منتديات قلب فلسطين - #أخبار

#أخبار_عالريق 240
27/7/2020
✅يكتبها/سعيد الطويل
■أسبوع مليان قبضات ومصاري لغزة بس منحسدش حالنا ،اليوم رواتب السلطة والوكالة وبكرة ان شاء الله حتنصرف رواتب 7ماس والشؤون والمنحة القطرية قاعدين بيصرفوا فيها ،الله يديم العز ويوسع عالناس.
■سلطة النقد بتقول فش خصم هذا الشهر من الراتب لأي بنوك.
■طفلين ماتوا بغزة مبارح كل واحد لحال الأولى بنت صغيرة من دار البلبيسي أجتلها طلقة طايشة ،والثاني ولد صغير من دار أبو وردة اندهس من سيارة.
■خمس حالات وفاة مبارح بالضفة من الكورونا ،وتقريبا أربعمية حالة جديدة وفي تلتمية صاروا تمام والله شفاهم.
■خبر وفاة أمير الكويت طلع مش صحيح ،بس حالته الصحية صعبة ولسة بيتعالج بأمريكا.
■جدول الكهرب صاير زي الزفت بعيد عنكم.
■مسكت المكافحة مبارح ستة وتلاتين فرش حشيش بغزة، يعني ضربوا موسم العيد .
■بيقلك في رؤية جديدة أعلن عنها سلام فياض بمؤتمر عشان يستعيدوا الأمل والوحدة.
■تقريبا ودوا مبارح عالمستشفى أربعين اصابة من حريقة صارت بطوشة عائلية بالقدس .
■دعوات للناس انهم يشدوا الرحال للقدس يوم وقفة عرفة ويفطروا هناك ،عشان يتصدوا لليهود اللي ناويين يقتحموا الباحات.
■بكرة في مسيرة برفح حتطلع لكل الفصائل عشان قضية العميد جبر القيق .
■مبارح فتح في نابلس أعطت مهلة للسلطة تلات تيام عشان يحاسبوا اللي قتلوا مسؤول فتح ببلاطة دويكات .
■المتهم بقتل بنته بالوسطى مبارح طلع من السجن .
■تكافل بتقول انه فش صرف 200شيكل لأي حد قبل العيد ،وانه هذا الخبر مضروب ومش مزبوط.
■يوفونتوس صار بطل ايطاليا للمرة الستة وتلاتين في تاريخه.
■توفى الشاعر الفلسطيني هارون هاشم رشيد.
■السر.ايا أعلنت انها مسكت مجموعة عملاء بيتشغلوا مع الاحتلا.ل بغزة .

#صباح_الخير لكل الناس اللي نوت وصامت الأيام التسعة الأوائل من ذي الحجة ،ربنا يقويهم ويكتبلهم الأجر ويريح يالهم.

#صباح_الخير لكل عيلة بتستنى ع أحر من الجمر بكرة يشقشق الصبح عشان يقبضوا شيك الشؤون ويقدروا يسلكوا أمورهم ويفرحوا ع وجه العيد،رغم انه تلات ترباعها رايحة سداد ديون.

#صباح_الخير للناس اللي عايشة بزينقو بالمخيم و صحيت من الصبح مفرفطة روحها من الشوب ،عشان قطعت الكهرب.

#صباح_الخير لكل واحد بيحاول يسعد حد حتى لو بكلمة وبيكسرش بخاطر حد وبيحاول يخفف عن الناس بهذه الظروف اللي ما مرت على حد.

#يسعد_صباحكم بكل الخير 🌹