هي خلص العيد , و محداش طلب ايدي !
ولا حدا قلي أريدك عيدي القادم ! ولا وحدة قالتلي إنتي لإبني !!
مع إني من ليلة العيد ! قبل صلاة العيد حتى !
رحت عملت إعادة هيكلة لملامحي بالصالون ! دفعت الي فوقي و الي تحتي !

مشيت ع مبدأ الي بقدم السبت بلاقي الأحد , و فعلاً ! خمسة مسكوني بالصالون ! خمسة ! مسكوني مسكة الله لا يوريكو !
ايدين شغالات بشعري ! ايدين شغالات بوجهي ! ايدين شغالات بأضافري ! ايدين شغالات برجلي ! ايدين شغالات بس بحواجبي !
و نازلات نحت ! حفوني حف ! نتفوني نتف زي الجاجة !
حتى خلال العملية أكتر من مرة ينقطع عني النفس و أنا بين ايديهم ! أزورق و أصير ألاهث ! و أصير ألوحلهم بإيدي إنو يوقفو !
و فعلاً يتركوني دقيقتين أروق بعدين يرجعو يكملو المعركة !
قص شعر ! تريتمنت ! و صبغة ! و هايلايت ! و سشوار ! و واكس ! و سكرب ! و بدكير ! منكير ! تاتو حواجب ! و شوارب ! و تركيب رموش ! و عدسات ! و قصارة ! و سمنت ! و دهان !
نفضوني نفضة حسيت حالي مولودة جديد ! ساعة بس و أنا واقفة عالمراي و مدمعة زي البنات الي بتحولهم جويل !
روحت عالبيت حتى مشيتي تغيرت ! ايدي مش مسدق إنهم إيدي الي تحللو من جلي رمضان ! حتى ملمس الأشياء تغير ! قعدت ساعة أحسس ع باب السيارة !

دخلت ع أهلي قبل الفجر بشوي , إمي كانت بتعزل و بتسب ع حالها ! و أبوي بجهز حالو للصلاة و أخواني بتحممو !
فجأة بس شافوني إمي و إيديها بالهوا قاعدة بتدعي سكتت و صفنت فيي ! أبوي كان بوكل حبة معمول شرق فيها و فز من مكانه ! أخوي الصغير كان بغير بنطلونه شافني استحى و هرب جوا !
أبوي و هو ملخوم قلي " عفواً يا آنسة كنك غلطانة بالبيت ؟ "
قعدت ساعة أحلفلهم إني بنتهم ! ما سدقوني غير لما ورجيتهم الوحمة الي ع شكل قرد الي ع كوعي !

و ما خليت مكان يعتب علي ! صلاة العيد ! لفة القرايب ! جمعات العيلة ! جمعات الجيران ! أعمال خيرية ! طشات الصاحبات ! حفلات ! كافيهات ! مطاعم ! ملاهي ! اقتحمت كل التجمعات البشرية !
أربع لبسات غيرت ! كل لبسة أدندش من التانية !
روحت عالبيت ساعة و همة يطلعو اجري الورمانات من الكعب ! اخدوني عالمستشفى الدكتور منعني ألبس أحذية لمدة أسبوع ! ولا بتصير اجري بدها بتر !
مع هيك ما استسلمت ! اشتريت حفاي طبية و كملت مسيرتي و أنا بعرج بلكي حدا لفته إصراري ! و هي وجي الضيف !
هيني مزتوتة بالبيت و مش هاينلي أتحمم عشان تسريحة شعري كلفتني هديك الحسبة !

و ع قولة العم فيتالس برسوم ريمي , " لا يأس مع الحياة , ولا حياة مع اليأس " ,
ع العيد الكبير بإذن الله ! رح أضاعف جهودي , و أحقق هدفي , الله يقويني .

#صراع_التكاثر