منتديات قلب فلسطين - أخبار

#أخبار_عالريق 614 يوم
✅يكتبها /#سعيد_الطويل

■حلب وعوامة وصحن مهلبية بالعسل وعدس سخن وكثثثر عليه دقة, وكانون نار وفحم خربان وتفطر شعيرية بسكر و30ألف تصريح جديد للشغل بإسرائيل وروابط تسجيل لحكومة غزة وشوية تصريحات جديدة واجتماعات هان وهناك عشان قرار الإنجليز تبع حظر 7.ماس ..

وصور حلوة لغزة بجوال مليان فلاتر وصور ثانية بجوال قديم بتصور الجور والتكسير والهبوط بالشوارع والمية المغرقة الحارات والشوارع إللي انقصفت ..

قصارة جامع وقعت مبارح بغزة و فش اصابات الحمد لله وشبين ماتوا بحادث سير بالضفة
ناس زهقانة من وقت فراغها الطويل وناس ثانية بتفضى بطارية اللدات عندها بعد نص ساعة وبتقضي بقية ليلتها عالعتمة ..

صور سيلفي للبنات بعز الشتا ع بحر غزة بتشوف فيها فرحة حلوة كأنهم مسافرات وزيادة شوية كمان ..

وراجل كبير بالعمر هو وابنه قاعدين بيحطوا نايلون فوق الزينكو عشان متدلفش عليهم المطرة وتغرق غرف النوم وصالون الدار الصغير..

صفقة للأسـ ـرى شغالة عليها مصر بقلب ورب ومنحة قطرية بيبتزوا اليــ ـهود فينا عشان يخششوها ..

ناس مفلسة وناس ثانية انكسرت بتجارتها ومحبوسة ع ذمة مالية وبتطلع بس اجازة عشان تحظر فرح ابن اختها وبترجع ثاني تكمل فترتها..

الصحية ,"عيادة الوكالة" مليانة عيانين تلت ترباعهم نسوان وأولادهم الصغار معاهم ..بتسمع خراريفهم بصوتهم العالي معظمها عن الطلاق ومشاكل الكناين والحموات وقصص النت.

سواق عالخط من الزهق بيطلع اشاعات عشان يتسلى وواحد ثاني فاتح قرآن وكافي خيره وشره ,ملوش لا عالبرم ولا على تزبيط المراية ..

كيلو الجاج مش راضي يرخص بالبلد والكلمنتينا مملية البسطات والرمان الأربعة بمية والأفوكادوا يعني الابوكاتوا سعره نزل بالأرض برضه ..

ماعلينا هذه أخبار البلد اليوم باختصار وسيبكم من اشاعات #أبو_فؤاد وخراريفه الفاضية
قوم فاجئ مرتك واحتفلوا بهذا الجو بطنجرة عدس من أكبر نوع وإذا عدستم فأبصلوه ..

ويا #صباح_الخير عالناس الطيبة
و صبحناكم صبحونا ..
الأحد 21-11