عيش حزنك لحالك وعيش فرحك لحالك بكفي مباهاة ورياء
 

أكيد شفت اللي قدم هدية لابنه وابنته سيارة وأكيد شفت اللي جاب لزوجته تلفون مذهب وأكيد مر معك اللي حجزلها رحلة شهر لتركيا.

بس أكيد ما سمعت عن الأب اللي قلبه بنحرق على بنته لما نجحت مش عارف يفرح ولا يزعل لأنه ما معاه ٥٠ دينار ثمن طلب الالتحاق، وأكيد ما شفت الآباء شو بكون حالتهم لما يقترب موعد القسط الجديد للجامعة.

إحنا مجتمع عارف بعضه يا جماعة. صحيح عنا ٢_٧ % معاهم مصاري ومعاهم يتفشخروا على البشر. بس في عنا ٩٠ % من البشر عايشين على الكفاف، عايشين على راتب بكفيهم لنص الشهر، عايشين بدون ما يقدروا يفكروا في بكرة لأنه بكرة أصعب كثير من اليوم والتزاماته بتوجع القلب.

مش مطلوب من الغني يدفن نفسه صحيح. بس الله يرحم المختار لما قالوله خطيب بنتك غني اطلب واتطلب، فقال: أنا ما بكون باب فتنة وبرفع مهر كل بنات البلد منشان بنتي.
هذا لأنه أصيل وبعرف وين واقف.

وآخر شيء، صدقني إنه الفرح والسعادة والرضى ما بكون إلا جوات الإنسان وكل مال الدنيا ما بفرح قلب تعيس. وكل هاي الصور والفيديو والرقص وما يرضي وما لا يرضى الله ما إله قيمه عند إنسان بعرف إن العافية والطمأنينة وستر ربنا بتسوى كل مال الدنيا.

جرب عيش حزنك لحالك وعيش فرحك لحالك بكفي مباهاة ورياء وبكفي استجداء للتعاطف في الحزن والفرح.

واعلم حفظك الله أن:

"من زحزح عن النار وادخل الجنة فقد فاز وما الحياة الدنيا إلا متاع الغرور".

✍🏻 د. وائل حريز

كلام
صح
التباهي والفشخرة
ظاهرة غبية
بتدوس على مشاعر
الفقير وبتعجزه اكتر
شكرا
مؤمن

فعلا كلام صحيح
انتشرت كثير شغلة المباهاه بكل اشي
المفروض هاي اشياء خصوصيه استمتع فيها انت لحالك
مش ضروري تنشر كل اشي
لما بدك تهدي حدا اشي
او لما بدك تسافر مكان
او لما بدك تعمل اي اشي
هاد كلو لنفسك
ما تشارك حدا فيه

يسلمو عالطرح مؤمن

جرب عيش حزنك لحالك وعيش فرحك لحالك بكفي مباهاة ورياء وبكفي استجداء للتعاطف في الحزن والفرح.
كلام صحيح وسليم ومع الاسف معظم المجتمع بس بدو يتباهى انه معه مال وانه قادر يعمل ويعمل وم بيعمل حساب للناس اللي الله اعلم بحالها اللي ساترها ربنا
فش داعي تبين للناس انه معك وبتقدر تعمل وتعمل
مع الاسف هاي الظاهرة منتشرة كثير بمجتمعنا وخاصة ع مواقع التواصل
يسلمو مؤمن ع الطرح
يعطيك العافية

فعلاً كلامك صحيح
كثير منتشره هالظاهره في مجتمعاتنا
صار مافي شي إسمه خصوصيه
كل شي ينشروه ع مواقع التواصل الإجتماعي
وإذا نصحناهم بيقولوا مالك علاقة أو إنتِ غيرانه منا مافي إحساس ولا مشاعر معهم

أعجبني طرحك القيم
ربي يسعدك ويحفظك يارب

وآخر شيء، صدقني إنه الفرح والسعادة والرضى ما بكون إلا جوات الإنسان

حبيتا كتير

احسنت الانتقاء ي قلب

الله يبعتلك ايام حلوه

هالشي واقع للاسف
م في حد بحس بظرف التاني
وكلو عالعلن

يعطيك العافية مؤمن

كل الشكر و التقدير

كلام جميل ومنطقي
حبيت اختيارك مؤمن
ماننحرم مجهودك