منتديات قلب فلسطين - عرض مشاركة واحدة

04-13-2017

اقتباس

المشاركة الأصلية كتبت بواسطة سمره


	1/ تكلم عن طفولتك بشكل عآم ؟ الصراحه طفوله عاديه، بحس إنه كان لازم اتهنى اكتر من هيك بطفولتي، وبحس كمان إني ايامها عشتها وانا كبيري بالعمر اكتر من وانا صغيري .. 2/ كنت طفل "هادي اكتر من اللازم" 3/ موقف صار لك وانت صغير وللحين تذكرة وآثر عليك ؟ مش عم بقدر اتذكر الصراحه. 4/ كنت تحب المقالب وإنت صغير ! إذا نعم اذكرلنا بعض منها ؟ كنت هاديه مكنتش تبعت مقالب. 5/ كنت تزعج آهلك واللي حولك ؟ بالعكس، كان يا دوب يطلع حسي. 6/ منو آكثر شخص كان يشتكي منك وإنت صغير وليش ؟ اختي مروه الاكبر مني من قد ما كنت ملزقه فيها، هي برضو كانت صغيري متلي وقتها. تصرفاتها كانت بدون وعي اكيد. لإنها هي اقرب وحده إلي حاليا من خواتي السبعه. 7/ موقف صار لك وإنت فـ المدرسه وتذكره للحين ؟ كنت بصف السادس واخذنا الامتحانات الانجليزي مع المعلمه نوره، صارت تنادي اسم واحد واحد ويجي ياخد امتحانه، نادتني واخذته وكانت العلامه 94 بس طلع مش امتحاني، طلع امتحاني مع بنت صفي روعه وعلامتو 104 وامتحان روعه معي، بدلنا وكل وحده اخذت امتحانا وتفاجئت من علامتي 104 بس كييفت كتير، كنت شاطره و 4 علامات فوق الميه هذول كانوا بونس. ذكريات .. 8/ آكثر مكان كنت تحب تروح له ؟ المرجيحه يللي كانت ورا الدار، كانت عنا عنبه كبيري يعني عريشة عنبه كبيري، وكانت طويله وكبيري، وابوي وقتها علقلي فيها مرجيحه من سقفها وكمان كنت احب اروح لغاد لإنه كنا نجيب طباشير ونرسم ارقام ع الارضيه عشان نلعب لعبة الحجه اذا بتعرفيها .. 9/ الآلعاب اللي كنت تلعبها وإنت صغير ؟ دباديب وبازل وهالالعاب .. 10/ كنت تتعاقب وإنت صغير وكيف ؟ ولا مره تعافبت بس كانوا يعطوني ملاحظات خصوصا لمن كنت اكول اظافري كتير .. 11/ آكثر موقف زعلت بسببه ؟ مش متذكري الصراحه .. 12/ موقف سويته ومحد يدري عنه للحين ؟ مش متذكري الصراحه .. 13 / آعز صديق لك وإنت صغير .. وفي حد متواصل معاه للحين ؟ مكنش في صداقه عزيزه علي، بس في بنت بعدنا ع تواصل كل فتره، زميلتي راويه. اوقات منتلاقي برات البلد صدفه .. 14 / أكثر الأشياء اللي ما كنت تحبها وودك تتغير ؟ انه كان عنا كلب وابوي كان يبعثني اطعمي الكلب عشان اصير قويه وعشان ما اخفش منو، بس بعدني لليوم، عندي حساسيه من الكلاب. بالرغم من إنه كلبنا سمموه بالحاره ومعرفناش مين اللي سممه، مع انه مكنش يغلب بآخر الفتره لإنه عاش عنا سنوات طويله ومعروف عن الكلب بكبر بالعمر مثلو مثل الانسان، فا كبر بالعمر وختير وقضو عليه بالسم .. 15/ آكثر البرامج اللي كنت تتابعها وتحبها ؟ برنامج اجنبي كان اسمو arts وكنت اروح من المدرسه واحضر اكله عالصونيه كرمال اقعد قبال التلفزيون واحضر المحقق كونان، كنت اعشقه وانا صغيري .. 16 / كنت من الآطفال اللي ينطقون الحروف غلط ؟ نعم. كان عندي مشكله مع حرف الراء كنت الفظو لام، اخوي اسمه شكري، كنت اناديلو شكلي بدل شكري. بس بوقتا عالجوني اهلي عند دكتورة النطق. 17/ آمنية كنت تحلم فيها وإنت صغير وتحققت ؟ افتح فرمشيه، بس متحققتش. هيك مواضيع بدها بسيخومتري، والبسيخومتري كتير صعب، واساسا هذا مش موجود بالعالم كلو غير بإسرائيل، ابوي بيضل يحكيلي إنو اخترعوه كرمال العرب ما تتعلمش، بس في عرب حصلت وصارت وتفوقت، غصبن عن اليهود ! 18/ قول لنا رآيك فـ نفسك يوم كنت صغير كنت هاديه كتير، بس برضو كنت غريبه شوي لإنه مكنش احب حدا يلعب بألعابي، كنت اشتري واشيلون بالخزانه، واوقات كتير بستغرب إنو ليش ما كنتش العب بألعابي؟ ليش كنت اشتري واشيلون بالخزانه؟ ما بعرف .. كل العابي واشيائي القديمه بعدون عندي .. خمر ايلول بتشكرك ع استضافك لإلي فهالموضوع الحلو. رجعتيني لورا كتير، مع إني مش كتير بحب اتذكر طفولتي .. مساكي ورد ومبسوطه بشوفتك فالمنتدى خصوصا بعد هالظرف اللي صار معكوا وفاة الوالد.

الشكر الك انك اقبلتي دعوتي

جدا بكون مبسوطة وانا بقرا بكلامك واجاباتك

ومابخبي عليكي احيانا باخد منك بعض الالفاظ وبصير احكيهن لانهن مرتبطات فيكي

بس مافهمت شو يعني فرمشيه @سمره

وان شاء الله ايامك الجاية بتكون احلي واحلي من يلي راحت

نورتيني وكتير