مذكرات بنت منكوسة

-آخر علاقة غرامية عشتها كانت ب 2012، لما كنت سنة تالتة جامعة ! ☔
و وقتها تحجج حبيبي بنهاية العالم الي طلعوها إشاعة و قلي بديش انتهي و أنا مع زقمك ! قلي ياها هيك بصريح العبارة ! 💔
و من يومها لليوم ! أخدت موقف من جميع ذكور الكرة الأرضية ! حتى ذكر البطريق ! و على مدار خمس سنين مضيتها أتحرقص كل ما أشوف تنين بحبو بعض ! 🔪
اليوم و أنا مروحة من شغلي متأخر عشان أخت الأزمة ، كنت بكزدر للبيت بعد ما نزلني الباص و مريت من جمب الحديقة تبعت حارتنا ، كانت هدوء و برد و فش بالشارع ولا اشي بقول عن حاله بني آدم غيري أنا ! فخطرلي أتمرجح تحت المطر و أنفرد مع حالي و أتطلع ع منظر السما الي بمثل حياة البومة الي أنا عايشتها ! مع إنو البرد تخلخل داخل مساماتي و عملي إيدز و التهاب عصبي حسي ! بس كنت مصرة شوي إني أفرغ مشاعري المجروحة ! 🌊
خصوصي إنو قبل يومين كان عيد الحب ! و أنا كنت فيه غير مرئية أو ملحوظة بتاتاً ! لدرجة إني لو اروح أسرق بنك أو حتى أقطع اشارة حمرة ! ولا كاميرا بتلقطني !! 💓
المهم دخلت الحديقة عالعتمة بجاكيتي الأسود زي الغراب ، شكلاً و سلوكاً ! حتى نفس المشية الكئيبة الخبيثة كنت أقفز قفز ! عشان ما أتضطر أرن لأهلي ينزلو ينتشلوني من فوهة الرمال المتحركة ! 🌚
علقت شنتتي ع عامود المرجيحة ، و بعدين عملت جهدي إني بقعدة وحدة ، المرجيحة توسعني و تتكافئ مع حجمي ! و فعلاً مع إني حسيتها وصلت للأرض ! و دايقت علي و عملتلي احتباس حراري بخصري و تضيق بالشرايين ، بس في اشي هدئلي الاحتباس فجأة اول ما قعدت و لامست المقعدة بسلام ! اشي بارد وصل لنخاعي الشوكي و جمدلي اشاراتي العصبية ! بطلت لا أرسل ولا أستقبل لوهلة من الزمن !! ❄⛄
طبعاً ما المرجيحة منقوعة مي و أنا تيسة ! بس الي صار صار ! بديش أخرب اللحظة و عادي خليني أتمرجح حتى لو جزئي السفلي مش حاسة فيه ! و بلشت أدع برجلي و يا دوب المرجيحة حاملتني ! و مش راضية تحلق ! و أنا بكل دناءة و كبرياء و وقاحة أنكرت إنو وزني زايد ولا يستحب التمرجح فيه ! و أصريت أعلي و أزيد ! إيدي وصلو مرحلة إنهم صارو جزء من المرجيحة من كتر البرد ! بطلت حاسس فيهم ! صارو بدهم بتر ! و بزبط ينعمل منهم بعدها ملقط فحم للأرجيلة ! ☁
لا عرفت أركز ولا أتأمل السما ولا أصفن من قشعريرة البرد ! بلشت أحس إني لو روحت عالبيت دغري أشرفلي !
فأجيت لسا بدي أنهي و أروح بكرامتي ، فعملت دفشة أخيرة قوية ! قال إنو الخاتمة ، راح من جمال حظي إنخلع جنزير المرجيحة المصدي من فوق و أنا كملت التحليق الي كان نفسي فيه مترين لقدام تا لقفني السيسو ! اجيت يم غز ع منخاري ! بمنخاري تجمعت جميع آلامي و أحزاني و ذكرياتي السيئة و وحدتي و برد القطب الجنوبي كله تخلخل جوا غضاريفي ! 👊💥
بعدها ما حسيت باشي لإني دخلت بغيبوبة حزينة بتقطع القلب ،
صحيت قبل شوي لقيت حالي ع تخت جمب وحدة شايلة زايدة ! و أنفي متمدد من الدان للدان و لونه زي الباتنجان ! و إيدي ملفلفين و حاطينلي صوبة جمب مناخيري ! و سألت شو الي صار ، كاين لامحني ولد صغير مكومة ع أنفي و كلي رمل زي فخدة الجاج بس تغتها بالقرشلة ، و الحيوان مفزع الحارة و ملتمين علي و خايفين قال مفكريني جثة ! تا وحدة من جاراتنا ميزت خلقتي و رنت ع أهلي و اجو لملموني . 😂


هههههههههههه فظيعة

لمى صالح تحفة من تحف هالزمان ههههههه ..
خيالها مشلول فعلاً
قراتها ع صفحتها
يسلموو حنين

هههههه لا هي ولا هالقعدة
يعطيك العافية

ههههههههههههههههههههههههههههههههههههههههههههه
يا امي شو ضحكت
مش طبيعية بالمرة
ههههههههههههههههههه
انسي صحيت كل العيلة ع ضحكتي وتبهدلت
بس برضو ما وقفت ضحك

يسعدك حنينو

هههههههههههههه مش طبيعية هالبنت

فظييعة والله

يسسلمو للطرح جوري

ههههههههههه
حلوة

ههههههههههههههاي
يسلمووو