#أخبار_عالريق 98
✅يكتبها /سعيد الطويل
■اليوم اليهود قرروا يفتحوا البحر والمعابر المسكرة مع غزة من أول وجديد .
■بنت صبية من دير البلح انطخت مبارح برصاصة ببطنها وحالتها لسة خطيرة بالمستشفى .
■شب الليلة الي فاتت حرق حاله بنص خانيونس والسبب لسة مش معروف.
■الحجة شلبية الي عمرها 78سنة أخذت الرخصة وسامي ابن عمار لليوم قاعد بعيد بالتوجيهي.
■بيقلك بلش موسم طبخة الهيلون ،ومحدش يقلي كيف طعمه لأنه للأمانة مجربتوش .
■فيروس كورونا الفتاك قاعد بيغزوا العالم بشكل مش طبيعي.
■السعودية من اليوم وطالع حتوقف تأشيرات العمرة برضه عشان قصة الكورونا.
■السعودية بدها تعمل لأول مرة دوري كرة قدم للنسوان.
■أسير من دار أبو لبدة من رفح خلصت محكوميته ال12سنة واليهود مش راضيين يفرجوا عنه بدون أي سبب.
■طلعت الست المغدورة صفاء شكشك مقتولة عشان 20 شيكل المسكينة.
■سوق الطير البلدي رخصان هاليومين .
■شب من غزة اشترى بسة بيقلك انها مميزة ب4500شيكل.
■الزنانات الها كم يوم ملهمش حس ولا خبر.
■الريال مدريد انهبد هبد على أرضه ،وراموس انطرد بدون رجعة.
■موضوع زيارة أبو مازن لغزة تقريبا بطلوا يحكوا فيه.
■ وكمان المستشفى الأمريكي الي بشمال غزة بطلت تنجاب سيرته .
■الخضرة سعرها ماشي حاله بس الناس ضاوية ومعهاش مصاري الدنيا آخر الشهر.
■بنطلون الكابوي الشبابي ب20شيكل بس مبارح كان بسوق الأربع.
■الجو اليوم حترتفع درجة حرارته شوية،بس بالليل تقلوا بلبسكم وأواعيكم.

#صباح_الخير للتاجر الي صاحي يوزع بضاعته وعليه ديون متلتلة .
-صباح الخير لأم يونس بياعة الجرجير والفجل والبقدونس.
-صباح الخير لسواق باص الفلوكس الزغير الي بينقل اولاد المدارس بنص شيكل.
-صباح الخير لعامل المطعم الي صحي يطحن خلطة الفلافل من قبل الفجر
-صباح الخير للزهقان والطفشان وللعيان والمزنوق والمخنوق والي عليه ذمة مالية والي ثلاجته فاضية وللشب الي مأجل فرحه عشان بيستنى دوره بالجمعية وللصبية الي انكسر خاطرها قدام صاحباتها بالمطعم عشان معهاش تدفع وللمريض الي بطل يتعالج عشان تكاليف العلاج وللطالب الي بطل من جامعته عشان أبوه معوش رسوم يدفعله ولأصحاب بسطات الشاي والقهوة وللأولاد الزغار الي بيبيعوا البسكويت ع مفترق السرايا.

#يسعد_صباحكم ��