#أخبار_عالريق 1176 يوم
✅️يكتبها /#سعيد_الطويل

▪︎جيلنا المنيل لا شاف لانش بوكس ولا مزمزية ولا حتى دفاتر ملونة ..كبيرنا كان دفتر القدس ابو جلدة خشنة والقلم الفرنسي الأزرق وكيس نايلون لخبزة الزعتر ونضل نشمشم بالمحاية ام الفراولة ونطربق عالمدرسة

▪︎شب انقتل بطوشة بالوسطى كان متصاوب من الأسبوع إللي فات

▪︎ وشب ثاني مات بصعقة كهرب وهو بيشغل بداره بغزة

▪︎التهييج لسة شغال عالنت من شوية نشطاء بخصوص الحرب ..ونزلوا الزيلو واشحنوا البطاريات وجيبوا بزر مطلقات

▪︎100 ألف طالب جديد هذه السنة دخلوا الصف الأول

▪︎إذا ابن عمتك ليلى جاب أكثر منك علامات هذه السنة حسخطك سخط ..من مقولات #أم_فؤاد الخالدة

▪︎نص زمزميات الأولاد ضاعوا بأول يوم المدرسة ..تجيبوش بدالهم لانه برضه حيضيعوا مشوها بقزازة مية

▪︎المحكمة العليا الشرعية طلعت قرار منعت فيه التصرف بمقبرة الشجاعية في غزة ووقفت هدمها

▪︎بيقلك راحت تعزي بجارتها ولما حطوا الغداء طلبت زتون ومخلل خيار ..الله لا يكسبك يم عدنان على هالعملة

▪︎البلد الأيام الجاية بتخش بأصعب أيام الفلس بعد موسم صرفنا فيه الأبيض والأسود

▪︎ليلة عند الحبايب ..أول الأغاني الشعبية إللي استقبلوا فيها الطلبة في الطابور المدرسي

-بدنا فرشة طبية وعكار لصبية مريضة وصعبة حركتها وجسمها مليان تقرحات ،وبدها وقفتكم معها ..وحياكم الله

الله يصبحكم بالخير ويرزقكم من وسعه
ويسهل طريق أولادكم للمدارس ويرجعولكم سالمين غانمين