حدا بقدر يفهّمني شو الهدف من تبرّي عائلة من قريب منها؟

شب منتشر خبر إنه عائلته "تتبرأ" منه، على الأغلب بسبب تصرفاته الي ما بتدخل في القالب الإجتماعي الي اخترعه المُجتمع "الحديث" لكل من يولَد مع أعضاء تناسلية ذكرية، أو بسبب ميولاته الجنسية.

موضوعي مش هاذ الشب بالتحديد، وإنما شو الفكرة من إعلان البراءة من إبنك أو بنتك؟!

يوم منشوف عائلة تتبرأ من بنتها لإنها مش عايشه كيف بدهم،
يوم عائلة تتبرأ من إبنها لإنه تزوّج من غير دينه،
يوم عائلة تتبرأ من بنتها لإنها سافرت برا البلاد تشتغل وتتعلّم،

وين المنطق في إنه شخص يتخلى عن أغلى إشي عنده، ويتركه - عادةً بجيل صغير - ليواجه مصاعب الحياة كلها لحاله/ا؟

شو متوقعين يصير بهيك حاله غير إنه هالشب الصغير يتعامل مع عصابات أو يصير يتعاطى مُخدرات ثقيلة؟ شو متوقعين غير إنه هالصبية الصغيرة تنجبر تنزل للدعارة؟ شو متوقعين غير إنه رح يتعرّضوا للعنف، الإهانة والقتل؟

بهيك حالات بدل ما الأهل يحتوا أولادهم، بتركوهم لحالهم بجيل صغير!
كله عشان "حكي الناس"، وعشان جيرانهم وأهل بلدهم ما يضلهم يعيّروهم فيهم.


مؤسف جدًا إنه هاي العادة ما زالت موجودة،
والمؤسف أكثر إنه الناس - إلي دايمًا بتطالب محدا يتدخّل فيها - ما زالت بتضغط على العائلات إلي أولادها بغرّدوا عكس السرب لحتى يقدموا على هيك خطوة كارثية للعائلة وللإبن/الإبنة.