منتديات قلب فلسطين - عرض مشاركة واحدة

12-14-2023

بالرغم من أنه احتمالية الشفاء من هالمرض قليلة وانه عم ينتشر بجسمي بشكل كبير وما عم أستفيد من أي علاج الا اني ما زلت متمسكة بالحياة
هالمرض قربني من ربنا أكتر
علمني الصبر وأقدر نعم ربنا يلي كتير منها ما كنت أنتبه عليها من قبل
خلاني أداوم ع قراءة القرآن وقيام الليل والتهجد يوما
قدر بالبداية يتعب نفسيتي ويسرق مني صحتي وطاقتي
بس يوم بعد يوم خلق مني انسانة جديدة
كل دموع الضعف يلي بكيتها بيني وبين حالي
وكل المرات يلي أجبرت حالي أبين فيها اني منيحة
وكل مرة كنت أخبي فيها وجعي عن أهلي لما أحس انه دموعي ممكن يغدروني
كل مشاعر العجز والضعف اللي عشتها وخيبات الامل تحولوا لقوة بحياتي
بعد فترة ادركت اني بطلت زعلانة من مرارة الاوجاع والخيبات، ولا خايفة من لحظات الفقد والعجز، ولا مزعوجة من صعوبة المعارك
وصلت لقناعه انه الكانسير صار جزء من حياتي ومش مجرد جزء من جسمي
صحيح بمر بفترات ضعف وعجز ونفسيتي بتتعب بسبب الخيبات والاوجاع الكتيره
لكن هالشي بخليني أتعلق بالحياة أكتر وأكتر وأصير أقوى مش العكس