ياكل الذوق ...!!

حبيبي
ياكل الذوق ...!!
على شط الهوى بشرب قهر ليلك
وأغني لك ...!
واسولف لك عن علوم السهر والليل
واصيح شوي ... واستانس
وأغني للقهر نشوان
واسولف للهوان ... عن ايام الهوى
وعن صرخة الظميان
ونزع الروح ...
وجرحٍ في قفاه جروح
وقلب إنسان
وفرعون الهوى ....والظلم
وذاك الكيد ...
وعن هامان ...
وذاك القيد
وعرش إبليس ...
وعن شكوى بلا برهان ...!!
وبابٍ بالسماء مفتوح ...
ودعوة نوح ...!!
وغيب اللوح
وقلبٍ مات .... من همه
وقلبٍ بالهجر مذبوح ...!!
وسمٍ ينشع عروقي ...
وأنا الظالم وأنا المجروح ... ورح مسموح ...!!
ونزف الملح من موقي ...!!
ووجهٍ بالشبه مملوح ...!!
وكفٍ شق لي صدري
وجذب روحي ومعلوقي ...!!
وصرخة في قفى صرخة ...
وقولة ... آ آ آ آ ه ...!! يرجع لي صداها ... آ آ آ آ ه
وليلٍ خاسفٍ بدره ...
وعاشق ضايقٍ صدره ...
وعزيزٍ إمتهن قدره ...
وشرب من حرقته دمه ...
على شط البحر ظميان ...
يموت من القهر بشويش...!!
مثل طفلٍ تموت أمه ...
يصيح شوي
ويسلى شوي ...
ويرضع من حَلَم همه ... حليبٍ ساق به سمه ....!!
ودفقة دم من شريان ...!
وسرٍ ماقوى الكتمان ...!!
وعن جهل الهوى ...
وجن الشوق ...
وشعرٍ يكتبه شيطان ...!!

حبيبي
ياكل الذوق
ابا ابكي ...
والدموع أُمة ...
يتيمٍ ظالمه عمه ...!!
جمع همه على همه ...
يصيح وماحدٍ يمه ...
ويركض في صحاري العشق ... يخم الياس وإيضمه ...!!
وهي هي حالته حاله
إذا حط الغبن شاله ...
وسوالف مالها أول ... ولاتالي ....!!
واسولف لك عن الإنسان مدام الريق يبل لسان
عن العوق ...
وعن الشوق
ووضيعٍ يحسب إنه فوق ...
وعن شيءٍ من الهجران ...!!
وإنس ... وجان ...!!
وعن عينٍ تتوق الشوق ...
ونخل ... وعذوق ...!!
وعن نورٍ توارى ... وبان ...!!

حبيبي
ياكل الذوق
سق لي من غرام الشوق فنجالك
بهاره من عرق كفك
وطعمه من شهد ريقك
يفوح بنار ...
حطبها من ظلوعي ...
وصالي حرها جوعي
وماها من دموعي ...!!
وسوالفها وله ولهان

حبيبي
ياكل الذوق
ابا اقطع لك وريدي
واصب الغم بيدي ...
وابا اربط عنك قيدي ...!!
وابا ازرع لك بعد بستان ...
ويثمر شوك ...
وانوح شوي ....
وأضحك
وأغني من القهر طربان ...
واسولف للهوان عن ايام الهوى ...
وعن إنسان كان إنسان ...
وعن جروح البنات
وسوالفهم
وريحة عطرهم
وعن ضحكة شفايفهم ...
وبقايا الروج بالفنجال
وكحل عيونهم ...
وتغنجهم ولحظات الدلال ....!!
ولو ن الطيف إذا عانق ملابسهم
وسال اللون فوق اللون
وصبغ في حافة الفستان
وإذا كذبوا ... ثُم إستحوا
ولفى حمار خدودهم
ثم اختلط لون الجمر ... بطعم التمر ...
ثم جرحوا جرحٍ عميق ينزف عسل ...
والا قالوا نحب ...
وسهروا ليل
واذا جاء ليل ثاني وماتت سواليف الهوى بقلوبهم ...
ومات من القهر محبوبهم ... من الحرمان
ودمه سال
ونزف شريانه اليابس بسكين الغدر ...
وحبوا حب ثاني ...
وابتدوا دربٍ جديد
بقلبٍ جديد
وهذي حالهم
غنج ... وهبال ...!!
وياماكان للعشاق ....
وياماكان
يظنون " الهوى " مثل " الهواء " ....
ويظنون المطر مثل دم الوريد
سوالفهم " أنا "
ويحبون الـ" أنا "
وانا على فراش القهر
أشرب من دموعي ... على جوعي
وأجرح وريد
وآخذ عزى في يوم عيد ...!!
ويابس على شفاهي قصيد
لعيونهم ...
والله .... ياحلو عيونهم ...
ليل ... وصباح تجمعوا بعيونهم ...
وضحك ... وصياح ... كله لشوق عيونهم ...
وخدودهم تفاح ...
والشهد سال وساح ...
والله على الرمان ...!!
وبشفاههم ينبت كرز ...
واذا مشوا طاح المطر مثل الخرز ...!
وإذا وطوا فوق التراب ينبت نفل
وهذي سوالفهم معي ...!!
بعيونهم انا طفل ...!!
فديتهم ...!!
راضي انا وممنون ....
وكلش يهون ... إلاسواليف الهوى ...
بالذات إذا طاح الكرز ...
وتدور التفاح ... والرمان
وتدلى عنقود العنب
وطرت سواليف البنات ...!!
أشرب طرب
وأعطش طرب
واوعد لهاتي بالغدير
ويابس لساني ماشرب ...!!