موجز الاخبار
 

■الأولاد تسهلوا ع مدارسهم مبارح كل واحد حامل معه زمزميته تبعت المية وخبزته اللي خمشها قبل ما يطلع من الحارة ؛ووصلوا لقيوا الصفوف بدها لسة جدول مناوبة عشان تتنظف وتترتب.
■الوكالة قالت انها حتوزع دفاتر عالأولاد بالمدرسة ،بأول الفصل.
■الفصائل تقريبا بدهاش تهدئة بغزة ،والأمور شكلها حتتصعد شوية شوية الأيام الجاية.
■من صبحية الله مبارح لآخر الليل والبلاليين مسكتتش وهيا تتولع ويطيروها الشباب عالغلاف.
■غانتس الهامل قال انه حيرد ع كل بلون بيطلع من غزة،ونص غزة ضلت للصبح سهرانة تستنى وخوزقهم🙂.
■تقريبا ربع مليون بني آدم صاروا ميتين من الكوورنا بالعالم لهلحين .
■بأمريكا لحالها في خمسة مليون اصابة ،بس مش مبين عليهم ولابدين .
■بفترة العيد بس صار بقطاع غزة فوق الخمسة وخمسين حادث سير..ديروا بالكم.
■وزارة التعليم بتقلكم انه اي شكوى حتوصلها بخصوص الصفوف ونظافتها ،أو أي حاجة تانية حتابعها ع طول.
■الأمور مولعة بين نتنياهو وغانتس وشكلها الأمور حتخرب ويحلوا حكومتهم، أصلا الشركة تركة.
■الشرطة طابين اعتقالات بالنشطاء اليهود اللي طلعوا ضد نتنياهو عشان فساده.
■أفرجت الحكومة السودانية مبارح بالليل عن الشيخ محمود الحسنات .
■طبعا بالكورة بقيادة ميسي فازت البرشا على نابلولي وطلعت ع ربع النهائي ،والبايرون ميونخ كسح تشيلسي كسح وطلعوا برضوا ع ربع النهائي.
■لبنان صار مش معروف اله راس من رجلين ،الدنيا مقلوبة عندهم قلابة ومسيرات طالعة ومسيرات نازلة وقمع واصابات ،والتدخلات من برة ومن جوة مسكتتش ،ربنا يهدي سرهم .
■غانتس الهامل بيقلك ملوش دعوة باللي صار بلبنان ،وانه عدوه حز.ب الله مش اللبنانية .
■حادثين سير وحالة وفاة بجنين مبارح وفوق ال8اصابات وفي منهم اصابات صعبة كمان.
■بلوزة المدرسة الزرقا صارت بستة شيكل.
■الشؤون حتصرف 700شيكل الأسابيع الجاية لأكثر من ستين ألف عيلة.
■بيقولوا بالأرصاد جاية كتلة هوا باردة الأيام الجاية تلطف من التحميصة اللي احنا فيها.
■ع قولة أم خليل ،المدارس بدها مراوح ،دخلت الصف أشوف بالبنت وأقعدها أول بنك عشانها قصيرة ،طلعت سايحة وريحتي بتقتل من العرق.
■الخيار والبندورة والبتنجان والبصل كله الكيلو بشيكل بالسوق.
■الصبر السنة مش نازل كثير زي كل سنة وشكلهم قاطفينه مش مستوي.

#صباح_الخير للأم اللي بتصحي قبل أولادها بتصحيهم وبتلبسهم وبتمشطهم وبتربطلهم الجزمة وبتحشيلهم الخبزة ولو في رشة عطر بتعطرهم وبتعطيهم مصروفهم وبتقلهم الله يساهل عليكوا.

#صباح_الخير للطلاب اللي مدارسهم بعيدة وبيمشوا كل الطريق مشي بعز الشوب والوضع مش زابط مع أبوهم يدفع أجرة سيارة كل يوم مع مصروفهم.

#صباح_الخير لأصحاب البسطات اللي ع باب المدارس وخاصة تبعون الأندومي والبرد الملون والسحبة تبعت الجوائز .

#صباح_الخير للمعلمات اللي قد حالهم اللي بيصحوا من النوم بيرتبوا الدار وبيشطفوها وبيطبخوا وبيطلعوا الأولاد عالمدرسة وبيجهزوا وبيحضروا وبيروحوا عدوامهم وبيرجعوا يكملوا اللي عليهم.

# 🌹

كل الشكر والتقدير

يعطيك العافية لادراجك هالاخبار
ومتابعتها ..

لجهودكم باقات من الشكر والتقدير
على المواضيع الرائعه والجميلة

تسلم ايدك عالفائده