اخبار جديده . متابعة الاخبار . اخبار على الماشي
 

#أخبار_عالريق 183
✅يكتبها/سعيد الطويل
■تاني يوم بالعيد كان مليان حوادث وأحداث وربك ستر .
■قبل شوية انفجر جسم مشبوه بطفل اسمه زياد أبو ليلة ،عمره "14 سنة" من بيت لاهيا ،ووصل المستشفى وهو مستش.هد الله يرحمه.
■انقتل شب صغير بالعمر بطوشة عائلية بنابلس بعد ما خلص معايدته ع قرايبه.
■اندهس راجل مسن مبارح برضه بنابلس وتوفى عالمطرح.
■توفت حالة جديدة بالكوورنا وهو مغترب من الكويت من دار بسيسو أهله بغزة.
■انقتل باشتباك مسلح شب اسمه جمال الجاعوني من الفلسطينية اللي عايشين بمخيمات لبنان .
■المستوطنين طخو ع شابين برام الله وهما بيشتغلوا بمزرعتهم وقالوا انهم كانوا بيحاولوا يطعنوهم.
■ شب من العاصمة وبالضبط من جبل المكبر حاول يطعن جندي ،صاوبوه واصابته خطيرة.
■وصل لمستشفى الأقصى بدير البلح حالة غرق من البحر كانت بالقرارة ،وضعها صعب كثير ..الله يلطف فيها.
■اليهود بدهم يفتحوا المعابر مع الضفة وغزة بدءا من اليوم.
■بحر غزة كمان فتحوه عشان الصيادين يسترزقوا اليوم الفجر.
■اليوم كنسوا الجوامع وعقموهم وصلوا فيهم أول صلاة بالضفة من يوم الأزمة.
■الحياة بالضفة حترجع شوي شوي لطبيعتها ،بس لو اكتشفوا أي حالة جديدة ،حترجع الإجراءات زي أول.
■كل الوزارات والمحاكم بكرة شغالة عادي بالضفة وغزة والدوام من الجلدة للجلدة.
■الليفل أب فتحوه بغزة بإسم جديد وبيقلك الطاولات بالحجر ومش لاحقين زباين والسعر تسألش ،الله يرزقهم .
■بالنسبة للمدارس والجامعات لسة فش قرار يداوموا الطلبة .
■طوابير الشاورما ع مطاعم غزة ،أطول من طوابير جرة الغاز عند القطعة.
■الكهرب من مبارح لليوم مقطعطش عنا ولا دقيقة..اللهم لاحسد.
■الدورة المالية للعيدية خلصت مبارح اللي عيد ولادكم عيدتوه واللي عيدتوه رجع عيدكم والله مكانش من الصغار راحت بكيسه.
■الجو حيكون اليوم أشوب من مبارح بشوية زغيرة.
■السعودية سمحت بالصلاة بكل الجوامع جماعة ،الا الموجودة بمكة.
■اليهود منعوا الخلايلة يصلوا بالحرم الإبراهيمي ،وبيقلولهم بس مسموح خمسين واحد.
■في انخفاض بعدد اصابات الكورونا ع مستوى العالم والحمد لله.

#صباح_الخير للشباب الجدعان اللي عملوا مرجيحة صغيرة قدام دارهم عشان يسترزقوا ويفرحوا الولاد الصغار بالعيد.
-صباح الخير لكل راجل ضاقت فيه الدنيا وعمله بسطة بيبيع عليها حاجات وشوية ألعاب رخيصة ع قرنة الشارع.
-صباح الخير لكل أم جمعت عيديتها عشان تجيب فيها حاجات الدار اللي ناقصة.
-صباح الخير لكل لكل المحجورين اللي روحوا بالسلامة ع بيوتهم مبارح ومعظمهم كانوا من الأردن.
-صباح الخير لكل أخت أصيلة أعطت أخوها شوية من عيديتها عشان يمشي أموره وظروفه.
-صباح الخير للناس اللي بتقدر غيرها وبتصون العشرة وبتسأل بصحابها وبتحس بالفرحة لما بتسمع صوتها او تجيك زيارة بالعيد.
لو وصلتك النشرة عرفنا بلايك مش أكثر ..

#يسعد_صباحكم وربنا يريح بالكم 🌹

كل الشكر والتقدير

عوافي ع المتابعه

يسلموو لنقل والمتابعه

يعطيك العافية