#أخبار_عالريق 337
✅يكتبها/سعيد الطويل
■يعني شكلها الأمور هذا الأسبوع فيها أريحية ورخرخة شوية بالوضع والحركة قبل العيد.
■حيكون في صرف وتقبيض هذا الأسبوع لتكملة الوكالة للأربعين دولار وشيكات الشؤون ومصاري العمادي ورواتب السلطة والوكالة واحتمال كمان موظفي غزة يكون الهم نصيب بالمرة،الله يرزق جميع خلقه.
■ عشان الناس الي سألوا عالخاص ،الصرف بكرة لل 100$ حتكون لكل واحد قبض أقل من 12مرة ؛أو أكثر من 12مرة وعنده أربع تنفار ،وفش أسماء جديدة.
■من بكرة حيبلشوا دوام بالمدارس للأذنة والكتبة عشان يزبطوا الوضع لبعد العيد ويستقبلوا الأولاد ويريحوا أهاليهم من دوشتهم.
■ستمية حالة كوورنا جديدة بالضفة مبارح وصار عدد الوفيات سبعين حالة .
■عدد اللي ماتوا برا البلد من الفلسطينية حتى الآن ،تقريبا مية وستة وتسعين واحد.
■الاجتماعات شغالة بين فتح وح...ماس زي الفل عشان المهرجان الكبير اللي حيكون قبل العيد.
■القواسمي بيقول انه الرئيس عباس حيُثلج صدور الناس ،بالكلام اللي حيحكيه بمهرجان غزة.
■اليهود أفرجوا مبارح عن القيادي ب7..ماس بالضفة أحمد يوسف .
■كل يوم صار في مظاهرات قدام دار نتنياهو عشان فساده ،ومبارح مسكوا واحد من الناس اللي معه داخل بين اليهود المعارضين اله وهو معه كوورنا عشان يعديهم.
■اليهود بيقولوا ما بيتوقعوا أي تصعيد بغزة الفترة الجاية .
■الجاج اله يومين بسبعة شيكل الكيلو .
■المانجا أم حبة صغيرة ،اللي زي المايا ،صارت التلاتة بمية ،وزي العسل.
■البطيخ عشرين كيلو بمية ،بس بعرفش كيف وضعه.
■مبارح اعترضت طيارات أمريكية طيارة ايرانية وحاصروها ،وبعدين سبوها تكمل طريقها .
■المستعربين خطفوا ولد صغير عمره اطنعشر سنة من العيساوية بالقدس .
■الضفة حتضلها مسكرة لسة للأسبوع الجاي ما عدا المخابز والصيدليات حتضل شغالة.
■خلال أسبوعين ،مليون واحد اكتشفوا معهم كورونا بأمريكا.
■بيقلك وكالة ناسا عاملة جائزة لأي واحد بيخترع "كابنيه" مرحاض يستخدموه عالقمر ،شكلها الأمور صعبة عندهم عشان قصة الجاذبية .
■هذا يا معلم حق الاعب الإنجليزي هاري ماغواير المدافع بمانشستر يونايتد 88مليون يورو وحيضل سعره أغلى مدافع بالعالم.
■وع قولة الحجة أم سامي ،يارب يجينا لحمة بزيادة السنة وتكون مش مدهنة كثير .

#صباح_الخير لكل واحد ملوش حظ ومطلعلوش لا شيك شؤون ولا قبضة عمادي ولا حتى 100شيكل عيدية ،والأمور ملبشة معاه وضاوي قبل العيد ؛وبيستنى أي خبر يفرحه عشان يعيد زيه زي الناس.

#صباح_الخير للبياعين بسوق الرابش والخردة والبالة والأغراض اللي بتنباع بشيكل،وللناس البسيطية اللي بتسلك حالها منه وبتجيب أحلى شغلات .

#صباح_الخير للناس اللي قاعدة بتحضر بماكينة فرم اللحمة ومنقل الشوي والسياخ والأمور التانية عشان يسترزق ويشوي لأهل الحارة زي أبو ربيع .

#صباح_الخير لكل زوجة قررت تريح جوزها وقلتله جيبلك بنطلون كبوي وبلوزة بيضا للأولاد نسلك حالنا فيها للعيد والمدرسة ،وما نشفت ريقه ولا لفلفلت ولا نقت لبستين للعيد والمدارس ،جابت من الآخر يعني.

#صباح_الخير خص نص ، للستات الكبار بالعمر وروحهم روح الحياة كلها اللي بيتابعوا نشرتنا المتواضعة من جوا البلد ومن براها كمان .

#جمعة_مباركة وصلوا على رسولنا الكريم صلى الله عليه وسلم 🌹