سنة اولى غياب

بداية الكلام مهواش عتاب
ده كلام بالقلب كان متساب
وعايز يتقال
في شعر في اغنية
في موال
المهم يتقال ..
يخفف شوية من الاحمال
القلب كان هايب يقوله
بس عدى الليل بطوله
وخد قراره وقال
عدى كام سنة
عدى كام يوم وساعة
طابت جراحنا
وخفت روحنا
وبقيت كُل اما تيجي ذكرى
افضل عادي
ما اتوجعش
ما بقولش ساب
وما اخفش
من الحنين لو عدى على بالي
اصله لسه عندي غالي
احب اني افتكره
كُل اللي ما بيني وبينه بفتكره
هو ما اختارش الفراق
ولا انا اخترته
هو النصيب غلاب