#أخبار_عالريق 1171 يوم
✅️يكتبها / #سعيد_الطويل

▪︎يا ساتر يارب ..صباح مليان قصص وأوجاع وحوادث وجرايم وانتحار ..الله يهدي بال الناس ويهديهم ويريح بالهم..والحمد لله على كل حال

▪︎انتحر الليلة إللي فاتت شب مثقف اسمه محمد نبيل النجار من #خانيونس بعد تفجير قنبلة يدوية في حاله
وفي آخر منشور إله حنشره بأول تعليق

▪︎غرق على وجه الفجر الشاب عبد الرحمن نافذ ربيع عمره "19 سنة " في بحر السودانية ومات الله يرحمه

▪︎جريمتين قتل خلال أكم من ساعة في الداخل المحتللل ،انقتلوا فيها شبين

▪︎عيلة العرجا في رفح أعلنت انها سامحت وصفحت عن السواق إللي تسبب في وفاة ابنهم الطفل صبري محمود العرجا مبارح الجمعة..بنفس اليوم

▪︎الدولار ملعلع فوق عشان الناس مفلسة ،وعالشاشة وصل 3.80 شيكل اليوم الصبح

▪︎كرتونة البيض بخمسطعشر شيكل وبتحداكم لو حد يقنعنا بالسبب

▪︎من بكرة بتقدروا تستلموا ال 310 شيكل إللي من العمادي بنفس النظام إللي قبل ..الجداد مرة آه ومرة لأ ..والقدام مرتين آه ومرة لأ

▪︎اليوم رواتب موظفين غزة في البنوك والبريد وهيك هيك عالصرافات من يوم الخميس

▪︎الجو حيضلوا لسة هيك من هان لآخر الأسبوع الجاي ..والله أعلم

▪︎في أطفال والدهم محبوس أكثر من عيلة وأكيد بدهم حد يقف معهم بالكسوة وشنط المدارس وما يحسوا بالنقص ولا ليش أبوكم محبوس ..لو حد حابب بعطيه تفاصيل تقفوا معاهم

اللهم يكتب إلنا وإلكم الخير ..ويسهلها معاكم
في كل أموركم