#أخبار_عالريق 924 يوم
✅يكتبها /#سعيد_الطويل

■قوم ولا انخمد انت وإياه خلي أمك تعرف تنام بدري عشان عليها سراحة شغل بكرة "باسرائيل"

■والله بنتي مهرها خمس تلاف دينار ...
ليش يا حج ؟ ....
-عشان معها تصريح باسرائيل مش موظفة وكالة ولا حكومة

■بكرة بنلاقى كمان #أبو_فؤاد بيقول لعديله والله انهد حيلي من جلي الجليات والخبيز ،لانه أم فؤاد الله يعطيها العافية لسة بياته بشغلها من مبارح..

■ايش مخصلة بنتك يا حجة ..؟
-والله معها تصريح باسرائيل

■متنكدة عشان أجاني رفض أمني ؟
-ليش ؟
بيحكوا عشان أظافري طوال ..

⭕كل هذه الشغلات فاعت مبارح نكشات راس من وقت ما شلومو الخبيث قال انه في تصاريح عمل جديدة للنسوان في اسرائيل وبصراحة بديش احكي كثير بالموضوع بس حتلاقوا رأيي بأول تعليق على المنشور

■14000 ألف تصريح حصة غزة من التصاريح قابلة للمساومة والتنكيد والابتزاز وكل حاجة ..لكن كان الله بالعون لقمة العيش مرة والفقر دبح الناس دبح..

■في غزة حكموا على 4 عملاء بالأشغال الشاقة بمدةمن 12الى 15سنة.

■في عجز بميزانية الوكالة 100 مليون دولار زي كل سنة

■كل الفصائل عزت مصر وشعبها بوفاة أكثر من 40 شخص في حريق كنيسة منيرة بمصر

■أربع حالات وفاة وفوق ال1900 حالة اصابة جديدة بالكور.ونا بغزة والضفة

■المهم اليــ ـهود بيحكوا انه الإفراج عن عواودة والسعدي مسألة مش مطروحة عنا خالص

■الدولار في النازل وسعره كل يوم بيهود عن الثاني

■اليوم انشاء الله صرف شهــ ـداء وجرحى العودة وبكرة صرف الرواتب المقطوعة من رام الله

■موسم المدارس لسة فش فيه حركة زي الخلق ، بس معروفة الناس بتضل لأخر يوم تلفلف وبتشرتي نفس الشغلة عشان بتكون شافت شنطة ابن سلفتها

#صباح_الخير للناس إللي لا بتكل ولا بتمل عشان رزقها و لقمة عيشها بتجري وبتطربق من الصبح وبترجع ثاني بالليل عشان تستر حالها وما تمد ايدها لغيرها

#صباح_الخير للناس إللي ما بتحب تتسول وقاعدة 24 ساعة عالنت وبتسب وبتعلن وهما ما جربوا حتى يطلعوا من بيوتهم عشان يدور ع شغل ولو أجاهم بيطلعوا مليون حجة

#صباح_الخير للناس العفيفة الأصيلة ..والله يجبر خاطرهم ويفرح قلوبهم

#يسعد _صباحكم_كلكم 🌹
الاثنين 15-8-2022