كاف المخاطب يلي مالها عازة:

١- تدخل على الأفعال، وتستخدم لما زوجك يجيب غراض البيت.....
مثال: جبتلك بندورة، جبتلك لحمة، جبتلك مسحوق غسيل.
وكأن هدول هدية شخصية، مو مشان الطبخ والنفخ.

وأحياناً بيستخدمها الزوج لما يشتري غرض لحالو، وهاد أكتر استخدام بيضرب عالعصب.
مثال: جبتلك شو قميص، بيفلج. وطبعاً بينسى يستخدمها بجمل متل جبتلك الضغط، جبتلك السكري، جبتلك الجلطة...

٢-وتدخل كاف المخاطب على الأسماء خاصة لما الولاد فجأة، سبحان الله، بيصيروا ولادِك إلك وحدك....
مثال: بنتك كسرت الصحن، ابنك عم يرسم عالحيط...

اما نا الجماعة وإلها استخدامين:

الأول لما الزوجة تشتغل والزوج يحكي بصيغة الجمع...

مثال: مبارح طالعنا السجاد، اليوم ضبينا الشتوي...
وطبعاً هو ما بيكون عامل شي غير عم بتدور العجقة .

والثاني لما الزوج ينسى شي كان لازم يساويه....

مثال: دخلِك قفلنا الباب؟ طفينا المكيف؟ جبنا الولاد من المدرسة؟

أماا الميم والنون للدلالة على مهام جديدة للزوجة. مثال: تعي قعدي بعدين منفك البرادي، بكرا منكب الزبالة...