أخبار_عالريق
 

#أخبار_عالريق 667 يوم
✅يكتبها / #سعيد_الطويل

■شكله هذا المنخفض رسمي فش تفاهم معاه لإنه كل الدنيا بتحضر إله ، لا ضل دفاع مدني ولا شرطة ولا أرصاد ،الكل عامل طوارئ وبيستنا فيه وبيحذر منه.

■عموما المنخفض حيوصلنا اليوم بعد الظهر ،وحسب الأرصاد حينزل تلج في الضفة وعنا حيصير سيول وربنا يسلم

■بالنسبة لليوم بشكل رسمي فش دوام لأولاد مدارس الفترة المسائية ،وبكرة فش ولا للصبحية ولا للظهيرة كله يلبد ويلم أولاده حواليه.

■اليوم محدش يودي أولاده الصبح عالمدرسة حرام يتشفشوا من السقعة ،هذا تصريح جدعنة مني .

■أصلا بنفعش بنفس العمارة يم خالد أولادك يغيبوا المسا عن المدرسة وأولاد سلفتك الصبح يروحوا ،بيصير في أزمة بالموضوع.

■حضروا أغراض المنخفض وكثروا بزر من تبع الحردانات عشان تتسلوا ،الليل طويل.

■مركز الأورومتوسطي بيقول انه نص سكان قطاع غزة صاروا فقراء.

■جدول الكهرب بالمنخفض حيتلخبط هذه الفترة ،وأزمة الغاز قاعدة بتزيد شوية شوية

■ الإمارات حتبعت اليوم مساعدات طبية مرتبة ولقاحات لغزة.

■السعودية حفتتح مدرسة بغزة كلفتهم 5 مليون دولار الأسبوع الجاي .

■تونس بدها تبعت كمية مساعدات فيها بركة إلنا .

■محدش يقلي وين بتروح المساعدات ،#أبو_فؤاد راصد كل تكاتك الحارة وبيراقب كل الكراتين وكل الأكياس الزرقا إللي طالعة وإللي نازلة.

■مباحث التموين مسكت 7 طن أكل ومعلبات خربانة بغزة

■حسين الشيخ كاتب انه سلم وزير الخارجية تبع اسرائيل ، رسالة من أبو مازن أكد فيها إيمانه بحل سياسي يزبطه من أول وجديد بالمفاوضات.

■توفى راجل كبير بالعمر بحادث سير مبارح ببتونيا في رام الله

■ديروا بالكم ع حالكم وع صغاركم من الدفيات وكوانين الفحم اطفوها قبل ما تناموا.

■دراسة بتأكد انه هرمون السعادة بفرشوحة شاورما دبل سخنة لما تجيبها فجاة لحدا بالليل ، بتفرحوا أكثر من خاتم ذهب بتجيبه لمرتك بعد نشاف ريق

■تسعيرة تبديل دور الجلي بالمنخفض زادت 30% .

■الجاج رخصان والموز والبرتقان الخمسة بمية

#صباح_الخير للناس إللي بتحب الشتا ،اللي ليل نهار بينزلولنا منشورات غزل وحب بالشتا وسقعته والتشفشف إللي مش مخلينا نحس حتى بمناخيرنا
..ربنا يهديهم ويريح بالهم ويرجعهم لصوابهم وينور عقلهم ونشوفهم الشتا الجاي وهما ندمانين .

#صباح_الخيرات_وبركة_مطرة_الشتا 🌹
الأربعاء 26-1-2022

يسعد اوقاتك صمت المنال
ويسلمو ع المتابعه

مشكور امير للمتابعة و النقل
تحياتي

الله يكون في العون
تحياتي لك

مشكور ع المتابعة

يسلمو ع المتابعة
يعطيك العافية

متابعة جيدة أخي
ربي يسعدك

متابعه مميزه لااخبار
تسلم يمناك