#أخبار_عالريق 575 يوم
✅يكتبها/سعيد الطويل
■اليوم حتنصرف ان شاء الله رواتب المتقاعدين بحكومة رام الله وحكومة غزة مع بعض بنفس الموعد بس كل جماعة من بنكها.
■رواتب موظفين غزة حيصرفوها هذا الأسبوع بنفس النسبة والآلية تبعت كل شهر،يعني فش زيادة للأسف
■جماعة 7ما،،س كلهم وصلوا القاهرة مبارح بالسلامة ،عندهم كبشة اجتماعات عشان الاعمار والمكتب السياسي وملف الأسرى .
■ناصر اللحام راجل طيب ومعلوماته مية المية ،مبارح طلع فيديو لزكريا الزبيدي وهو بالمنشفة ومعاه ثلاثة من الشباب الزقردات يوم ما شردوا ع وجه الفجر.
■أجلوا اليــ ـهود محاكمة الأبطال الستة لتاريخ 24/10 ،ومبارح كانت صورهم بتفتح النفس وهما رافعين اشارة النصر ع برنامج الزووم.
■في استقرار ملحوظ بأعداد الحالات والاصابات والوفيات من الكو رونا بقطاع.
غزة
■الاعلام العبري بيحرض على سبعة بده يغتالهم على راسهم السنواار وأبو نعيم والعارروي
■على ذمة أبو حسنة في عجز بميزانية الوكالة ،فوق ال100 مليون دولار ،وإذا متوفروش مش حيصرفوا رواتب الشهرين الجايات.
■أبو مازن والهباش وأبو تالا مبارح إلتقوا بوزير الصحة الإسرائيلي والتاني وزير ايش بعرفش .. بمقر المقاطعة برام الله .
■بعد الاجتماع مع حزب ميرتس "الاسرائيلي" برام الله ،أبو مازن حكالهم هاتوا باقي الشباب من حكومتكم وتعالوا زورونا أهلا وسهلا.
■عاملين مشروع جديد "العلاج بالموسيقى" لطلبة المدارس الحكومية بغزة
فكرة منيحة بس شو بده يخلي "شلقط" ابن أم رمزي يقتنع بهذا الموضوع ؟
■بشكل رسمي مش اشاعة زي كل مرة مات بحادث سير رسام الكاريكاتير السويدي لارش فيلكس "الله يجحمه" إللي رسم الرسول صلى الله عليه وسلم بطريقة مسيئة .
■الجاج حيغلي الفترة الجاية عشان خشينا بالشتا ،ع أساس انه كان رخيص يعني.
■رجعت أزمة القمعة تبعت البندورة من أول وجديد بموضوع التصدير.
■موضوع العمرة عن قريب حيرجع يتفعل وخلال أيام حيبلشوا بالترتيب لأول فوج.

#صباح_الخير للناس إللي بتعمل الخير وبتدوش شو حيرجعلها منه ،للناس إللي بتساعد غيرها عشان تجبر الخواطر ..الله يكثر منكم ويديمكم .

#صباح_الخير للخرجيين الجداد من جامعة الأقصى، إللي احتفلوا الأيام إللي فاتوا بتخرجهم ، ان شاء الله أيام الجاية أحلا وأحسن بدناش نحبطكم

بدنا نغلبكم عشان حظروا حساباتي عالفيس بوك للمرة الألف في رابط #بالتعليق_الأول لصفحتي إللي بنشر عليها تابعوها بنشر عليها شغلات كويسة طول النهار ..🌹👇

#يسعد_صباحكم 🍀