#أخبار_عالريق 1051 يوم
✅يكتبها / #سعيد_الطويل

■زلزال سوريا وتركيا الأضخم من سنين طويلة والبحث عن ناس عايشة لسة شغال والعدد وصل للضحايا أكثر من 7500 حتى الآن غير آلالاف الجرحى

■هزة أرضية خفيفة عالآخر حس فيها سكان نابلس وشوية بشمال البلاد

■الحمد لله الوضع عنا بيطمن وفش حاجة بتقلق ونص الصفحات إللي بتنشر أخبار عن الزلازل والتوقعات مضروبة

■أكثر من 60 فلسطيني توفوا في زلزال سورياو تركيا

■صراحة هذا المنخفض بسقعته وأمطاره مشفناش زيه من أيام الروضة

■المهم هذا المنخفض حيلملم عزاله ويتسهل بكرة بعد الظهر ان شاء الله

■اليوم معطلة كل المدارس والروضات والجامعات بغزة والضفة

■ما شاء الله في تطور ملحوظ في جدول الكهربا صارت تيجي عال9 وتقطع عال 9ونص

■في عروض دفايات بالبلد بعشرين شيكل ..لو اشريتها ممكن تجيب بطانية عشان تغطيها وتشفق عليها

■عليم الله أجواء هذه الأجواء بتشبه أجواء الكورونا بالضبط بس بدون ترند النابلسية

■في ناس قليلة حيا عالتيك توك وبيرقصوا على صورة الزلازل وعاملينه ترند هدول جماعة التكبيس للصبح

■سؤال من ابن #أبو_فؤاد شخصياً
شو الحل مع البنت إللي بتزعل من خطيبها وبتحرد عشان ما أخذها عالبحر بهيك جو ؟

-بهذا الوقت انت نايم ودفيان وفي غيرك غرقان بالمطرة من الزينقو ..
وفي غيرك شغال بالأسعاف وفي دكتور مناوب وفي شب حبيب الله مرابط وفي شرطي سهران عشان خاطرك وفي ممرض بيتابع شغله ..الله يعطيهم ألف عافية..
#يارب بهذا الجو وهذه المطرة تحقق أمنية كل ملهوف وكل محتاج وتسترنا فوق الأرض وتحت الأرض ويوم العرض عليك

#يارب لا ترعبنا ولا تخوفنا وما تجعل الدنيا أكبر همنا ..

#يارب ابعد عنا وعنكم شر كل حاسد وحاقد وقليل أصل

#يارب لا تفجعنا بأي حد بنحبه واجعل خير أعمالنا خواتيمها ..

قولوا آمين يارب العالمين
الأربعاء 8-2-2023