحيه المهمله
واجا الخميس دخلنا عليهم " سلام سلام" ومن هالمجاملات .. نص ساعه وما دخلت العروس قلت ببالي مدامها تأخرت هاي ثقلانه وواثقه بحالها
وأكيد رح تكون زي ما بدي و بيني وبين حالي " يختييي عالثقلانين مسكاهم .. مع ابتسامة ع وجهي ما حد انتبه عليها غير خالتي الحمدلله
دق الباب فجأه وأخيرااا وصلت طبعاً انا عملت حالي مشغول وما سمعت صوت دقة الباب لما قربت لمحتها.
بيني وبين نفسي "وك خالتي! من أين لكِ هذا نسرين طافش الخالق الناطق اجيت بدي أمزع خالتي كف من الفرحه "
اجت وزعت قهوه و أعطتني أول شي انا طبعاً انصدمت انو لازم تعطي أبوي و أبوها أول شي مش انا ، قلتلها مع ضحكة خجل معلش أعطي عمي و أبوي بعدين أنا!
قالت يزم فكك بابا كل يوم بفطر بتغدا بتعشى قهوه القولون قرب ينخزق قد مابشرب .. مشيناها قلت يلا مش مهم ..
قعدنا انا وياها بالصالون وأخوها الصغير كان مدفوعله وكل دقيقتين ياخذلوا جوله عنا.. قعدنا المهم بفكرها خجوله وانا رح أضل أسأل ..
بلشت فيّا بتحكيلي اووف ليش هيك ما بتشبه البقلاوه اللي بالمسلسل التركي
بقلها شو أعملك هاي خلقة ربنا وأنا راضي بشكلي ; مشيتها .. بسألها شو طبختك المفضله ؟ بتحكي والله انا ما عندي مفضل انا بآكل حيالله كرشات ، روس ، مناسف ..
لما روحنا بحكي لأمي البنت عجبتني وحلوه وصيدلانيه بس اقسم بالله دفشه وغبيه شو أعمل ..
قالت مش مشكله مع الوقت بتتغير معك المهم لا تضيعها لقطه هاي البنت ومحترمه و أهلها معهم مصاري .. حكينا معهم واتفقنا وكتبنا الكتاب مع الخطبه وحددنا موعد العرس ..
يوم العرس صحيت الساعه 8 وأصوات العصافير ومتنشط ورايق ومبسوط مسكت التلفون عشان أرن ع رؤى مغلق تلفونها
صارت الساعه 12 والمفروض تروح عالصالون صرت حاجز والحفله الساعه 6 ضليت أستنى لما صارت الساعه 3 حتى اجاني إشعار ان تلفونها متاح ..
رنيتلها بقلها ولك انتي حماره! وين مختفيه من الصبح برنلك بتقول اقسم بالله نسيت انو اليوم عرسي
ومبارح ضليت أحضر حب للإيجار للـ5 فجر وخلص شحن تلفون ونمت .. جلطتني قلت يلا معلش بتعقل رحت أخذتها عالصالون وعالطريق قضتها تتمسخر بدل ما تكون متوتره ويوم عرسها بقلها ولك مالك اثقلي شوي بتقول اقسم بالله بحبك بس بموت بالمسخره بعرفش أعقل ..
وصلنا الصاله والكاميرات والناس كلهم قدامنا قلت الله يستر من غبائها هسا .. بتطلع فيها وهي " بتتصهون " وبتتصور سنابات لحالها الغبيه ومش عامليتلي اعتبار دخلنا الصاله .
ولما اجت اغنية جنو نطو شلحت الطرحه وصارت تنط لحالها وتلولح قلت يلا معلش آثار الفرحه وبدها تعمل جو قدام الناس..
وصلنا لفقرة "الطرطه" مسِكت السكين عشان أمسك ايدها بطريقة رومنسيه اجت بتحكيلي دقيقه أنادي صاحباتي أقطعها معهم انت اقعد هناك بس نخلص بنجيبلك صحن

يا ماخذ الغزال ع جمالو بكرا بروح الجمال وبضل الغزال ع هبالو

مسسسكااهآآ شوو نغغوششهه :1992:
واللههي احسسنن الكك تأخخدد
ههبولهه و تششيزز كيكك هيكك هههههه
اللهه يبعتلكك ههبلهه ممتلهااا
ووردهه

ههههه
الجمال مو كل شي قصي
المهم خلص الزواج ع خير ههههه
يسلمو ع البسمه

الجمال اذا ما كملوا العقل بالناقص منو ،
بس هي نغشة شوية ولو انو طاغي عليها الهبل اكثر
بس حلوة القصة ولزيزة ..

الأسلوب والطريقة في التعامل لها اهمية لا تقل عن العلم والأدب
دايماً بقولها دور وحدة ع مقاس عقلك قبل ما تدورها على مقاس قلبك
موضوع حلو مشكور احاسيس

ههههههههههه هاد جايب حد يربيه من اول وجديد

الجمال مش كل شيء والله

ان كانت غبية او هبلة بالناقص


عوافي الك